توعىزىنشى سوت
ساۋلەت ونەرىنىڭ ءبىر مامانى ساپاق ايىپكەر ورىندىعىندا وسىمەن توعىزىنشى رەت وتىر. ول بىرەۋدىڭ باسىن جارىپ، كوزىن شىعارىپ شەكتەن شىققان قىلمىسپەن نەمەسە مەملەكەتكە قانداي بولسىن ءبىر زيان كەلتىرگەندىكتەن وتىرعان جوق. ول سوت الدىنا ۇنەمى ايەل ماسەلەسىمەن كەلۋشى ەدى.
العاشقى ايەلىندە ونىڭ ءبىر بالاسى كەتتى. ساپاق ايەلىنەن اجىراسقالى بەرى ونىڭ كىزمەت ورنى ءتورت رەت وزگەردى. سول ءتورت رەتتە دە ول بارلىق ۋاقىتتا ايەلىمەن سوتتاسپاي بالاسىنا اليمەنت تولەمەدى. تۇڭعىش رەت ايەلى ونى سوتقا بەرگەندە ونىڭ جالاقىسى ءجۇز سوم ەدى. ايەلى ءجۇزدىڭ تورتتەن ءبىرىن كەستىرىپ الدى. سالدەن كەيىن-اق، ونىڭ قىزمەت ورنى وزگەرىپ، سول مەكەمەدە جوعارىراق ستولعا جىلجىپ وتىرعان بولاتىن. بۇل كەزدە ونىڭ جالاقىسىنا تاعى ءبىر ەلۋ سوم قوسىلىپ ەدى. العاشقى ايەل ەكىنشى سوتتان جيىرما بەس پروسەنتتى العاننان كەيىن، ىلە ءۇشىنشى سوتقا شاقىرىلدى. ويتكەنى ساپاق ەكىنشى ايەلىمەن دە اجىراسىپ، وندا ءبىر بالاسى كەتىپ، ءۇشىنشى سوت بولدى. مۇنىڭ ءوزى قيىنداۋ ەدى. ءبىر ايەلدە ەكى بالاسى كەتسە، وعان وتىز ءۇش پروسەنت اليمەنت بەرۋشى ەدى. ال جەكە-جەكە ايەلدەگى ەكى بالاعا نە ىستەرىن بىلمەي سوتتىڭ ءوزى قاتتى ساستى. سونان سوڭ ويلاپ وتىرىپ، ەكى ايەلدەگى ەكى بالاعا وتىز ءۇش پروسەنتتى ءبولىپ قايتا بيلىك شىعاردى. ىلە-شالا ساپاق قايتا كىزمەت ورنىن وزگەرتتى.
ساپاقتىڭ كىزمەت ورنىنىڭ وزگەرگەنىن بىلگەن العاشقى ايەلى قايتا سوتقا بەرىپ اليمەنتتى بۇرىنعىدان ءسال كوبەيتىپ الىپ كوڭىلى قۇرعىردى تىنىشتاندىرىپ ەدى. ونىڭ ارتىنان ەكىنشى ايەل دە سوتتاسىپ ول دا ءوز سىباعاسىن الدى. بۇل ەكەۋى ەندى جانىمىز تىندى دەپ وتىرعاندا ءۇشىنشى ايەل ساپاقپەن اجىراپ، سوتتاسىپ، بارلىق ءىستىڭ استان-كەستەنىن شىعاردى. ويتكەنى بۇرىن ەكى'ايەل تابىستىڭ وتىز ءۇش پروسەنتىن السا، ەندى ءۇش ايەلگە ەلۋ پروسەنتى بولىنەتىن بولدى. بۇدان العاشقى ەكى ايەلگە قاراجات جاعىنان كەلەر-كەتەر بولماعانىمەن سوت ورىنداۋشىسى قايتا-قايتا شاقىرىپ مازاسىن الدى. ونىڭ ۇستىنە بۇرىن مۇراگەر ەكەۋىمىزدەگى ەكى بالا عانا عوي دەپ، العاش سوتتاسقاندا الاكوز بولعانىمەن كەيىن ءۇشىنشى ايەلگە قارسى ءبىر مايدان قۇرعان ەكەۋىنىڭ زارە قۇتى قالمادى. امال نە، سوت ساپاقتىڭ سوتتاسۋ ءىسىن تاعى جەتىنشى رەت قاراپ، جەتىنشى رەت كوزىنە شۇقىپ، ساپاقتى سوتتاي، سوتتاي ابدەن قاجىعانىن ايتا وتىرىپ بيلىك شىعاردى. ءتىپتى حالىق سوتى شىن تىلەك ءبىلدىرىپ «ەندى وسى بايىپتى بولعاي» دەپ سالدى.
