سوڭعى قوڭىراۋ
سوڭعى قوڭىراۋعا ارنالعان سەناريي
ەگىن جيناپ، كەلگەندە سارى التىن كۇز،
قولىمىزعا گۇل شوعىن الاتىنبىز.
جۇرەكتەردى ءبىر نازىك سەزىم بيلەپ،
قول ۇستاسىپ مەكتەپكە باراتىنبىز!
«مەكتەبىم، اياۋلى مەكتەبىم!» ءانىنىڭ ءبىر شۋماعى ورىندالادى.
ءان اياقتالا سالىسىمەن ورتاعا ءبىر جىگىت اتىپ شىعىپ، اندەتە:
دوستار، دوستار، كەتسەك تە ءبىز ەسەيىپ،
بار قىزىعىن ءومىردىڭ ءبىر كەشەيىك؟
ءبىر قالادا وقيىق، الىس كەتپەي،
الماتىعا وقۋعا ءبىر جۇرەيىك؟
2-جىگىت:
الماتى — ارۋ قالا، ارمان قالا،
ول جاقتا وقيمىن - دەپ ارمانداما.
3-قىز:
نەسى بار، الماتىعا تۇسە الماساق،
تۇسەرمىز ءبىر وقۋعا استانادا!
4-جىگىت:
مەن ءوزىم انگلياعا كەتسەم دەيمىن،
ايتەۋىر ەۋروپاعا جەتسەم دەيمىن.
قالعىم جوق، مىنا ەلدە، مىنا جەردە،
قىسىلىپ زورعا ءجۇرمىن وكپەم مەنىڭ!
5-جىگىت:
مەن دە كەتەم، بۇيىرتسا مۇحيت اسىپ،
وقۋ وقىپ، جۇمىسقا ورنالاسىپ.
جاعدايىمدى تەزىرەك جوندەمەكپىن،
كوشەدە ءومىر سۇرسەم دە، اقشا تاۋىپ!
6-جىگىت:
توقتاڭدار، دوستار! ونسىز دا ءبىزدىڭ بار ءبىلىمدى جاستار شەت ەلدە ءجۇر! ال تەپسە تەمىر ۇزەتىن جىگىتتەر كورەيا، امەريكا، ەۋروپادا قارا جۇمىس ىستەپ ءجۇر. ەگەر بارلىعىمىز باقىتتى الىستان ىزدەپ، ءۇمىت كۇتىپ وتىرعان ەلدەن كەتە بەرسەك، كىم يە بولادى مىنا جۇرتقا؟!
7-قىز:
دوسىم-اۋ، ءالى پاتريوتتىعىڭدى قويماپسىڭ-اۋ؟! جارايدى ەلدە قالدىق دەلىك؟ نە ىستەيمىز؟! قايدا وقيمىز؟! قانداي مامان بولامىز؟ ءبىر جىلدا قانشاما وقۋ ورنى جابىلىپ قالدى؟!
8-قىز:
التىن بەلگى الۋ دا قيىنداپ كەتتى...؟!
9-جىگىت:
كوپتەگەن ماماندىق تۇرلەرى وزگەرىپ نەمەسە جابىلىپ قالدى!
10-قىز:
ەگەر وقۋعا تۇسە الماي قالساق، قايدا بارىپ وقيمىز؟! نە ىستەيمىز؟!
بارلىعى شۋىلداپ:
يا، راسىمەن دە؟! نە جۇمىس ىستەيمىز؟! قايدا بارامىز؟ قالاي ءومىر سۇرەمىز..؟!
1-جىگىت:
تىنىش! تىنىشتالىڭدار!
نە بولدى سونشا ۋايىمداپ؟! ەستەرىڭدە بولسىن! ءبىز — جاسپىز، سۇلۋمىز، ەنەرگيامىز كوپ! سوندىقتان بىزگە جۇمىس تابىلادى، ءبىلىم دە جەتەدى! تەك ۋاقىتتى ورنىمەن پايدالانىپ، دەر كەزىندە، قاجەتتى ءبىلىمدى وقىپ، ۇنەمى دامىپ وتىرساق بولعانى. مىسالى، سوڭعى بەس جىلدا بيزنەس كۋرستار قاتتى دامىپ، ونى وقىعاندار كوپ اقشا تابا الدى! ال ءقازىر ۋايلبەرس، كاسپيي سەكىلدى پلاتفورمالار دامىپ، بۇرىنعىداي جارناما جازۋدى ۇيرەتەتىن بيزنەس مەكتەپتەر قاجەت بولماي قالدى.
2-جىگىت:
راس ايتاسىڭ؟! ودان دا ەشقاشان سۇرانىستان قالمايتىن، ءبىر ماماندىق تاڭداۋ قاجەت؟!
