InfoHub Logo

ورتا ءجۇز قازاقتارى جوڭعار شاپقىنشىلىعىنان ءبىرجولا قۇتىلىپ، جەرلەرى جاۋدان تازارعان كەزدە، ابىلاي، تولە بي باستاعان قازاقتىڭ جاقسى مەن جايساڭدارى قالماق حاندىعىنىڭ تاعىنا وزدەرى ۇناتاتىن جانە قازاق حالقىنا ءىش تارتاتىن ءامىرسانا دەگەن نوياندى وتىرعىزباققا كۇش سالىپ كورىپتى. وسى ارەكەتتەردىڭ ىشىنە ەسكەلدى باتىر دا قاتىسىپ، نەشە دۇركىن قالماق ەلىنە بارىپ قايتىپ ءجۇرىپتى.

بۇل كەزدە ۇلى ءجۇز، ونىڭ ىشىندەگى جالايىرلاردىڭ جازعى جايىلىم-جايلاۋلارى جاۋدان تولىق تازارتىلا قويماعان ەكەن. جوڭعار قاقپاسىنا تايانعاندا ەسكەلدى حاننان رۇقسات سۇراپ، بيىك تاۋلار ءسارتور، سارىجازىق، تولەكتىڭ ءتورى اتتى جايلاۋلار ارقىلى الدى ىلە، ارتى شۋ بويىندا جاتقان ەلىنە قاراي بەت تۇزەيدى. شاعىن قولمەن تالاي قيىندىقتاردى كورىپ، قىزىلاۋىز دەگەن جەرگە جەتكەندە، سول ارادان ءبىر كوش بويى
جەردەگى تەرىسكەيدى الىپ جاتقان ەڭسەلى تاۋ مەن اعىندى وزەننىڭ باسىندا قالماقتاردىڭ جارتى مىڭداي قولىنىڭ جاسىرىنىپ جاتقانىن ەستيدى. ولاردى كورگەن ەسكەلدىلەردەن ءبولىنىپ، اڭ اۋلاي شىققان ءتاتتىباي مەرگەن ەكەن.

الدىمەن ەلشى سالىپ كورسە، قالماق قولىن باستاعان شاجا دەگەن نويان بولىپ شىعىپتى. ەسكەلدى ءوزىنىڭ ەكى جۇزگە تارتا شاعىن قولىن توبە-توبەلەردىڭ باسىنا تاراتىپ، «ارت جاعىمىزدا قالىڭ اسكەر» دەگەن ۇرەي تۋدىرىپتى. ۇلكەن تۇمەننەن ءبولىنىپ قالعان قالماقتار قازاقتاردان امان كەتۋدىڭ بىردەن-بىر جولى جەكپە-جەك دەپ ۇيعارسا كەرەك. ولار باسىنا بۇقانىڭ ءمۇيىزىن بايلاعان شاجا باتىردى شىعارىپتى. ەسكەلدى باتىر شويىن شوقپارىن سوندا ءبىرىنشى رەت جۇمساپ، شاجانى ءبىر سىلتەگەننەن-اق جان ءتاسىلىم ەتكىزىپتى دەيدى.

باتىرلارى ولگەن سوڭ، باسقالارى اتتارىنان ءتۇسىپ، تىزە بۇگىپتى. جەڭىلگەن مەن جىعىلعانداردى جۇدىرىقتاماۋ ول كەزدىڭ قاتاڭ عۇرپى ەكەن. ەسەكەڭ ەشبىر قالماققا ءزابىر كورسەتپەستەن، ەلىنە قايتارىپ تۇرىپ:

— باتىرلارىڭ سەندەر ءۇشىن مەرت بولدى. سوعىس دالاسىندا قازا بولعان مۇنداي جانداردى قازاقتار شەيىت دەيدى. ءمايىتىن ارقالاپ تەگى كەتە المايسىڭدار، ودان دا اق جاۋىپ، ارۋلاپ وسى اراعا جەرلەڭدەر. ءبىز مىنا تاۋ مەن وزەندى وسى باتىرلارىڭ نىڭ ەسىمىمەن شاجا دەپ اتايىق دەپتى، — دەيدى جارىقتىق.

---