InfoHub Logo

شۆەيساريالىق مەكتەپتەر ءبىلىم ساپاسى بويىنشا فينليانديالىق مەكتەپتەردەن ەش كەم تۇسپەيدى. مۇنداعى ءبىلىم بەرۋ جۇيەسى – وزىندىك ەرەكشەلىكتەرگە تولى. بالالاردىڭ ءبىلىم الۋىنا بارلىق جاعداي جاسايتىن شۆەيساريالىق مەكتەپتەردە قولدانىلاتىن ەرەكشە ادىستەر كىمدى دە بولسىن تاڭ قالدىرىپ، قىزىقتىراتىنى انىق.

1. ساباق ءبىر جارىم ساعاتتىق بلوكتار بويىنشا وتەدى. ولاردىڭ اراسىندا 20 مينۋتقا سوزىلاتىن ءۇزىلىس بار. بۇل ۋاقىتتا بالالار مىندەتتى تۇردە دالاعا شىعىپ، اسىر سالا وينايدى. شۆەيساريالىق مەكتەپتەردەگى ءار سىنىپتىڭ الدىندا ءوز تەرراساسى بار. بالالار ءۇزىلىس ۋاقىتىندا تەراساعا شىعادى. مەيلى جاڭبىر جاۋسىن، مەيلى كۇن سالقىنداسىن، مىندەتتى تۇردە ءۇزىلىس ۋاقىتىن سول جەردە وتكىزەدى. اۋا رايى اشىق كۇندەرى مۇعالىمدەر مەن وقۋشىلار بىرگە فۋتبول، باسكەتبول، پينگ-پونگ وينايدى. ال ويىن ويناۋعا زاۋقى سوقپاعان بالالاردى دارىگەر باقىلاۋىنا الادى.

2. ساعات 11:30-نان تۇسكى 13:30-عا دەيىن تۇسكى ءۇزىلىس. بۇل ۋاقىتتا وقۋشىنىڭ مەكتەپتە قالۋىنا نە ۇيگە قايتۋىنا بولادى. سوندىقتان بالالار مۇلدەم شارشامايدى. تاڭەرتەڭ ساباق 8:15-تە باستالىپ، 16:00-عا دەيىن جالعاسادى. ال سارسەنبى كۇنى وقۋ ۋاقىتى قىسقارتىلعان. ياعني ساباق 11:30-عا دەيىن عانا جالعاسادى.

3. بالالار جازباشا تۇردە ويىن بىلدىرۋدەن قورىقپاس ءۇشىن، مەكتەپتە «ۇستاز – وقۋشى» اتالاتىن پوشتا قاراستىرىلعان. ءار وقۋشىنىڭ ءوز پوشتا جاشىگى بولادى. وندا حاتىن قالدىرعان وقۋشىعا ءمۇعالىم مىندەتتى تۇردە جاۋاپ بەرەدى. بۇل ءادىس وتە ءساتتى ۇيىمداستىرىلعان – تاڭەرتەڭ بارلىق وقۋشى ءوز حاتىن الۋعا اسىعادى.

4. سوزدىك ديكتانت سۋرەت استىنا جازىلادى. ياعني وقۋشى قانداي دا ءبىر ءسوزدى بىلدىرەتىن سۋرەت استىنا سول ءسوزدى دۇرىس جازۋى قاجەت. وسىلايشا بالا ءسوزدىڭ دۇرىس جازىلۋىن سۋرەتپەن بايلانىستىرۋ ارقىلى ەستە ساقتايدى. بۇل ءادىستىڭ تيىمدىلىگى – وتە جوعارى.

5. وقۋشىلار بايانداما جاساعان كەزدە بالانىڭ قالاعان اۋەنى قوسىلادى. بايانداما جاسايتىن وقۋشىدان كوستيۋم جانە بايانداماعا قاجەتتى زاتتار، رەكۆيزيتتەر تالاپ ەتىلەدى. ياعني بالا بايانداماسىن قىسقاشا سپەكتاكل تۇرىندە جەتكىزەدى. بايانداما جاساۋ ءۇشىن Power Point پرەزەنتاسياسىنىڭ قاجەتى جوق. شۆەيساريالىق مۇعالىمدەردىڭ پىكىرىنشە، باستاۋىش مەكتەپ بالالارى وزدىگىنەن پرەزەنتاسيا جاساي المايدى.

6. ماتەماتيكا ساباعىندا ءمۇعالىم ەسەپتىڭ شىعارىلۋ جولىن تۇسىندىرمەيدى. بالا جيعان ءبىلىمىنىڭ نەگىزىندە ەسەپتى قالاي وڭاي شىعارۋعا بولاتىنىن ويلاپ تابۋى ءتيىس. مىسالى، 48 بەن 53ء-تىڭ قوسىندىسى نەشە بولاتىنىن تاقتا الدىنا شىعىپ، تۇسىندىرەدى. ەسەپتى شىعارۋدىڭ دۇرىس ءادىسى جوق. ءار وقۋشى ەسەپتى وزىنە ىڭعايلى ءادىس بويىنشا شىعارادى. ياعني ءوز ادىسىمەن.

7. وقۋشىلار زاتتاردىڭ بارلىعىن قولمەن ۇستاپ كورەدى. ياعني قورشاعان ورتا قولمەن ۇستاپ، بايقاپ كورۋگە ارنالعان. وقۋشىلار ساباقتا بيداي، قارابيداي، س ۇلىنىڭ ءدامىن تاتىپ كورىپ، ارتىنان داندەردى ۇگۋ ءۇشىن ديىرمەنگە جول تارتتى. ونداعى قىزمەتكەرلەر بالالر اكەلگەن داننەن ۇن جاساپ، تاياۋ ارادا ول ۇننان توقاش ءپىسىرىپ، مەكتەپكە اكەلىپ بەرۋگە ۋادە ەتتى. ال گەوگرافيا قانداي جەرگىلىكتى ايماق ءسوز بولسا، ءمۇعالىم وقۋشىلاردى ايتىلعان جەرگە الىپ بارادى. «ءوز قولىمىزبەن جاسايمىز» ساباعىنا بولىنگەن ۋاقىت دەنە شىنىقتىرۋ ساباعىمەن بىردەي. مەكتەپ بۇل ەكى ءپان اپتا ىشىندەگى ساعات سانى بويىنشا كوش باستاپ تۇر.

8. شۆەيساريالىق مۇعالىمدەردىڭ پىكىرىنە سايكەس، قاتەلىك – جەتىستىككە باستار جول. مۇنداعى بالالارعا قاتەلەسۋدىڭ دۇرىس ەكەندىگىن جانە ول ءۇشىن ۋايىمداۋعا بولمايتىنىن تۇسىندىرەدى. سەبەبى قاتەلىك جىبەرۋ ارقىلى كرەاتيۆتى ويلاۋعا ۇيرەنىپ، بايقاپ كورۋدەن قورىقپايسىڭ.

9. ەگەر وقۋشى 2 اپتادان ۇزاق ۋاقىت ساباقتان قالسا عانا دارىگەردەن انىقتاما تالاپ ەتىلەدى. ءبىراق مۇنداي جاعدايدا بالا بەرىلگەن تاپسىرمانىڭ بارلىعىن ۇيدە جاساۋى ءتيىس.

10. باستاۋىش مەكتەپ – مۋنيسيپالدىق جانە مۇلدەم تەگىن. وقۋ قارقىنى باياۋ، الايدا وقۋ باعدارلاماسىنىڭ رەسەيلىك باعدارلامادان ايتارلىقتاي ايىرماشىلىعى جوق.

---