InfoHub Logo

1948 جىلى ماي ايىنىڭ اياق كەزىندە قاراعاندى قالاسىندا كيروۆ جانە ستالين اتىنداعى كومىر ترەستەرىنىڭ تاڭداۋلى كەنشىلەرىنىڭ ءماسليحاتى ءوتتى. ءماسليحاتقا ۇكىمەت ادامدارى قاتىستى. كيروۆ كلۋبىنىڭ كەڭ زالىنا كىلەم، كورپە توسەلدى. قوناقتارعا قازاقشا قوناقاسى بەرىلدى. وعان ءىلياس، قايىپ اقىندار دا قاتىستى. اڭگىمە قىزا كەلە قايىپ اقىن ولەڭدەتىپ سويلەدى. ول — جينالىسقا قاتىسىپ وتىرعان قۇرمەتتى شاحتەر، سوسياليستىك ەڭبەك ەرى No18 «بيس» شاحتاسىنىڭ اتاقتى ناۆالوتبويششيگى ساكەن شومانوۆقا قاراپ بىلاي دەدى:

— ساكەن، تۇر وتانىنا تارتۋ تارتىپ،
وزىنە ۇستەمەلى مىندەت ارتىپ،
«بەرىك سەرت — ساكەڭ سەرتى» بەرگەن كوپكە
كومىردى شىعارۋعا تاعى دا ارتىق.
اتقارىپ تالاي قيىن ءىستى باستان،
قيالاپ تاس قامالدى اتتاپ اسقان.
ءسوز بەردىم باتىر شاحتەر شومانوۆقا
ەرلىگى اقىندارعا بولعان داستان.

شومانوۆ ءوزىنىڭ شاحتادا 20 جىلدان ارتقان ەڭبەك ەتىپ كەلە جاتقانىن تانىستىرا كەلىپ، ۇنەمى ستاحانوۆشى بولىپ كەلە جاتقانىن ايتتى. بيىلدىڭ وزىندە وسى وتكەن بەس ايدىڭ ىشىندە ون ايلىق نورمانى ورىنداعاندىعىن جانە 15-20 جاس جۇمىسشىلارعا ءوز تاجىريبەسىن ۇيرەتەتىندىگىن ايتتى. «شاحتەر كۇنىنە دەيىن زور تابىسپەن بارامىز» دەپ ءسوزىن اياقتادى.

وسى ءماسليحاتقا قاتىسىپ وتىرعان ساكەڭنىڭ سىيلاس ادامدارىنىڭ ءبىرى ءىلياس ساكەڭنىڭ ءسوزىن ولەڭمەنەن جالعاستىرا سويلەدى.

— ءاي، ساكەن-اي! ءبىر سوزبەن ايتقاندا بىلاي دەمەيتىن بە؟ — دەپ.

— بۇل كۇندە شالقىپ جاتقان كوڭلىم كولدەي،
تاسيدى، قيمىلداسام، كومىر سەلدەي.
جۇلدە العان سەرىكتەرىم جەبەگەندە،
شىعامىن شىرقاپ العا بايگە بەرمەي! — دەپ ولەڭدەتىپ قويا بەردى.

 

---