InfoHub Logo

وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ شىمكەنتتەگى ءبىرقاتار نىسانداردا بولىپ، ونداعى اتقارىلىپ جاتقان جۇمىستارىمەن تانىستى، دەپ حابارلايدى وبلىس اكىمدىگىنىڭ باسپا ءسوز قىزمەتى.

ەڭ الدىمەن ايماق باسشىسى «اگروبيزنەس 2020» باعدارلاماسى بويىنشا ىسكە اسىرىلعان كوكونىس وسىرەتىن «SMG Greenhouse profit» جشس-نىڭ جىلىجاي كەشەنىن ارالاپ كوردى. ءتورت گەكتاردان استام اۋماقتى قۇرايتىن وندىرىستىك كەشەن تۇرىك جانە گوللانديا مەملەكەتىنەن اكەلىنگەن قۇرال جابدىقتارمەن قامتىلعان.  زامان تالابىنا ساي سوڭعى ۇلگىدەگى جىلىجايدا جىلىنا 1 مىڭ توننادان استام قيار وندىرلۋدە.

سەرىكتەستىك ماماندارىنىڭ ايتۋىنشا، مۇندا بۇگىندە اپتاسىنا 29-30 توننا كوكونىس ونىمدەرى جينالىپ، قازاقستان مەن رەسەيدىڭ ەكاتەرينبور،ومبى وبلىستارىنىڭ نارىعىنا شىعارىلۋدا. سونداي-اق، ولار بۇگىندە 45 ادام ەڭبەك ەتەتىن اۋىل شارۋاشىلىعى كەشەنىنىنىڭ كولەمىن تاعى دا 4 گەكتارعا ۇلعايتۋدى جوسپارلاپ وتىرعانىن جەتكىزدى.

جىلىجاي جۇمىسىمەن، مۇندا ەڭبەك ەتەتىن جۇمىسشىلاردىڭ جاعدايىمەن تانىسقان وبلىس اكىمى وندىرىلەتىن ءونىمدى ەڭ الدىمەن ىشكى نارىققا، سوسىن شەكارالاس جاتقان وزبەكستان مەن قىرعىزستان مەملەكەتىنە ەكسپورتتاۋ جايىن قاراستىرۋدى، جۇمىسشىلاردىڭ جالاقىسىن مۇمكىندىگىنشە جوعارلاتۋدى تاپسىردى.

ساپارى بارىسىندا ءوڭىر باسشىسى ەلىمىزدەگى وندىرىستىك تاجىريبەسى جوعارى «ستاندارت سەمەنت» جشس-نىڭ جۇمىسىن كوردى. اتالعان كاسىپورىن - وندىرىستىك قۋاتتىلىعى جىلىنا 2 ملن توننا سەمەنت شىعاراتىن قازاقستانداعى جالعىز ءىرى زاۋىت. كاسىپورىندا ەكولوگيالىق تالاپتاردى ساقتايتىن زاماناۋي قۇرىلعىلار ورناتىلعان. وسىلايشا قورشاعان ورتاعا ەشقانداي زيان كەلتىرمەستەن ۇلكەن كولەمدە جانە جوعارى ساپالى سەمەنت ءوندىرىپ كەلەدى.

بۇگىنگى كۇنى 1 100-دەن استام ادام ەڭبەك ەتەتىن كومپانيادا جىل سايىن جۇمىس ورىندارىنىڭ سانى ارتىپ كەلەدى. سونىمەن قاتار، كاسىپورىن ءوڭىردىڭ الەۋمەتتىك-ەكونوميكالىق وسۋىنە ءوز ۇلەستەرىن قوسۋدا.

اكىم باستاعان جۇمىسشى توپ شىمكەنت قالاسىنىڭ اكىمشىلىك-ىسكەرلىك ورتالىعىندا سالىنىپ جاتقان 8 مىڭ ورىندىق مەشىتتىڭ قۇرىلىسىن ارالاپ كوردى. مەشىت كەشەنىندە اۆتوكولىك قويۋعا ارنالعان پاركينگ، كۇننەن قۋات الاتىن قۇرىلعىلار قويىلادى. مەشىت الدىنداعى ون مىڭنان استام ادامعا ەسەپتەلىنگەن الاڭدا جاماعاتتى كۇننەن، جاۋىن-شاشىننان قورعاۋ ءۇشىن شاتىر بولىپ اشىلاتىن جۇيە قويىلادى. مۇندا سونىمەن قاتار، مۇسىلماندىق جورالاردى جاسايتىن ورىندار، كونگرەسس-حولل، تاماقتانۋعا ارنالعان زال، نەكە سارايى، يسلامدىق ءبىلىم بەرۋ ورتالىعى، مەدىرەسە، كىتاپحانا مەن اكىمشىلىك بولمەلەر سالىنادى.

وسى كۇنى ج.تۇيمەبايەۆ يننوۆاسيالىق - تەحنولوگيالىق كوللەدجىندە بولىپ، وقۋ ورنىنىڭ جۇمىس بارىسىمەن تانىستى. كوللەدجدە بۇگىندە 9 ماماندىق بويىنشا جالپى 970 ستۋدەنت ءبىلىم الادى. ال مۇنداعى 122 ستۋدەنت 4 ماماندىق بويىنشا 2011 جىلدان بەرى دۋالدى وقىتۋ جۇيەسىنىڭ ەكسپەريمەنتتىك رەجيمىندە ءبىلىمىن شىڭداۋدا.

وقۋ ورنىنىڭ تىنىس-تىرشىلىگىن بايانداعان كوللەدج ديرەكتورى شىمكەنت قالاسىنداعى «بوزارىق» شاعىناۋدانى اۋماعىنان بوي كوتەرەتىن «قازاق يننوۆاسيا» ۋنيۆەرسيتەتىنىڭ ماكەتىمەن تانىستىردى. جاڭا ۋنيۆەرسيتەت قالاشىعىنا بۇگىندە 150 گەكتار جەر ءبولىنىپ، ساۋلەتتىك-قۇرىلىس جوباسى بەكىتلگەن. 10 مىڭ ستۋدەنتكە شاقتالىپ سالىناتىن جوعارعى وقۋ ورداسىندا  مەديسينا، حيميا-تەحنولوگيا، جوعارعى بيزنەس مەكتەبى باعىتتارى بويىنشا ءبىلىم بەرەتىن بولادى.  سونداي-اق، وقۋ ورنى اۋماعىنان تۇرعىن ۇيلەر سالىنىپ، الەۋمەتتىك نىساندار سالىنادى.        

---