InfoHub Logo

سىرىم جاس ءوسپىرىم بالا كۇنىندە-اق قوي باعۋدى قويىپتى. جىگىتتىك داۋىرىنە جەتىسىمەن حان، بيلەردىڭ كەڭەسىندە بولىپ، بيلىككە كىرىسىپ ءسوز ايتپاعانمەن، ءسوزىن تىڭداپ وتىرۋعا قۇمار بولىپتى.

ءبىر كۇنى حاننىڭ ورداسىندا ءبىر جۇمىسپەن جينالىپ وتىرعان قازاقتاردىڭ بىرەۋلەرى حاننىڭ ءىلۋلى تۇرعان ىشىگىن كورىپ:

«جارىقتىق، بۇل نەندەي اڭنىڭ تەرىسى ەكەن؟!» — دەپ تاڭىرقاسادى. سوندا حان وتىرعاندارعا جەكىرىپ: «اتاڭا نالەت قازاق دەگەن نەتكەن كورگەنسىز حالىقسىڭدار، ءبىر تىشقاننىڭ تەرىسىنە سونشا نەگە ەستەرىڭ كەتتى؟» — دەيدى. سىرىم سول جەردە حاننىڭ سوزىنە شىداي الماي ۇشىپ تۇرا كەلىپ:

— ياپىرم-اي، مىنا سارتتىڭ تاسۋىن قارا، قازاقتى اياعىنا باسۋىن قارا! قۇداي تاعالا 6666 اياعى، 114 باسى بار ءبىر ماقۇلىق جاراتتى، سەن سونى بىلەمىسىڭ؟ ءۇش كۇننىڭ ىشىندە وسى ءسوزدىڭ ماعىناسىن تاپ، ەگەر تاپپاساڭ، باسىڭدى الامىن، — دەپتى دە، دويىرىن تابالدىرىقتان شۇباتىپ، ۇيدەن شىعا جونەلىپتى.

سىرىم ءار جاقتاعى تاۋباي دەيتىن بيدەن اقىل سۇراپتى: «نۇرالى حان سولاي دەدى، مەن بىلاي دەدىم» دەپ. سوندا تاۋباي: «حان تاسقان ەكەن، ونى شاپپاق كەرەك» دەپ اقىل ايتىپتى. سونان سوڭ نۇرالى حاننىڭ ۇلىن ۇرىمعا، قىزىن قىرىمعا جىبەرىپ، سىرىم باتىر شاۋىپ الىپتى. نۇرالى قاشىپ ۋفاعا تىعىلىپ، اقىرىندا سوندا ءولىپتى. سىرىم باتىر وتىز ءتورت جاس شاماسىندا نۇرالى حاندى شاپقان سەبەپتى ۇكىمەت تاراپىنان جەر اۋدارىلىپ، ونان امان-ەسەن كەلگەن سوڭ، حانعا قارسى كۇرەستى بۇرىنعىدان دا كۇشەيتە ءتۇسىپتى.

وقۋعا كەڭەس بەرەمىز:

جىلقىنىڭ تورىسى كوپ پە، توبەلى كوپ پە؟ (ءى نۇسقا)

سىرىمنىڭ نۇرالى حاندى شابۋى (ءىى نۇسقا)

بايماعامبەت سۇلتان مەن سىرىم باتىر

---