شارمەڭ
قازاقتىڭ ءبىر وقىعان جىگىتى جۇرىمباي اۋىلعا وكىل بولىپ كەلدى. ول ءار كۇنى جاتاردا ءۇيىقتاي الماي ءار نارسەنى ءبىر ويلاپ، بىردەن بىرگە ءتۇيىلىپ، ويعا سۇڭگي بەرەتىن ادەتى ەدى. سونان سوڭ الدەبىر نارسەنى شىعارىپ كەلسە دە، كەلمەسە دە ءوزىم تاپقان جاڭالىعىم دەپ ايتىپ ماقتانىپ جۇرەتىن. ناق وسىنداي ءبىر كۇنى وي تۇبىنە جەتە الماي جاتقاندا ەرتەڭ كولحوزدىڭ شارۋاشىلىق مەڭگەرۋشىسىندە جۇمىسى بارى ەسىنە ءتۇسىپ، وعان قالادان الدەبىر ناۋقانعا جەتىسپەي جاتقان بولشەكتى الىپ كەلۋى كەرەكتىگىن ۇسىنباق بولدى.
— ءاي، وسى زاۆحوزدىڭ ءوزى ءبىر سالاقتاۋ ادام ەكەن، — دەپ ويلادى. شىنىندا دا جۇرىمبايدىڭ ويلاعانىنداي ول ءارى سالاقتاۋ، ءارى ساۋاتى شامالى قارا توكپەك ادام بولاتىن. جۇرىمباي دامىلسىز ويلاي بەردى.
— يا، يا، زاۆحوز، زاۆحوز! زاۆحوزى نەسى وسىلاردىڭ؟— دەپ ويلادى ول،— زاۆحوز. «زاۆەدۋششيي حوزيايستۆوم» دەگەن ءسوز توي ورىسشا. ونى نەگە قازاقشالاۋعا بولمايدى؟ نەمەنە بارىنە جەتكەن قازاق ءتىلى وسىعان جەتپەي، وسىنى اۋدارا الماي قالىپ پا!؟ زاۆەدۋيۋششيي — مەڭگەرۋشىسى، ال حوزيايستۆوم — شارۋاشىلىعىن، سوندا تۋرا اۋدارما «مەڭگەرۋشىسى شارۋاشىلىعىن» بولىپ شىعادى. جوق-جوق. ورىستار زاۆەدۋيۋششيي حوزيايستۆوم دەپ تۇتاس ايتسا كوزى كورمەپ پە! سوندىقتان زاۆحوز دەگەندەي ونى دا قىسقارتۋ كەرەك قوي. تاپتىم، تاپتىم. العاشقى بۋىنداردى الامىن. «مەڭشار!» جو-جوق. بۇل دا تەرىس. الدىمەن انىق قازاقشىلاپ الۋ كەرەك. «مەڭگەرۋشىسى شارۋاشىلىعىن» دەگەن بولمايدى. «شارۋاشىلىق مەڭگەرۋشىسى!» مىنە ناعىز قازاقشا، قاتىپ كەتتى. ەندى قىسقارتۋىم كەرەك. سوندا بۇل العاشقى ايتقانىمداي «مەڭشار» ەمەس، «شارمەڭ» بولادى. وي پالە! ءاي، جۇكەڭنىڭ باسى جۇمىس ىستەيدى-اۋ! جارايسىڭ، جۇكە، جارايسىڭ. شىنىندا، وسى تۇبىندە قازاقتىڭ ءقارامزينى مەن بولىپ كەتىپ جۇرمەيىن.
تاڭەرتەڭ وكىل قىرمان باسىنا كەلدى. ول قولىنداعى جۇگەنىن كولحوزدىڭ شارۋاشىلىق مەڭگەرۋشىسىنە بەردى. ءسويتىپ:
— شارمەڭ! ات اكەل،—دەدى. اناۋ جۇگەندى العانىمەن جاقتىرماعانداي ءبىر قاراپ قويدى. ول ءبىر نارسەگە كۇيبەڭدەپ ءالى دە كەتە قويمادى. سوندىقتان وكىل ەكىنشى بىرەۋدى جۇمسادى. ونىڭ «جۇگەنىڭىز قايدا» دەگەن سۇراعىنا جۇرىمباي:
— شارمەڭگە بەردىم،— دەدى: اناۋ تۇسىنە الماي اڭىرىپ تۇرىپ قالدى. جۇرىمباي قايتا ايتتى: شارمەڭگە بەردىم، شارمەڭگە.
— كىمگە؟
— شارمەڭگە!
وسى كەزدە كولحوزدىڭ شارۋاشىلىق مەڭگەرۋشىسى تۇتەپ «ءا، اكەڭنىڭ اۋزىن... ءوزىڭ شارمەن،»..— دەپ جۇگەنمەن جۇرىمبايدى سالىپ كەتتى.
You Might Also Like
-
تويباي دەگەن ءبىر قىزمەتكەر كۇندە كىزمەتتەن ەرتە كەتە بەرەتىن بولىپتى. سوڭعى كۇندەرى ونىڭ مۇنىسى ادەتكە اينالىپتى. ءتىپتى كۇندەگىدەن كۇندە جۇمىس ورنىنان ەرتە جينالا باستادى. بۇل تارتىپسىزدىكتى كۇندە ...
