InfoHub Logo

 

شىمكەنتتە ەكى مەكتەپ ديرەكتورى اشىق كونكۋرسپەن تاعايىندالدى. مەكتەپ ديرەكتورلارىن تاعايىنداۋ ءىسى قالا اكىمى عابيدوللا ءابدىراحىموۆتىڭ تىكەلەي قاداعالاۋىندا.

ءبىلىم ۇياسىنىڭ باسشىلارىن اشىق كونكۋرس ارقىلى ىرىكتەۋ تۋرالى ويىن قالا باسشىسى تامىز كەڭەسىندە ايتقان بولاتىن. وسىعان وراي عابيدوللا ءابدىراحىموۆتىڭ توراعالىعىمەن ەىنشى رەت قالالىق ءبىلىم بولىمىنە قاراستى №118 كوكبۇلاق جالپى ورتا مەكتەبى مەن №71 جالپى ورتا مەكتەبى ديرەكتورلارىنىڭ بوس لاۋازىمدىق قىزمەتىنە اشىق كونكۋرس وتكىزىلدى.

العاشقى سىناق بويىنشا وبلىس ورتالىعىنداعى ەكى ءبىلىم ۇياسى باسشىلىعىنا ۇمىتكەرلەر تاڭدالدى. ۇمىتكەرلەردى ديرەكتورلىق قىزمەتكە تاعايىنداۋدىڭ جاڭاشا ءۇردىسى، ەڭ الدىمەن، سىبايلاس جەمقورلىقتىڭ الدىن الۋ ءۇشىن تاپتىرماس ءتاسىل.

تاعى ءبىر وڭتايلى تۇسى – ديرەكتورلىق لاۋازىمعا ءوز ءىسىنىڭ بىلگىرلەرى عانا تاڭدالىپ الىنادى. مۇنداي تاجىريبە تۇستىكتە تۇڭعىش رەت قولدانىلىپ وتىر. كوميسسيا مۇشەلەرى مۇنداي سۇزگىدەن ءوتىپ بارىپ تاعايىندالعان ديرەكتور كادر ساپاسىنا جەڭىل-جەلپى قارامايتىنىن ايتىپ ءوتتى.

مەكتەپ ديرەكتورلىعىنا ۇمىتكەر

العاشقى سىن بويىنشا №71 جالپى ورتا مەكتەبىنىڭ باسشىلىق لاۋازىمىنان 6 ۇمىتكەر كوميسسيا قابىلداۋىنا قاتىستى. سولاردىڭ ىشىنەن مەكتەپ ديرەكتورلىعى لاۋازىمىنا ورىنباي قامىسبايەۆ لايىق دەپ تانىلدى.

ال №118 جالپى ورتا مەكتەبىن باسقارۋعا 2 ۇمىتكەر كەلىپ، بىلىكتىلىگى، باسشىلىق قابىلەتى جاعىنان ءابۋ قالمۇرات ابەن ۇلى وسى لاۋازىمعا لايىق دەپ تانىلدى.

ۇمىتكەرلەردىڭ جەكە-جەكە قازاقستان رەسپۋبليكاسىنىڭ زاڭدارىن قانشالىقتى بىلەتىنى، قۇقىقتىق نورماتيۆتىك قۇجاتتار، ۇجىمدى باسقارۋداعى، وقۋ ادىستەمەلىك پروسەسىن جاقسارتۋ جولىنداعى بىلىكتىلىگى ساراپقا سالىندى.

قالا اكىمى باسپا ءسوز قىزمەتىنىڭ حابارلاۋىنشا، بۇعان دەيىن مەكتەپ ديرەكتورلارى ءبىلىم باسقارماسىنىڭ ۇيعارىمىمەن عانا تاعايىندالاتىن. شاھار باسشىسى الداعى ۋاقىتتا قالاداعى مەكتەپتەردىڭ بارلىعىنا باقىلاۋ جۇيەسىن ەنگىزەتىنىن جەتكىزدى.

http://www.otyrar.kz

---