سىبىردىڭ سيقى
6-كلاسس وقۋشىسى ساقبەرگەن ساباق وقىماي، ىلعي كوشەدە وينايدى دا جۇرەدى. قاي جەردە بالالار ويناعان، ادام كوبىرەك جينالعان جەر بولسا ساقبەرگەندى ناق سول جەردەن تاباسىن. ءبىراق ساباقتى ويىن سياقتى جاقسى بىلمەيدى. ءمۇعالىم ساباق سۇراعاندا ول سۇراقتىڭ باسقى ەكى ءسوزىن ايتادى دا، بەدىرەيىپ تۇرىپ الادى. نە بۇگىن قولىم تيمەي وقي الماپ ەدىم دەمەيدى، نە بىلمەيمىن دەمەيدى. ويلاعان بولىپ اۋزىن جىبىرلاتا بەرەدى. كەيدە جان-جاعىنداعى بالالاردىڭ ءوزارا سويلەسكەن سىبىرىنا قۇلاق سالادى.
ءمۇعالىم جاڭا ساباق تۇسىندىرگەندە ول قالتاسىنان شولاق باكىسىن شىعارىپ الادى دا، ساقبەرگەن دەگەن اتىن پارتاعا ويىپ جازا باستايدى. بۇرىن ونىڭ «ساق» دەگەنى بىتكەن، ەندى «بەرگەنى» قالعان. كەيدە قالتاسىنان نانىن الىپ، ءۇزىپ جەپ، مالجاڭداپ وتىرادى.
بالالار ونى قابىرعا گازەتىنە دە جازىپ قويدى:
ساقبەرگەن،
تاماق دەسە تاپ بەرگەن،
وقۋ دەسە جالت بەرگەن...
فيزيكا ساباعىنان بۇرىن ساقبەرگەننىڭ «قاناعاتتانارلىق» دەگەن عانا باعاسى بار ەدى. ونىڭ ءوزىن دە كىتاپتان كوزى تۇسكەن جەرىن وقىپ بەرىپ العان بولاتىن. ەندى بۇگىن كەزەك كەلىپ قالا ما دەپ قىپىلداپ كەلەدى. ول پارتادا قاسىندا، ارتىندا وتىراتىن بالالارعا كەيدە جالىنىپ، كەيدە قودىراڭدىپ وزىنە سىبىرلاپ جىبەرۋدى، نە كىتاپتان كورسەتىپ وتىرۋدى سۇرايتىن. بۇگىن ول جانىندا وتىراتىن مەرگەنگە قىر كورسەتىپ كەلىپ ەدى.
مىنە، فيزيكا ءمۇعالىمى كىرىپ كەلدى. جىل باسىنان بەرگى ساباقتى قايتالاۋ ءجۇرىپ جاتقان كەز. بالالاردى تۇگەندەپ بولعان سوڭ ءمۇعالىم ساقبەرگەندى ورنىنان تۇرعىزىپ:
— فيزيكا دەگەن نە؟ — دەپ سۇراق قويدى. ول ىشىنەن باعانا مەرگەنگە قىر كورسەتكەنشە جالىنباعان ەكەم دەپ ويلادى.
ساقبەرگەن باعانادان بەرى فيزيكانى ءوزى-اق اشىپ قوياتىن ەدى، سۇراقتىڭ قاي جەرىنەن كەلەتىنىن بىلمەدى. ونىڭ قاسىنداعى مەرگەن دەرەۋ الدىنداعى كىتاپتى الدى دا، اشقان بولىپ پارتانىڭ استىنا تاستاي سالدى، ءسويتىپ گەومەتريانى الىپ، اشىپ باقبەرگەننىڭ الدىنا قويدى جانە قولىمەن نۇسقاپ ءبىر ءسوزدى كورسەتتى. ساقبەرگەن وقي بەردى:
— «گەو دەگەن گرەكتىڭ جەر دەگەن ءسوزى، مەتريا دەگەن ولشەۋ دەگەن، جەر ولشەۋ دەگەن ءسوز...»
بالالاردىڭ كوبى سىقىلىقتاپ كۇلىپ جيبەردى دە، ءبىرازى تىمىرايىپ قالدى، ال مەرگەن ءوزىنىڭ جولداسىنا ىستەگەنىنە ۇيالعانداي قىزارىپ كەتتى.
ناق وسى كەزدە ارتقى پارتادان ءبىر سىبىر شىقتى دا، ساقبەرگەن قۇلاعىن سوعان توستى. ءمۇعالىم شىدامدىلىقپەن تىڭداپ وتىر: «دوعال بۇرىش توقسان گرادۋسقا تەڭ بولادى». ساقبەرگەن قاعىپ الدى:
— دوعال بۇرىش توقسان گرادۋسقا تەڭ بولادى.
بالالار ءبىر سوزدەن ايتا باستادى:
— فيزيكادا.
ساقبەرگەن: — فيزيكادا
بالالار:— دوعال
ساقبەرگەن: — دوعال.
بالالار: — بۇرىش.
ساقبەرگەن: — بۇرىش.
بالالار:— بولا ما؟
ساقبەرگەن: — بولا ما؟
ءمۇعالىم دە، بالالار دا شىداي المادى، ءبارى دۋ كۇلكىنى قويىپ بەردى.
ءمۇعالىم :
— ونى ءوزىڭ ايتشى. فيزيكادا دوعال بۇرىش بولا ما؟ — دەدى. ساقبەرگەن نە ايتقانىن ەندى ۇعىنعانداي مويىنى سالبىراپ كەتتى. بالالار جاپپاي قولىن كوتەردى. ساقبەرگەن سىبىردىڭ ءوزىن قايدا اكەتكەنىن ەندى عانا سەزدى. بالالاردىڭ جاپپاي كوتەرگەن قولىن كورىپ، ساقبەرگەن پارتانىڭ استىنا تىعىلىپ قالعىسى كەلدى...
You Might Also Like
-
الماتىدان كەلگەن وكىل ن. وبلىسىنىڭ ءبىر تۇكپىرىندەگى «اۆانگارد» كولحوزىنىڭ ماگازينىنىڭ الدىنا كەلگەندە باسىندا قاراكولدەن تىگىلگەن كاۆكازدىق بوركى بار، ۇڭىرەيگەن ۇزىن بويلى، وراق مۇرىن ب...
-
ەركىن ۇلكەن ءتورت قابات ۇيدە تۇراتىن. ءبىر كۇنى ونىڭ ۇيىنە اۋىلداعى اعاسىنىڭ قولىندا تۇراتىن قارت شەشەسى كەلدى. ارادا بىرەر كۇن ەتكەن سوڭ قارت ءىشىم پىستى كەتەمىن دەپ الەك سالدى. سوندا شەشەسىن كوپتەن ...
