InfoHub Logo

بايلاردىڭ جەمقورلىعىن وتكىر تىلىمەن شەنەپ، سىبىزعىداعى كۇيىمەن ءاجۋا-سىقاق ەتكەن سىبىزعىشىنى ەلدىڭ يگى جاقسىلارى بىرىگىپ الىپ، كوزىن قۇرتپاق بولادى. وعان تۇس-تۇسىنان قىسىم جاساپ، ءتىلىن تيگىزىپ، تىكەنەگىن قادايدى. ەل ءىشىن ارالاپ سىبىزعى تارتىپ، ءازىل-سىقاق ايتۋدى قويىپ، قارشاداي قارا كۇركەسىندە، بالا-شاعاسىنىڭ قاسىندا، وتىنىنىڭ باسىندا كوڭىلدى ءومىر سۇرۋىنە توسقاۋىل جاساپ، باسقان ءىزىن باعاتىن اڭدۋشى قويادى. وسىناۋ قاپاس ومىردەن قۇتىلۋدى ارمانداعان سىبىزعىشى تاڭى راۋانداپ اتاتىن، كۇنى كۇلىپ باتاتىن، ادامدارى الا-قۇلا باي مەن كەدەي بولىپ بولىنبەيتىن، ءزابىر-جاپاسى جوق ەلدى ىزدەپ جولعا شىعادى. ادىلدىكتىڭ ورداسىن ىزدەپ تالاي ەلدى ارالايدى، تالاي جولدى باسادى، تالاي بەلدەن اسادى. ءبىراق ونداي ەلدى تابا الماي، ارمان تاۋى شاعىلعان سىبىزعىشى ارىپ-شارشاپ، قارا كۇركەسىنە قاراي قايتا ورالادى. قايدا بارسا دا، ەڭىرەگەن ەلدى، شەرمەندە بولىپ سورلاپ، قاپاس ومىردە قان جۇتقان كەدەيدى كورەدى. بوستاندىقتا ءومىر ءسۇرۋدى ارمانداعان سىبىزعىشى ۇزاق جول ءجۇرىپ، ەلىنە بەت الىپ كەلە جاتادى دا، كولبەپ جاتقان قۇبا بەلگە كەلىپ، سىبىزعىسىن تارتىپ وتىرىپ قازا بولادى. ەل اراسىندا جۇرگەن تاعى ءبىر سىبىزعىشى جىگىت جول ءجۇرىپ كەلە جاتىپ، قۇبا بەلدە سىبىزعىسىن سۇيەۋ ەتىپ قازا بولعان جىگىتكە تاپ بولادى. جىگىت اتتان ءتۇسىپ قايتىس بولعان جىگىتتى سول جەرگە جەرلەيدى. ونىڭ كەيىپ-كەسكىنىنەن شارشاعاندىقتان، ارمانىنا جەتە الماعان مۇڭ مەن زاردىڭ بەلگىسىن كورەدى. جول-جونەكەي اۋىر جايعا، وكىنىشتى وقيعاعا تاپ بولعان سىبىزعىشى جىگىت اينالا ويلانا كوز جۇگىرتەدى. شەگى جوق، شەتى جوق دالا. دالا توسىنەن تىرشىلىكتىڭ جونكىگەن دۇربەلەڭى دە، قىزعان ءومىر ءانى دە كورىنبەيدى. تەك و جاعى مەن بۇل جاعى تۇماندانىپ كورىنىپ ىستىق دەمىن ىشىنە تارتىپ جاتقان، مىناۋ سياقتى قانشاما قىرشىن جاستى قاپاس قۇشاعىنا العان توڭىرەك سارعىشتانىپ، زىلدەنىپ كورىنەدى. ءدال مىنا قالپىمەن جاڭبىر جاۋماعان، شۋاق كورمەگەن، قايعىدان باسقانى بىلمەيتىن كەرەناۋداي سەزىلەدى. وسى تىلسىم تىرشىلىككە ءىشقۇسا بولىپ قايعىرعان سىبىزعىشى سارى بەلدە وتىرىپ، قازا بولعان سىبىزعىشىعا ارناپ «سارى بەل» كۇيىن تارتادى.

 

---