InfoHub Logo

انانىڭ ۇلى اسكەرگە كەتكەن ەدى. ول ەكى جىلدىق اسكەري مەرزىمىن وتەۋى كەرەك بولاتىن. ودان حات ۇزبەي كەلىپ تۇردى. سولداتتىڭ ۇقىپتاپ وتىرىپ جازعان حاتىنىڭ سىرتى دا، ءىشى دە اناسىنا باعىتتالاتىن. سولدات ءوز حاتىندا اناسىنا ۋايىمدايتىن ەشتەڭە دە جوق ەكەندىگىن، اسكەر جايىندا ايتىلاتىن الدەبىر الىپقاشپا سوزدەردىڭ بەكەر ەكەنىن، ونداي جاعدايلار وزگە ءبىر اسكەري بولىمدەردە بولسا بولۋى مۇمكىن، ال ءوزى قىزمەت ەتىپ جۇرگەن جەردە جاعداي مۇلدە باسقاشا ەكەندىگىن جازاتىن. مۇمكىن ول مۇنى اناسى ۋايىمداماسىن دەپ جازاتىن شىعار.

بىردە انانىڭ ۇلىنان حات كەلدى. ادەتتە سولداتتان حات كەلگەندە، ءۇي ءىشى القا-قوتان وتىرا قالىپ، حات داۋىستاپ وقىلاتىن ەدى. بۇل جولى دا سولاي بولدى. كونۆەرت اشىلدى. حات قولعا الىندى. ءبىراق بۇل جولعى جاعداي مۇلدە باسقاشا ەدى. كونۆەرتتىڭ ىشىنەن سولداتتىڭ ءوز حاتى ەمەس، الدەبىر ايباق-سايباق جازۋى بار جارتى پاراق تانىسۋ حاتى شىقتى. حات وقىعالى وتىرعان ءۇي ىشىندەگىلەر اۋەلدە اڭىرىپ قالدى، سونان سوڭ حاتتىڭ مازمۇنىن كورىپ دۋىلداسىپ كۇلىپ جىبەردى:

- ال كەرەك بولسا! شەشەمىزگە اسكەردەن تانىسۋ حات تا كەلىپ ۇلگەردى.

ءبىراق انا بۇعان كۇلگەن جوق. ول كونۆەرتتىڭ ىشىنەن شىعاتىن ءوز ۇلىنىڭ حاتىن اسىعا كۇتىپ وتىر ەدى. ەندى ونىڭ ىشىنەن ۇلىنىڭ حاتى ەمەس، وزگە ءبىر قاعاز شىققاننان كەيىن كوڭىلى ءبىر ءتۇرلى قوڭىرايىپ قالدى. انالاردىڭ ۇمىتىمەن ويناۋعا بولمايدى عوي.

سالدەن كەيىن ءۇي ءىشى مىنا حاتقا پايىم جاساي باستادى:

- دەمەك، ۇلىڭ كونۆەرتتىڭ سىرتىن الدىنا الا تولتىرىپ قويعان بولىپ شىقتى. مۇمكىن ول مۇنى اسكەردە داعدىعا اينالدىرىپ العان شىعار. حات جازامىن دا، سىرتى تولتىرىلىپ دايىن تۇرعان كونۆەرتكە سالىپ جىبەرەمىن دەپ ويلاعان عوي. سول كونۆەرت جانىنداعى سولداتتىڭ قولىنا تۇسەدى. ول بۇرىنعى انالاردىڭ فاميليا رەتىندە ءوزىنىڭ جۇبايىنىڭ فاميلياسىن قابىلدايتىندىعىن، ءسويتىپ، ءوزىنىڭ ۇل-قىزدارىمەن فاميليالاس بولىپ كەلەتىندىگىن ەسكەرمەگەن. مۇنى قارىنداسى شىعار دەپ ويلاعان. وسىدان كەلىپ وزىنشە تانىسۋ حات جازىپ كورمەك بولىپ ازىلدەگەن ءتۇرى عوي. ۇلىڭ بۇل جونىندە حابارسىز. مۇمكىن ول جوعالعان كونۆەرتكە ءمان دە بەرمەگەن شىعار.

