شىمكەنتتىك ءمۇعالىم ديرەكتوردىڭ تەپكىسىنە شىداي الماي نازاربايەۆتان اراشا سۇرادى
ساباق ۋاقىتىندا ءۇي ارالاۋعا ءماجبۇر بولىپ قانا قويماي، مەكتەپ باسشىلىعىنىڭ «تەپكىسىنەن» قىسىم كورگەن شىمكەنتتىك ءمۇعالىم ەلباسىدان اراشا سۇرادى دەپ حابارلايدى وڭىردەگى NUR.KZ ءتىلشىسى.
شىمكەنتتەگى ن.وڭداسىنوۆ اتىنداعى №38 مەكتەپتەن شۋ شىقتى. ءبىلىم ۇياسىنىڭ ءمۇعالىمى گۇلجان سالىمبايەۆا ار-نامىسىم تاپتالىپ، دەنساۋلىعىما زيان كەلدى دەپ باسشىلىقتى ايىپتاپ وتىر. وقيعاعا تۇرعىنداردىڭ سوتتالعانى، سونىمەن قاتار جۇمىسسىز ازاماتتار مەن قىلمىس جاساپ، ىزدەۋدە جۇرگەندەر تۋرالى مالىمەت جيناۋى ءۇشىن ءۇي ارالاۋ جۇمىستارىنا جەگىلۋى سەبەپ بولعان.
وقىتۋشىنىڭ ايتۋىنشا، ءساۋىر ايىندا ءبىلىم ۇياسىنىڭ مۇعالىمدەرى سول ماڭداعى تۇرعىن ۇيلەردى ارالاپ، ءتىزىم جاساپ شىعۋى قاجەت بولعان. تاپسىرمانى ورىنداعان گۇلجان سالىمبايەۆا 8 ساۋىردە (اۆتور: ۇستازدىڭ ساباعى جوق سەنبى كۇنى) اناسى قاتتى اۋىرىپ، اۋىلىنا كەتۋگە ءماجبۇر بولىپتى. سول ساتتە ديرەكتوردىڭ ورىنباسارى تەلەفون شالىپ، بەرىلگەن تاپسىرماسىن سۇراپ، مەكتەپكە تەز كەلۋىن تالاپ ەتەدى.
الايدا اۋىلىنان كەلە الماعان ونى دۇيسەنبى كۇنى مەكتەپ ديرەكتورى كابينەتىنە شاقىرىپ الىپ، قاسىنداعى ورىنباسارلارىمەن بىرگە ۇستازدى جەردەن الىپ، جەرگە سالىپ، نامىسىنا تيەتىن اۋىر سوزدەر ايتقان. ءبىر قىزىعى، مۇعالىمدەردىڭ ءۇي ارالاۋى تۋرالى تاپسىرمانى وبلىس اكىمىنىڭ ءوزى تىكەلەي تاپسىرعان ەكەن.
«10 ساۋىردە مەنى ديرەكتوردىڭ كابينەتىنە الىپ كىردى. مەنىڭ ءسوزىمدى تىڭداماستان، ابدەن سوكتى. ديرەكتوردىڭ ورىنباسارى «شاقىرعان كەزدە نەگە كەلمەيسىڭ سەن؟ بۇل بىزگە وبلىس اكىمىنەن كەلىپ تۇسكەن تاپسىرما. قالالىق ءبىلىم ءبولىمى تاپسىرىپ وتىر» دەپ قاتتى ۇرىستى. ءسويتىپ تاعى ءبىر تاپسىرما بەرىپ، ەكى كۇن قاتارىنان تۇنگى ساعات ون بىرگە دەيىن ءۇي ارالاپ، تۇرعىندار تۋرالى مالىمەت جينادىم. ءتىزىمدى وتكىزگەن سوڭ ساباعىم بولماسا دا سەنبى كۇنى مەنىڭ جۇمىسقا كەلمەۋىمە بايلانىستى تۇسىنىكتەمە جازدىردى»، - دەدى اشىنعان وقىتۋشى.
ءدال سول كۇنى ءمۇعالىمنىڭ دەنساۋلىعى كۇرت ناشارلاپ، قان قىسىمى كوتەرىلگەن. الايدا باسشىلىق ونىڭ بۇل ارەكەتىن وتىرىككە بالاپ، قىسىم كورسەتۋىن جالعاستىرا بەرىپتى.