ارادا از كۇن وتكەن سوڭ ساپاق ۇيلەنىپتى دەگەن ءسوز دۇڭك ەتە ءتۇستى. ودان كوپ ۇزاماي-اق قىزمەت ورنى جوعارىلاپ، ونىڭ ۇستىنە ءبىر ينستيتۋتقا ساباق بەرەتىن بولىپ بارلىق جالاقىسى ءۇش ءجۇز سومعا كوتەرىلدى. وسى كەزدە بۇرىنعى ءۇش ايەل سوتقا بەرىپ، ءبىراق سوت ساپاق ىسىنە ماماندانىپ، تاجىريبەسى مولايىپ بارىنە ءبىر-اق سوت — سەگىزىنشى سوت قۇردى. ءسويتىپ ساپاق ءۇش ءجۇزدىڭ جارتىسىن بەpiپ ۇيىنە قايتتى.
ءبىر كۇنى ساپاقتىڭ ءتورتىنشى ايەلىنەن بالا تۋدى. توعىزىنشى سوتتى ءوزى جاساتتى. ايەلى ايەلدەر بوساناتىن ۇيدەن كەلگەن كۇنى-اق ساپاق اڭگىمەنى باستادى:
— كۇلايحان،— دەدى ول، ايەلىنە قاراپ،— سەن ەكەۋمىزدىڭ ءبىر بالامىز بار. ەندى مەن سەنەن دە اجىرايمىن.
ايەل بۇعان قاتتى شوشىپ كەتتى.
— نەگە؟
— نەگەسى سول، اناۋ ۇشەۋى ءجۇز ەلۋ سومدى بەكەر ءبولىپ جەپ جاتىر. مەن ولارعا ونى تۇگەل جەگىزگىم كەلمەيدى.
— ە، سول ءۇشىن مەنىمەن اجىراماقپىسىڭ؟
ساپاق ءسال ويلانىپ وتىردى دا:
— سەن وسى ۇيدە قال. مەن سەنەن اجىراعان بولامىن. ازىرگە مەيمانحاناعا كەتەم.
از كۇننەن كەيىن ساپاق ءتورتىنشى ايەلىمەن سوت الدىندا اجىراستى. بۇرىنعى ءۇش ايەلگە بولىنەتىن ءجۇز ەلۋ سوم ەندى ءتورت ايەلگە ءبولىندى. ەرتەنىنە-اق ساپاق كۇلايحانعا قايتا جەتىپ كەلدى. نەكەسىز تۇرسا دا قىرىق سومنىڭ ۇيگە ارتىق كەلگەنىنە ايەلى دە قاتتى قۋاندى. ال كورشىلەرى:— ارىڭ قايدا، ولار دا بالان ەمەس پە؟— دەپ ەدى، وعان ساپاق:
— ارىڭ نە، ارىڭنان اقشام قىمبات، ار دەگەن ماعان اقشا بولا الا ما؟ —دەپ جاۋاپتى كەلتە قايىردى.
You Might Also Like
-
وبلاتكوم پرەدسەداتەلى ورىنبەتوۆ كەش الدىندا اۋدان ورتالىعىنداعى مەيمانحاناعا كەلىپ توقتادى. بۇل اۋدان ورتالىعى ۇلكەن پوەزد جولىنىڭ تورابى جاندىاعاش دەگەن ستانسيا ەدى. سوندىقتان مۇندا ۇنەمى ءبىر پوەز...
-
شاعان بويىنىڭ ءبىر قازاعى ومبى اينالىپ، كوكشەتاۋعا كەلەدى. كوكشەتاۋدا ءبىر ۇيگە ءتۇسىپ قونادى. ءبىر كەزدە قاراس كەرەگەدە قولدان شاپقان قاز مويىن قوڭىر دومبىرا ءىلۋلى تۇر ەكەن.
