سەناتور قازاقستانداعى جوو-لاردىڭ ءبىلىم ساپاسىن سىنادى
پارلامەنت سەناتىنىڭ جالپى وتىرىسىندا دەپۋتات مۇرات باقتيار ۇلى جوعارى ءبىلىم سالاسىنداعى وزەكتى ماسەلەلەردى اتادى.
«ءقازىر ەلىمىزدە 128 جوعارى وقۋ ورنى بار، ولاردىڭ 82ء-سى ۋنيۆەرسيتەت مارتەبەسىنە يە بولىپ وتىر. دامىعان ەۋروپا، وڭتۇستىك-شىعىس ازيا ەلدەرىندە 320 مىڭ ادامعا ءبىر جوعارى وقۋ ورىنىنان كەلەتىن بولسا، بىزدە 141 مىڭ ادامعا ءبىر جوو-دان كەلەدى»، - دەدى دەپۋتات.
ونىڭ پايىمىنشا، جوو سانى جونىنەن ەلىمىز دۇنيەجۇزى بويىنشا الدىڭعى ورىنعا شىققانىمەن، الايدا بەرىلىپ جاتقان ءبىلىم ساپاسى كوڭىل كونشىتپەيدى.
«بىرىنشىدەن، كوممەرسيالىق وقۋ ورىندارىنىڭ كوپشىلىگى ساپالى ءبىلىم بەرە الماي، تەك قارجى جيناۋ قۇرالىنا اينالىپ وتىرعانى شىندىق. بىلتىردان باستاپ ۇلتتىق ءبىرىڭعاي تەستىلەۋدەن 50 بالدان تومەن العان كوپتەگەن تالاپكەرلەر جىل بويى ءۇش رەتتەن تەست تاپسىرىپ، وقۋىن جالعاستىرا بەرەتىن بولدى. بۇل تالاپكەرلەر نەگىزىنەن 11 جىل بويى مەكتەپتە ناشار ءبىلىم العاندار، ولار ەرتەڭ قانداي ءمۇعالىم، دارىگەر، ينجەنەر بولماق؟ دەمەك، جوو-لاردىڭ كوپشىلىگى ساپالى بىلىمگە ەمەس، تەك ديپلوم بەرۋگە ماشىقتانىپ العان»، - دەپ اتاپ ءوتتى دەپۋتات.
سونىمەن قاتار سەناتور اۋماقتىق دەڭگەيدەگى سۇرانىسقا ءمان بەرىلمەي كادرلار دايىندالىپ جاتقانىن تىلگە تيەك ەتتى. ەڭبەك رەسۋرستارىن دامىتۋ ورتالىعىنىڭ زەرتتەۋىنە سۇيەنسەك، قازىرگى تاڭدا جۇمىس بەرۋ نارىعىندا نەبارى 30 پايىز جوعارى ءبىلىمدى مامان كەرەك بولسا، قالعان 70 پايىز جۇمىس ورىندارىنا كوللەدج بىتىرگەندەر قاجەت ەكەن.
«كوشى-قون كوميتەتىنىڭ مالىمەتىنە قاراعاندا، سوڭعى 7 جىلدىڭ ىشىندە ەلىمىزگە كورشى وزبەكستان، قىرعىزستان، تاجىكستان مەملەكەتتەرىنەن 6 ملن ەڭبەك ميگرانتى كەلىپ، قۇرىلىس، اۋىل شارۋاشىلىعى، تۇرمىستىق قىزمەت كورسەتۋ سالالارىندا جۇمىس ىستەپ، وسى بوس ورىنداردى تولتىرعان. ءبىز جىل سايىن مەملەكەت جانە اتا-انالاردىڭ قاراجاتى ەسەبىنەن قازىرگى نارىققا قاجەت ەمەس ون مىڭداعان جوعارى ءبىلىمدى مامانداردى دايارلاپ، جۇمىسسىزدار سانىن قولدان كوبەيتىپ وتىرمىز. جىلىنا ءبىتىرىپ جاتقان وسىنشاما جوعارى ءبىلىمدى ديپلومى بار ماماندار ەكونوميكامىزعا قاجەت پە؟ بۇل ماسەلەنى قالاي رەتتەيمىز؟»، - دەدى م. باقتيار ۇلى.
سونىمەن قاتار ول وتاندىق جوو-لاردا قىزمەت ەتەتىن وقىتۋشىلار مەن پروفەسسورلاردىڭ ەڭبەكاقىسى تومەن ەكەنىن اتاپ ءوتتى.
You Might Also Like
-
جانبولات مامايدىڭ "زۇلمات" فيلمىندە قازاق حالقىنىڭ تاريحىنداعى 22 اقپاندا رەسەي سىرتقى ىستەر مينيسترلىگىنىڭ اقپارات جانە باسپا ءسوز ءبولىمى «1932-1933 جج. كسرو-داعى اشارشىلىقتان تۋىند...
-
دۇنيە جۇزىلىك دەنساۋلىق ساقتاۋ ۇيىمى تاراپىنان پلاستيكالىق ىدىستاردان تۇتىنىلاتىن سۋلاردا گورمون جۇيەسىنە اسەر ەتىپ، بەدەۋلىككە سەبەپ بولاتىن، بالالاردىڭ جەتىلۋىن تەجەيتىن، يممۋنيتەت جۇيەسىن بۇزاتى...