انا ايتتى:

- بۇل جونىندە بالاما حابارلاپ جازىپ جۇرمەڭدەر. وسى ءۇشىن جانىنداعى بالامەن شەكىسىپ قالىپ جۇرەر. ماعان بارىنەن دە الدىمەن بالامنىڭ اماندىعى قىمبات.

ارينە، بۇل جونىندە ەشكىم دە جازعان جوق. كوپ ۇزاماي انانىڭ ۇلىنىڭ ءوز حاتى كەلدى:

"سالەم بەردىك، اپا".

انانىڭ ۇلى اسكەردەن كەلگەننەن كەيىن: "اسكەردە ءتىپتى دە قيىندىق بولمايدى دەپ ايتا المايمىن. قيىندىق بولادى. ءبىراق سول قيىندىق تۋرالى حاتقا جازۋعا بولمايتىن ەدى. ولاي ەتسەم، ونى وقىپ اپام ۋايىمداپ قالادى عوي. جالپى، اسكەرگە بارامىن دەگەن جىگىت قارا جۇمىسپەن كوبىرەك شۇعىلدانىپ، سپورتپەن اينالىسىپ بارۋى كەرەك. سوندا عانا وعان اسكەردىڭ ءومىرى ءسال-پال جەڭىلدەۋ ءتيۋى مۇمكىن" دەيتىن.

بىردە انانىڭ ۇلىمەن اسكەري قىزمەتىن بىرگە وتەپ جاتقان جەرلەس جىگىتتىڭ اعاسى ىنىسىنە بارىپ قايتپاق بولادى. ول اناعا: "ءسىزدىڭ ۇلىڭىز بەن مەنىڭ ءىنىم اسكەري قىزمەتىن ءبىر جەردە وتەپ جاتىر عوي. مەن ىنىمە بارىپ قايتپاقپىن. ۇلىڭىزعا بەرىپ جىبەرەتىن سالەمدەمەلەرىڭىز بولسا، الا كەتەيىن"، - دەيدى.

انا انا زاتتى ءبىر ۇستايدى، مىنا دامنەن دە بەرىپ جىبەرگىسى كەلەدى. قالتانىڭ ءتۇرى كوبەيىپ بارا جاتىر. وسىنىڭ ءبارىن الگى جىگىت كورىپ وتىر. ال اسكەري بولىمگە بارۋ ءۇشىن وزگە رەسپۋبليكاعا جول ءجۇرۋ كەرەك. ەندى ءبىر كەزدە انا ءوزىنىڭ شاي ءىشىپ جۇرگەن ءبىر دوربا ناباتىن الا كەلدى. ناۋات دەگەننىڭ ءوزى دە ءبىر جەپ-جەڭىل دۇنيە ەمەس قوي. سوندا وسىنىڭ بارىنە قاراپ وتىرعان وسى ۇيگە ناعاشىلى-جيەندى بولىپ كەلەتىن الگى جىگىت:

- اپاتاي-اۋ، اسكەرگە نابات ارقالاپ بارۋدىڭ قاجەتى قانشا؟ ول جەردە ونسىز دا نابات ءوندىرىلىپ جاتقان جەر ەمەس پە؟ ءتىپتى ۇلىڭ ناباتتىڭ ورتاسىندا جۇرگەن شىعار؟ - دەيدى اسكەري ءبولىم ورنالاسقان قالانىڭ اتاۋى لەنيناباد قالاسى دەپ اتالاتىندىعىن مەڭزەي سويلەپ.

انانىڭ بۇل سوزگە ىشەك-سىلەسى قاتىپ كۇلەدى:

- بار بولعىرلار، قالجىڭدارىڭ قالمايدى-اۋ. الىپ كەت ناباتتى دا ۇلىما! جانىنداعى جولداستارىمەن ءبولىسىپ جەسىن.

انالار ءتىپتى دە ۋايىمشىل كەلەدى.

---