سەزىمتال تاراقاندار
تاراقانداردىڭ جولدا توپ-توبىمەن جورتىپ كەلە جاتقانىن كورگەن قوڭىزدىڭ ەكى كوزى شاراسىنان شىعا جازدادى. سەبەبى ءوڭى كەتكەن جاندىكتەر الدى-ارتىنا قاراماستان، ۇرەيمەن شىعىسقا قاراي جول تارتىپ كەلەدى. تازا اۋادا ەرىگىپ اندەتىپ وتىرعان قوڭىزعا تاراقانداردىڭ بۇل ارەكەتى قىزىقتى كورىندى. ول دەرەۋ نە بولعانى جايىندا سۇراعىسى كەلدى. الايدا ەبى كەلمەدى. ەگەر سۇراي قالسام توپىرلاپ كەلە جاتقان تاراقانداردىڭ اياعىنىڭ استىنا قالىپ جاراقات الارمىن دەپ قاۋىپتەندى. ءسويتءتى دە سىرتتارىنان باقىلاۋىن توقتاتپادى. جاندىكتەردىڭ قاشان توقتاپ، دەمالاتىندىعىن اڭدىدى. شارۋاسى تۇگەل قوڭىز تاراقانداردىڭ قۋ سۇيەك بولىپ، ءوڭى كەتكەنىن بايقادى. ولارعا جانى اشىدى. ايتەۋىر ارتتارىنان ەرىپ ءجۇرىپ ءۇش ساعات قالاي وتكەنىن بايقاماي قالدى. قوڭىزدىڭ قارنى اشتى. تاراقاندار تىنىعىپ ازىقتانىپ وتىرعان كەزدە قوڭىز قاستارىن كەلدى.
— ءاي، بۇل كىم تاعى جەردىڭ استىنان شىعا كەلگەن، — دەدى قارت تاراقان جاقتىرماعان تۇرمەن قاراپ.
— مەن — قوڭىز اۋلەتىنەنمىن، اتىم جەدەل بولادى. سىزدەردىڭ تۋىسقانىڭىز بولامىن، — دەپ كۇمىلجىدى. قوڭىز تولعاندىرعان سۇراعىن قويا المادى. ويتكەنى ول ارتتارىنان تۇسەمىن دەپ قاتتى شارشاعان ەدى. جانە ومىرىندە ءبىرىنشى رەت توقتاۋسىز ءۇش ساعات ءجۇردى.
— وسى تۇرعان جەرىڭدە كۇل-پارشاڭدى شىعارايىن با؟ — دەپ ماناعى قارت جاندىك مۇرتىن ارلى-بەرلى قيمىلداتتى.
— جوق، بۇل ءبىزدىڭ باۋىرىمىز. بىزگە جانى اشىپ تۇرعان شىعار. ايتەۋىر تۇرىنەن سۇراق قويعىسى كەلگەنى كورىنىپ تۇر، — دەدى بۋىنى بەكىمەگەن جاس تاراقان. ءسويتتى دە ول دورباسىنداعى ناننىڭ قالدىعىن شىعارىپ، اساي باستادى.
— مەنىڭ سىزدەرگە قويايىن دەگەن سۇراعىم بار، — دەدى قوڭىز. — نە سەبەپتەن ۇرەيلەنىپ، توبىر-توبىرىمەن قازاقستاننان قاشىپ شىعىسقا، ياعني قىتايعا بارا جاتىرسىزدار؟
قوڭىزدىڭ ويلى كوزبەن قويعان سۇراعىن بايقاعان قارت تاراقاننىڭ ءجۇزى جىلىندى. ول قوڭىزدىڭ قاسىنا كەلىپ، باۋىرىنا باستى دا اشىلىپ اڭگىمەسىن جالعادى.
— جالپى، ءبىز ادامدارعا وكپەلىمىز. قازاقستاندا ۇيالى تەلەفون دەگەن پالە كوبەيدى. ءبىز ونىڭ رادياسيالىق ساۋلەسىن وتە جاقسى سەزەمىز. ال ادام بالاسى ونى سەزبەيدى دە. ماقساتىمىز قىتايعا بارىپ تۇراقتانىپ قالۋ ەمەس. ويتكەنى بۇل جەردە مەكەندەگەن ميلليونداعان باۋىرىمىز قينالدى، ازاپ كوردى. ول جەردە ۇيالى تەلەفون قازاقستاننان دا كوپ ەكەن. شىڭ ەلىندەگى يۋيمىن دەگەن قالا ماڭىنا جەتكەن سوڭ، وڭتۇستىككە قاراي جول تارتامىز. گونكونگ دەگەن قالاعا بارىپ، كەمەمەن تىنىق مۇحيتىنداعى تۋبۋاي دەگەن ارالعا بارىپ قونىستانۋدى ارماندايمىز.
— نەگە ءدال سول جەرگە باراسىزدار، بۇل دەگەنىڭىز جەردىڭ ءتۇبى عوي.
