InfoHub Logo

ءتىل ۇيرەنۋدىڭ، ءوزىمىز ويلاپ تاۋىپ العان قيىندىقتاردان باسقا ەش قيىندىعى جوق. كاتو لومب - ەڭ العاشقى سينحروندى اۋدارماشىلاردىڭ ءبىرى، ول 16 ءتىل بىلگەن. تومەندە كاتو لومبتىڭ شەت ءتىلىن ۇيرەنگىسى كەلەتىندەرگە قىسقا ءارى نۇسقا كەڭەستەرىن كەلتىردىك.

1. جاڭا ءتىل ۇيرەنۋ ءۇشىن ول تىلمەن كۇندە اينالىسۋ كەرەك. اسىرەسە تاڭەرتەڭگى ۋاقىتتار پايدالىراق بولادى. ۋاقىت جەتپەي جاتسا، ءتىپتى 10-15 مينۋت ءبولىپ، بىرنارسە وقۋ كەرەك نەمەسە وتكەن سوزدەردى قايتالاۋ كەرەك.

2. ءتىل ۇيرەنۋگە دەگەن قۇلشىنىس تەز باسەڭسىپ قالا بەرەتىن بولسا، ءوز-وزىڭىزدى جالىقتىرمايتىن ءبىر ءتاسىل ويلاپ تابىڭىز. مىسالى ۇيرەنىپ جاتقان تىلىڭىزدە مۋزىكا تىڭداڭىز، فيلم قاراڭىز، كىشكەنە دەمالىپ سەرۋەندەپ قايتىڭىز، سودان كەيىن ءارى جالعاستىرىڭىز. ءبىراق، ەشقاشان تاستاپ كەتپەڭىز.

3. سوزدەردى بىر-بىرلەپ جاتتاماڭىز. ماتىندەپ، ياعني سويلەمدەپ جاتتاۋعا تىرىسىڭىز. مىسالى «strong wind»، ءبىر ءسوزدى ەسىڭىزگە تۇسىرگەندە ەكىنشى ءسوز ءوزى اۆتوماتتى تۇردە كەلەدى.

4. سويلەمدەردى جازىپ ءجۇرۋدىڭ، جانە ولاردى كوپ قولدانۋعا تىرىسۋدىڭ پايداسى زور.

5. كورگەن نارسەڭىزدىڭ بارلىعىن ىشتەي اۋدارىپ ءجۇرىڭىز. مىسالى كوشەدەگى جارنامالاردىڭ ماتىندەرىن، ولەڭدەردىڭ سوزدەرىن، گازەت ماقالالارىنىڭ تاقىرىپتارىن ت.ب. بۇل ميدى جاتتىقتىرادى، جاتتالعان سوزدەر قولدانىس تابا باستايدى.

6. كىشكەنتاي ماتىندەردى، ديالوگتاردى جاتتاپ الۋ پايدالى. ءبىراق جاتتاعان ءماتىننىڭ دۇرىس، ياعني قاتەسىز جازىلعانىنا كوز جەتكىزىڭىز.

7. قولدانىستاعى فرازەولوگيالار مەن ءسوز تىركەستەرىن دە مىندەتتى تۇردە جازىپ الىپ، جاتتاپ الۋ كەرەك. 

8. شەت ءتىلىن وقشاۋدا ۇيرەنۋ وتە قيىن. ءتىل ۇيرەنۋ ءۇشىن بارلىق تاسىلدەردى قولدانۋ كەرەك. ۇيرەنىپ جاتقان تىلىڭىزدە فيلم كورىڭىز، كىتاپ وقىڭىز، سول تىلدەگى باسىلىمداردى، ينتەرنەت رەسۋرستاردى وقىپ تۇرىڭىز نەمەسە سول تىلدە سويلەيتىن ادامدارمەن تىلدەسىڭىز.

9. قاتەلىكتەن قورىقپاڭىز، تۇزەتىلمەگەن قاتەلىكتەن قورقىڭىز. ەشنارسەنى تەكسەرۋسىز قالدىرماڭىز، ۇيرەنگەن نارسەڭىزدىڭ دۇرىس ەكەندىگىنە جاقسىلاپ كوز جەتكىزىڭىز.

10. ءسىز بۇل ءتىلدى ۇيرەنىپ الاتىنىڭىزعا كامىل سەنىڭىز. سوندا سان ساپاعا اۋىسىپ، ۇيرەنىپ جاتقان تىلىڭىزدە بەلگىلى ءبىر دارەجەگە جەتەسىز.

---