3-قىز:
ال مەنىڭ ءمۇعالىم بولعىم كەلەدى. ءبىراق، بولاشاقتا مۇعالىمدەر ازايىپ، تەك جەتەكشى نەمەسە باعىتتاۋشى ماماندار عانا بولادى-دەپ ءجۇر ەلدەر...؟!
4-جىگىت:
ۋايىمداما، مۇعالىمدەر ۇنەمى قاجەت بولادى! اسىرەسە وڭتۇستىك پەن سولتۇستىك وڭىرلەرگە اۋاداي قاجەت بولۋدا!
5-جىگىت:
كوپ اڭگىمەنى قايتەسىڭدەر؟! جۇرىڭدەر مەنىمەن بىرگە امەريكاعا؟! ءبىراز اقشا تاۋىپ قايتامىز؟!
6-جىگىت:
قايدا كەتىپ باراسىڭ، قايران ەلىم؟!
بەرەكەنىڭ باستاۋى، قاينارى ەدىڭ؟!
جاستارىڭا جات جۇرتتار سۇقتانادى،
تەگىن ءبىلىم ۇسىنىپ، نەگە سەنىڭ...؟!
7-قىز:
جاتقا كەتكەن ارۋلار ازايماي تۇر،
كەيدە اشۋىم قاينايدى، قازانداي ءبىر.
وزگە ۇلتتى كوبەيتىپ كىندىگىڭنەن،
ءوز قولىڭمەن ءوشىردىڭ ۇلتتىڭ رۋحىن.
8-قىز:
ءجا، توقتاڭدار! نە بولدى قايعىرارداي؟
بۇل كۇيىمىز جاعار-اۋ، جاۋعا مايداي؟
«عىلىم» - دەگەن عاجايىپ تۇرعان كەزدە،
وركەندەيمىز، وسەمىز، كوككە سامعاي!
(وسى جەردە رۋحتى ءبىر اننەن ءۇزىندى شىرقالادى)
9-جىگىت:
سىنىپتاستار، نە بولعان بۇگىن بىزگە؟
بۇگىن ءسىرا، قايعىرار كۇنىمىز بە؟!
ۇستازدارعا مىڭ العىس انمەن ايتىپ،
قوڭىراۋدىڭ تىڭدايىق ءۇنىن بىرگە!
(«سوڭعى قوڭىراۋ» ءانى ورىندالادى.)
10-قىز:
قوڭىراۋ سوعىلدى سوڭعى رەت،
ۇستازدار قوشتاستى مولدىرەپ!
ءبىز ءۇشىن ەڭ قىمبات جاندارمەن،
قوشتاستىق، ەت جۇرەك ەلجىرەپ!
2-جىگىت:
اياۋلى مەكتەبىم سەن مەنىڭ!
وزىڭنەن ءنار الدىم، كوكتەدىم!
ۇيرەتكەن بار سىرىن عالامنىڭ،
ءدال سەندەي دانىشپان كورمەدىم!
3-قىز:
مىڭ العىس ايتامىز ۇستازعا،
بىلگەنىن ۇيرەتكەن ۇل-قىزعا!
ءومىرىن وتكىزگەن ءبىز ءۇشىن،
تالىمگەر اقىلدى جاندارعا!
4-جىگىت:
بىرگە وسكەن دوستاردى قيا الماي،
ءار جاققا ۇشامىز قيالداي...!
ۇمىتىپ كەتپەڭدەر جان دوستار،
كەزدەسىپ تۇرۋعا ءجيى الدا!!!
سىنىپ جەتەكشىلەرى سويلەيدى:
التى جىل بۇرىن قابىلداپ،
جەتەكشى بولعان سىنىبىم!
وزدەرىڭمەنەن وتكىزدىم...،
ءبىر ۇزىك ءومىر سىنىعىن!
ءار شاكىرت تۋعان بالامداي،
ۋايىم شەكتىم كۇنى-تۇن...!
ءارقايسىڭ مەنىڭ - جالعىزىم،
امان جۇرىڭدەر ۇل-قىزىم...!
اداسىپ قالماي ارماننان،
بيىككە قانات قاعىڭدار.
بەس كۇندىك مىناۋ جالعاندا،
جاقسى ادام بولىپ قالىڭدار!
ەڭبەك پەن ءبىلىم قوس قانات،
سامعاي المايسىڭ ءبىرىنسىز.
اق جول تىلەيمىن ءارقاشان،
قالىپ قويماڭدار ءبىلىمسىز!
ۇيادان ۇشقان جاس تۇلەك،
تەك جاقسى جولمەن جۇرىڭدەر.
تابىسقا جەتىپ تولايىم،
اۋىلعا ءجيى كەلىڭدەر..!!!
17.05.2022
You Might Also Like