«كابينەتتە ەس-تۇسسىز قۇلادىم. سول ساتتە ديرەكتوردىڭ ەكى ورىنباسارى كەلىپ، «بۇل وتىرىك اۋىرىپ جاتىر. تۇر ورنىڭنان، وتىرىك جاساما» دەپ بۇيىرىمنەن تەپتى. ونى ارىپتەستەرىم دە كوردى. ەڭ سوراقىسى، مەنىڭ ەسىمنەن تانىپ جاتقانىمدى باسشىلىق ۆيدەوعا ءتۇسىرىپ الىپتى. ەسىمدى جيناعانىممەن سويلەۋگە شامام كەلمەدى.
ارىپتەستەرىمنىڭ ءبىرى جەدەل جاردەم شاقىردى. قان قىسىمىم 170/120 بولىپ كوتەرىلىپتى. سوندا دا ديرەكتوردىڭ ورىنباسارى دارىگەرلەرگە "قالدىرىپ كەتىڭىزدەر، ءوزىمىز ۇيىنە اپارىپ سالامىز" دەدى. ءبىراق ولار مەنىڭ جاعدايىمنىڭ اۋىر حالدە ەكەنىن ايتىپ، اۋرۋحاناعا الىپ كەتتى» دەگەن ءمۇعالىم وسى جاعدايدان كەيىن ەرتەڭىنە جۇمىسقا شىققانىن ايتتى.
بۇدان كەيىن تاعى دا قان قىسىمى كوتەرىلىپ، تۋرا مەكتەپ عيماراتىنىڭ سىرتىندا ەسىنەن تانىپ قۇلاپ قالعان. بۇل جولى دا جەدەل جاردەم قىزمەتى كەلگەن. وسى جاعدايدان كەيىن ۇستاز دەنساۋلىعىنا بايلانىستى ەڭبەك دەمالىسىنا شىعىپ، 17 كۇن ەم قابىلدايدى.
وسى ارالىقتا ەلىمىزدىڭ باس پەداگوگى ەرلان ساعادييەۆتىڭ اتىنا شاعىم تۇسىرەدى. تەكسەرۋ كەلگەنىمەن، ناتيجە بولماعان سوڭ ءمۇعالىم ەلباسى نۇرسۇلتان نازاربايەۆتان اراشا سۇراعان ۆيدەوۇندەۋىن عالامتورعا سالادى.
بۇل جاعدايدان سوڭ قالالىق ءبىلىم ءبولىمىنىڭ باسشىسى ونى كابينەتىنە شاقىرىپ، ۆيدەونى ءوشىرۋىن سۇرايدى. ءتىپتى ديرەكتور ول ارەكەتى ءۇشىن كەشىرىم سۇراۋعا دا دايىن ەكەنىن جەتكىزەدى. الايدا نامىسىم تاپتالىپ، وقۋشىلار الدىندا ءقادىرىم كەتتى دەگەن ول ءوز قۇقىعىن زاڭ الدىندا قورعايتىنىن، كەشىرىم بەرمەيتىنىن ايتقان.
ديرەكتور «ۆيدەونى وشىرمەسەڭ، اتا-انالارعا سەنىڭ ۇستىڭنەن شاعىم تۇسىرەمىن» دەپ قوقان-لوققى كورسەتىپتى.
«ءبىلىم ءبولىمى باسشىسىنىڭ قابىلداۋىنان سوڭ مەنى اتا-انالار جينالىسقا سالدى. مەكتەپ اكىمشىلىگى بولسا تۇسىنەمىن. ءبىراق اتا-انالار مەنى نە ءۇشىن جينالىسقا سالۋى قاجەت؟ باسشىلىق وقۋشىلاردى دا ماعان قارسى قويىپ قويعان» دەگەن ءمۇعالىم مينيستر اتىنا جولدانعان شاعىمىنان سوڭ ەڭبەك ينسپەكسياسىنداعىلار ونىڭ ارىزىن ىشكى ىستەر ورگاندارىنا جولداعانىن ايتتى. ءبىراق شەندى قىزمەتكەرلەردەن ءالى جاۋاپ جوق.
سەگىز جىلدان بەرى اتالعان مەكتەپتە وقىتۋشى قىزمەتىن اتقارىپ كەلە جاتقان شىمكەنتتىك تۇرعىن ءبىلىم ۇياسىنداعى ۇستازداردىڭ نەگىزسىز جۇمىسقا ءجيى جەگىلىپ، ءتىپتى مەرەكەلىك شارالاردا الاڭعا شىعۋعا مىندەتتى بولىپ كەلگەنىن دە جايىپ سالدى.
