InfoHub Logo

تاريحتا شاڭدى سورىپ الاتىن ءبىرىنشى ماشينا ءحىح عاسىردىڭ اياعىندا جاسالدى. ونى ىسكە قوسۋ ءۇشىن ەكى بىردەي ەر ادامنىڭ كۇشى كەرەك بولدى، سەبەبى ءبىر ادام ۇرلەپ تۇردى، ال ەكىنشىسى شلانگانى ارلى-بەرلى تاسىپ ءجۇرۋى ءتيىس ەدى. ءبىراق شاڭ جينالعان جوق، كەرىسىنشە سىرتقا قاراي ۇرلەنەتىن بولعان.

بۇل يدەيانى ينجەنەر حيۋبەرت سەسيل بۋت 1901 جىلى جەتىلدىرە ءتۇسۋدى ويلايدى. ونىڭ شاڭسورعىشى شاڭدى ۇرلەمەي، ارنايى شاڭ تۇراتىن قاپقا سۇزگى ارقىلى سوراتىن. ۆاكۋۋم سورعىسىنىڭ قۋاتى بەس اتتىڭ كۇشىنە جەتەتىن، ول بەنزينمەن جۇمىس ىستەيتىن.

ءبىرىنشى نۇسقاسى تىم ۇلكەن ءارى داۋسى زور شىعاتىن، سوندىقتان شاڭسورعىش ىسكە قوسىلعان كەزدە ادەتتە اۋلادا تۇراتىن، ال شلانگ تەرەزە ارقىلى كىرگىزىلىپ، شاڭدى سورىپ شىعاتىن.

بۋت شاڭسورعىشى 1902 جىلى ۆەتمينستەر ابباتتىعىندا جاساپ شىعارىلدى، قۇرىلعى جەتىنشى ەدۋاردتىڭ تاققا وتىرۋ شاراسىنىڭ الدىندا كىلەمدەردى تازالاۋ ماقساتىندا ارنايى ويلاپ تابىلعان. وسىنداي جارنامادان كەيىن جاڭا باعىتتاعى ىزدەنىستەر كۇش الادى.

مۇنى باسەكەلەستەر پايدالانىپ كەتتى. كوپ وتپەي ولار شاڭسورعىشتىڭ شاعىن ۇلگىسىن جاسادى. بۇل ماشينا ءۇش فازالى ەلەكتر قوزعالتقىشىندا جۇمىس ىستەدى. شاڭسورعىش قۇرىلىمىنا ەلەكترقوزعالتقىشىن ەنگىزۋ شاڭسورعىشتار تاريحىندا ەلەۋلى وقيعا بولدى، بۇل ءادىس وسى قۇرىلعىنى ءۇي شارۋاسىندا قولدانۋ ماسەلەسىن شەشىپ بەردى: ول وتە تىنىش جۇمىس ىستەپ، بەنزيننىڭ جانۋىنان شىعاتىن ۋلى گازدان ارىلۋعا مۇمكىندىك سىيلادى.

1908 جىلى امەريكالىق W. H. Hoover Company كومپانياسى tin model دەپ اتالاتىن شاعىن شاڭسورعىش مودەلىن جاسادى، ونىڭ سالماعى 20 كەلى ەدى (سول ۋاقىتتاردا باسەكەلەستەردىڭ شاڭسورعىشتارى 50 كەلى سالماق تارتاتىن).

شاڭسورعىش قورعاسىنمەن قاپتالعان توڭكەرىلگەن شەلەككە ۇقسايتىن، وعان شۆابراعا ۇقساس اعاش سابى جالعاناتىن. تۇتقاسىندا داكەدەن قاپ ورناتىلىپ، وعان شاڭ ۇيىلەتىن بولعان، ال ونىڭ سىرتى ساتەنمەن قاپتالادى. وندىرۋشىلەر بۇل شاڭسورعىشتىڭ ەدەننەن شاڭدى جاقسى تازالاپ قانا قويماي، ونى شاش كەپتىرۋگە دە تاپتىرماس قۇرال دەپ جارنامالادى.

اكسەل ۆەننەر-گرەن — Electrolux شۆەد كومپانياسىنىڭ نەگىزىن قالاۋشى 1912 جىلى شاڭسورعىشقا اۋا ناسوسىن ەمەس، جەلدەتكىش ورناتۋدى ۇسىنادى، وسىدان كەيىن تۇرمىستىق زاتتىڭ سالماعى 14 كەلىگە دەيىن ازايدى.  دەگەنمەن تاريح ساحناسىنا Model V شاڭسورعىشى شىقتى، بۇل ۇلگى 9 جىلدان كەيىن، ياعني 1921 جىلى شىعىپ، كومپانياعا الەمدىك داڭق اكەلدى.

سونىمەن، حح عاسىردىڭ سوڭىنا دەيىن تۇرمىستىق زاتتى وندىرۋمەن اينالىساتىن بارلىق كومپانيا دوڭگەلەكشەلەرىمەن جۇرەتىن، سورعى ششەتكاسى بار، كومپلەكتىسىندە بىرنەشە المالى-سالمالى قوندىرماسى بار يىلگىش شلانگا جالعانعان مەتالل ءسيليندرىن كوشىرىپ شىعارىپ كەلدى. حح عاسىردىڭ ەكىنشى جارتىسىنداعى تەحنولوگيا عانا شاڭسورعىشتاردىڭ جاڭا تۇرلەرىن ويلاپ تابۋعا سەبەپ بولدى، ماسەلەن: جۋاتىن، ورناتىلاتىن، سۇرىپتاۋدىڭ كوپساتىلى جۇيەسى بار شاڭسورعىشتار جانە روبوت-شاڭسورعىشتار.

---