— بارۋىمىز كەرەك. ۇلى قوڭىر ءتۇستى تاراقان اۋلەتىن ساقتاپ قالۋىمىز كەرەك. ول جەردە ۇيالى تەلەفون ساناۋلى-اق. ادام از قونىستانعان. ءبىز ادام تۇرعان مەكەنگە ەمەس، ادام اياعى باسپاعان، يت تۇمسىعى باتپايتىن جەرگە بارماقپىز.
— ءماسساعان، ال وسىنىڭ ءبارىن ءسىز قالاي بىلەسىز، قالايشا جوسپارلاپ قويعانسىز؟
وسى كەزدە ۇشىپ بارا جاتقان كوگەرشىن قارت تاراقاننىڭ الدىنا سالەمدەمە حات تاستادى. تاراقان قۇسقا العىسىن ايتىپ، ونى يۋيمىندەگى كوگەرشىندەردىڭ ەستافەتا ارقىلى جەتكىزىپ بەرگەنىنە قۋاندى. كونۆەرتتى اشىپ، بۇكىل تاراقاندار ەستىسىن دەپ قولىنا ميكروفون الدى دا حاتتاعى جازۋدى داۋىستاپ وقىدى.
«سالەم، ءبادىر قالايسىڭ؟ الەمدەگى ميللياردقا جۋىق قوڭىر ءتۇستى باۋىرلارىڭىز سىزدەردى اسىعا كۇتىپ وتىر. مەنىڭ ۇيىمداستىرۋىمەن تۋبۋاي، مولدەن، ۋپولۋ، اۆارۋا دەگەن ارالعا ميلليونداعان باۋىرلارىمىز ءساتتى قونىستاندى. سىزدەردى الدىمەن يۋيمىندەگى داتۋنحە وزەنىنىڭ سولتۇستىك-باتىس مەكەنىندە كۇتىپ وتىرمىز. داتۋنحە وزەنىندە ءوزىم قولمەن جاساعان الىپ كەمەگە وتىرامىز دا، حۋانحە، دادۋحە، يانسزى، بەيپانسزيان، سيسزيان وزەندەرى ارقىلى سيانگانعا (گونكونگ) جەتەمىز. سيانگاندا ادام بالاسى قۇراستىرعان وتە الىپ كەمەگە وتىرامىز. ول كەمە اۆسترالياعا قاراي جۇرەدى. ءارى قاراي اۆستراليادان پونپەي ارالىنا ءوزىمىزدىڭ كەمەمىزبەن بارامىز. ايتپاقشى، پونپەيگە بارۋىمىزدىڭ سەبەبى — ول جەر تۋبۋاي، مولدەن، ۋپولۋ، اۆارۋاعا قاراعاندا جاقىنىراق ورنالاسقان. ءارى ول جەردە ءقازىر ءبىزدىڭ قوڭىر ءتۇستى اۋليەتىمىز مۇلدەم مەكەندەمەيدى ەكەن. مەنىڭ بىلۋىمشە، ول جەردە ءومىر سۇرۋگە بارلىق جاعداي بار. كەمەنىڭ كەستەسىن ءبىلىپ الدىم. تۋرا 12 كۇننەن كەيىن اۆستراليادان سيانگانعا كەمە كەلەدى ەكەن. سوعان جەتۋ ءۇشىن الدىمەن سىزدەردىڭ يۋيمىن ماڭىنداعى داتۋنحە وزەنىنە ەكى كۇننىڭ ىشىندە كەلۋلەرىڭىزدى سۇرايمىن. ازىق-تۇلىككە الاڭداماڭىزدار. ءبارىن ويلاستىرىپ قويدىم. سالەممەن، ءىنىڭىز قاراش».
حاتتى وقىپ بولعان قارت تاراقان ازىقتانىپ بولعان جاندىكتەرءدىڭ باسىن قوسىپ، شىعىسقا قاراي بەت الدى. قوي ۇستىندە بوزتورعاي جۇمىرتقالاعان زاماندى اڭسايتىن تاراقاندارعا قوڭىز ساتتىلىك تىلەدى.
You Might Also Like
-
مەن كەرەمەت ءتۇس كوردىم. ءبىزدىڭ ءۇيدىڭ تەرەزەسى اشىق ەكەن. بالكونعا شىعىپ قاراپ تۇرعانمىن، كەنەت اسپان جاپ-جارىق بوپ كەتتى. جۇلدىزدار وتشاشۋ سياقتى شاشىلدى. ەكى جۇلدىز بالكوننىڭ تەرەزەسىنەن ىشكە كىرى...
-
ەرتە، ەرتە، ەرتەدە ورمان القابىندا كەنەتتەن دۇلەي ءورت باستالدى. اڭ اتاۋلىنىڭ ءبارى باسى اۋعان جاققا قاشىپ، بوسىپ كەتتى. ۋ-شۋ ەتكەن داۋىستان، جەردىڭ ىستىق لەبى-بەتىن شارپىپ، ۇيقىسىنان ويانعان تاسباقا ...
