InfoHub Logo

ەرتە، ەرتە، ەرتەدە ورمان القابىندا كەنەتتەن دۇلەي ءورت باستالدى. اڭ اتاۋلىنىڭ ءبارى باسى اۋعان جاققا قاشىپ، بوسىپ كەتتى. ۋ-شۋ ەتكەن داۋىستان، جەردىڭ ىستىق لەبى-بەتىن شارپىپ، ۇيقىسىنان ويانعان تاسباقا وت-جالىننىڭ وزىنە جاقىنداپ قالعانىن كورگەندە ءبىر ورىندا تىپىرلادى دا قالدى. قانشا تىرىسسا دا جىبىرلاپ ءجۇرىپ، جايباسارلىعىنىڭ كەسىرى-نەن ءتىلسىز جاۋدان الىستاي الماي-اق قويعانى. سالدەن سوڭ بيىك شوقپار تاستىڭ ۇشكىر ۇشىندا وتىرعان مايمىلدى كورىپ، قۋانىپ كەتتى. جالبارىنا جاردەم بەرۋىن سۇرادى.

— ەگەر مەنى ولىمنەن قۇتقارساڭ، قاشان بولسا دا جاقسىلىعىڭدى وتەيمىن، — دەدى ۇزدىگىپ.

جەتكەن بيىگىنە ماساتتانعان مايمىل ميىعىنان كۇلدى.

جەردە ءىلبىپ، ءبىر اۋدارىلىپ، مىڭ ءسۇرىنىپ، ارەڭ جىلجىپ، جان­دارمەن كۇي كەشكەن تاسباقانى بيىكتەن كورىپ قالعان جولبا­رىستىڭ جۇرەگى بۇلك ەتتى: «تىرشىلىكتىڭ ءبىر جاندىگى الاس ۇرىپ ءجۇر. ونى ولىمگە قيۋعا بولا ما؟»

كوپ ويلاپ جاتپاستان قۇيعىتىپ بارىپ، الدىڭعى اياعىمەن وراپ الدى دا، وتى سونگەن شوقىلارعا قاراي الىپ ۇشتى.

جىلجىپ جىلدار وتە بەردى. قارا كۇيە بولعان اتىراپ كەيىننەن گۇلگە تولدى. سونشاما ۋاقىتتا تاسباقا عانا مازاسىز كۇي كەشتى. ول وزىنە ءومىر سىيلاعان جولبارىستى ۇمىتپادى. قۇداي تاسباقا-نىڭ  تىلەگىن بەرىپ، كۇزدىڭ ءبىر كەشىندە شىعىپ كەلە جاتقان كۇننىڭ الاۋ رەڭىن، سودان كەيىن كەلگەن بارقىت ءتۇننىڭ قارا بوياۋىن كەزەك-كەزەك الماستىرىپ، جولبارىستىڭ تەرىسىنە دارىتتى. وسىلايشا كۇننىڭ جارقىن نۇرى مەن ءتۇننىڭ ءتۇسى جولاق-جولاق ءوڭ بەرىپ، جولبارىس ەڭ سۇلۋ بولىپ شىعا كەلدى. وسىنشاما قۇدىرەت تىلسىمى تاسباقادان كەلگەنىن جولبارىستىڭ ءوزى دە بىلگەن جوق. بۇكىل جان-جانۋار جولبارىستىڭ تەرىسىنە قىزىعۋمەن قايران قالىستى.

مايمىلدىڭ ءىشىن قىزعانىش قارىپ، وپىنىپ، وكىندى. ءالى كۇنگە دەيىن جولبارىس جۇرگەن جەردە ول ءوزىنىڭ ۇسقىنسىز ءتۇرىن كورسەتۋگە ۇيالىپ، تىعىلىپ قالاتىن كورىنەدى...

---