«تۇسىنىكتەمە جازىپ بەرگەن سوڭ ماعان تيىسۋلەرىن توقتاتپادى. ساباعىما كىردى. ءۇي ارالاپ جۇرگەن مەنىڭ داپتەرلەرىم، ارينە، تەكسەرۋسىز قالدى. «ساباققا دايىن ەمەسسىڭ، ساباق بەرە المايسىڭ» دەپ تاعى شىقتى. نەگىزى بىزدە جىلدىڭ سوڭىنا قاراي باسشىلىق تاراپى مۇعالىمدەرگە ءتيىسۋىن باستايدى. ءوز ەركىڭمەن جۇمىستان كەتپەسەڭ، «باپپەن» جۇمىستان شىعارامىز دەپ قورقىتادى.
ونى ەشكىم اشىپ ايتا الماعانىمەن، راسىمەن دە سولاي. «قانشا شاعىم تۇسىرسەڭدەر دە ديرەكتوردىڭ اكەسى بيلىكتە وتىر، كۇيەۋى دە قىزمەتتە. قولدارىڭنان تۇك كەلمەيدى» دەپ ديرەكتور ورىنباسارلارى ۇستازداردى ابدەن باسىنىپ العان. مىندەتىمىزگە جاتپايتىن جۇمىستاردى جاساتادى. ەگەر ورىنداساماق، تۇسىنىكتەمە الدىرىپ، شارا كورەدى»، - دەدى گۇلجان سالىمبايەۆا.
قىسىمنان شارشاپ، جان-ايقايىن جەتكىزگەن وقىتۋشى كىنالىلەر ءتيىستى جازالارىن السا دەيدى.
بۇل ماسەلەگە قاتىستى پىكىر الۋ ءۇشىن شىمكەنت قالالىق ءبىلىم ءبولىمىنىڭ باسشىسى جانات تاجييەۆاعا حابارلاستىق. قالاداعى باس پەداگوگ تاجييەۆا حانىم №38 مەكتەپتەگى جاعداي بويىنشا ارنايى كوميسسيا قۇرىلىپ، بۇگىنگى تاڭدا زەرتتەۋ-زەردەلەۋ جۇمىستارى ءجۇرىپ جاتقانىن ايتتى.
«كوميسسيا جۇمىس جاساپ جاتىر، ءالى اياقتالعان جوق. ءمۇعالىم سالىمبايەۆانى ارنايى شاقىرىپ، سويلەسكەنىم راس. سەبەبى ەكەۋى دە ءبىزدىڭ قازاقستاننىڭ ازاماتى، ءوز قۇقىقتارىن قورعاي الادى. مەنىڭشە بۇل ديرەكتور مەن وقىتۋشى اراسىنداعى داۋ-داماي سياقتى... ەندى مەن كىنالى مىناۋ دەپ كەسىپ ايتا المايمىن.
تولىق زەردەلەۋدى قاجەت ەتەدى. مەكتەپ باسشىلىعى ءمۇعالىمنىڭ ايتقان ۋاجدەرىمەن «كەلىسپەيمىن» دەپ ۇستىنەن سوتقا شاعىم ءتۇسىردى. باسشىلىق «ۇرعان دا جوقپىن، سوققان دا جوقپىن» دەپ وتىر. دالەلدەرى دە بار»، - دەگەن ءبىلىم ءبولىمىنىڭ باسشىسى ۇستازدارعا ءۇي ارالاۋ تۋرالى تاپسىرمانىڭ بەرىلمەگەنىن ايتتى.
You Might Also Like
-
اقمولا وبلىسىنىڭ ارشالى اۋدانىنا قاراستى تۇرگەن اۋىلىندا 11-سىنىپتى جالعىز وقۋشى ءبىتىرىپ شىقتى، دەپ 31 ارنا حابارلايدى.
-
ۇرپاعى ءبىلىمدى حالىقتىڭ بولاشاعى بۇلىڭعىر بولمايدى دەگەندەي، جاس ۇرپاققا سانالى، ءمان-ماعىنالى، ونەگەلى تاربيە مەن ءبىلىم بەرۋ بۇگىنگى كۇننىڭ تالابى. شەتەل ءتىلى ءبىزدىڭ مەملەكەتىمىزدىڭ حالىقارالىق باي...
