InfoHub Logo

قوعامدىق سانانى جاڭعىرتۋ باعدارلاماسىن ىسكە اسىرۋ بويىنشا ۇلتتىق كوميسسيانىڭ وتىرىسى بارىسىندا ءبىلىم جانە عىلىمي ءمينيسترى ەرلان ساعادييەۆ «جاڭا گۋمانيتارلىق ءبىلىم، قازاق تىلىندەگى جاڭا 100 وقۋلىق» جوباسىن ىسكە اسىرۋ بارىسى جايلى ايتتى.

«جوو جانە عزي عالىمدارى، قوعام قايراتكەرلەرى، جەتەكشى ساياساتكەرلەردىڭ اراسىنان قازاق تىلىنە اۋدارۋ ءۇشىن وقۋلىقتاردى ىرىكتەيتىن جۇمىس توبى قۇرىلدى. ءبىرىنشى وتىرىستا «جاڭا گۋمانيتارلىق ءبىلىم، قازاق تىلىندەگى جاڭا 100 وقۋلىق» جوباسىنىڭ اياسىندا وقۋلىقتاردى ىرىكتەۋ بويىنشا ءىس-قيمىل جوسپارى تالقىلاندى»، - دەپ حابارلادى ۆەدومستۆو باسشىسى.

ونىڭ اقپاراتىنا سايكەس وقۋلىقتاردى ىرىكتەۋ كريتەرييلەرى ايقىندالدى. سونىمەن، وقۋ قۇرالى گۋمانيتارلىق ءپان: تۇركولوگيا تاقىرىبىن قوسقاندا، تاريح، فيلوسوفيا، ساياساتتانۋ، الەۋمەتتانۋ، پسيحولوگيا، مادەنيەتتانۋ، فيلولوگيا، پەداگوگيكانى قامتۋى قاجەت. سونداي-اق بازالىق وقۋلىقتار الەمنىڭ 100 الدىڭعى قاتارلى جوو-دىڭ ءبىلىم بەرۋ باعدارلامالارىنا سايكەس بولۋى ءتيىس. بەلگىلى باسپالار (مىسالى، Cengage Learning) بازاسىندا بولعانى ماڭىزدى. وقۋلىقتاردى بەيىندى قاۋىمداستىقتار، سونداي-اق باسقا ەلدەردىڭ بىلىكتىلىكتى ارتىرۋ ينستيتۋتتارى - «ورلەۋ» اق ارىپتەستەرى ۇسىنۋى ءتيىس.

ءبىلىم ءمينيسترىنىڭ ايتۋىنشا، وقۋلىقتار مىندەتتى تۇردە 2014 جىلدان بەرى قايتا شىعارىلعان جانە مازمۇنى تەك قانا شولۋ ماتەريالدارىنا نەگىزدەلگەن بولۋى كەرەك.

«بۇگىندە جوو ۇسىنىستارى نەگىزىندە باستاپقى تىزىمدە 800 وقۋلىق بار. وڭدەلگەن كريتەرييلەرگە سايكەس ولاردى جۇمىس توبى ىرىكتەيدى. 7 وقۋلىق تاڭدالىپ، حالىقارالىق قۇقىق يەلەنۋشىلەرمەن كەلىسسوزدەر دە باستالىپ كەتتى، ونىڭ 4ء-ىن 2017 جىلدىڭ سوڭىنا دەيىن اۋدارۋدى جوسپارلاپ وتىرمىز.

بۇل وقۋلىقتار: «ەكونوميكا قاعيداتتارى»، «سوسيولوگيا نەگىزدەرى»، «باتىس فيلوسوفياسىنىڭ جاڭا تاريحى»، «وزگەرىپ جاتقان الەمدەگى سوسيولوگيا»، - دەپ اتالادى دەدى ساعادييەۆ.

ونىڭ ايتۋىنشا، 2018 جىلعى ناۋرىزدىڭ اياعىنا دەيىن ءۇش وقۋلىقتى اۋدارۋدى اياقتاۋ جوسپارلانۋدا. بۇلار «زامناۋي پسيحولوگيا تاريحى»، «ءبىلىم الۋعا جانە مىنەز-قۇلىق كىرىسپەسى»، «ونەر تاريحى». جوبا وپەراتورى - «ۇلتتىق اۋدارمالار بيۋروسى» كوممەرسيالىق ەمەس قوعامدىق قورى.
.

---