سۇحبات
رايىمبەك اۋداندىق سپورت كەشەنى ديرەكتورى ورىنباسارى جانام كەرىمبايەۆپەن سۇحبات.
— قايىرلى كۇن، جانات مىرزا! كوڭىلدەرگە ەرەكشە شاتتىق سىيلايتىن كوكتەم مەزگىلىنىڭ بۇگىنگىدەي جايما-شۋاق كۇنىندە وزىڭىزدەي ازاماتپەن سۇحباتتاسۋ ءساتى بۇيىرعان ەكەن. كوكتەمدىك كوڭىل-كۇيىڭىز قالاي؟
— راحمەت، بارلىعى ويداعىداي، تاعى ءبىر جاڭا جۇمىس اپتاسىن باستاپ، كۇندەلىكتى ءبىرقالىپتى تىرشىلىككە كىرىسىپ كەتتىك!
— جالپى قالىڭ جۇرتشىلىق ءوزىڭىزدى اۋداندىق سپورتقا ۇلكەن ۇلەس قوسىپ، تالاي جەڭىمپازداردىڭ قاناتىن قاتايتقان ازامات رەتىندە تانيدى. ءوزىڭىزدىڭ سپورتقا قىزىعۋشىلىعىڭىز قاشاننان باستاپ وياندى جانە وعان ىقپال ەتكەن ادامدار بار ما؟
— سپورتپەن بالا كەزدەن اينالىستىم دەۋگە بولادى. سپورت مەكتەبى ءبىزدىڭ ءۇيدىڭ قاسىندا ورنالاستى. 12 جاسىمدا قىزىعۋشىلىق جەتەلەپ، سپورت مەكتەبىنە بارىپ، كۇرەسپەن اينالىستىم. الايدا، ول شاقتا جاتتىقتىرۋشى بولۋدى ارمانداماعان ەدىم. كەيىننەن، اسكەردەن ورالعان سوڭ، كەزىندە جاتتىقتىرۋشىم بولعان، سپورت مەكتەبىنىڭ سول شاقتاعى ديرەكتورى بولعان بىربايەۆ بەكبولات اعامىزدان ۇسىنىس ءتۇسىپ، جاتتىقتىرۋشى بولىپ ەڭبەك جولىن باستادىم. ارينە، باسىندا شامالى كۇماندانعانىم راس، دەگەنمەن، بەكبولات اعامىزدىڭ قولداۋىمەن نىق قادام جاساپ، ىسكە كىرىستىم. بار كۇمانىم سەيىلىپ، بۇل جۇمىسقا دەگەن قۇشتارلىعىم ارتتى. الدىما كەلگەن شاكىرتتەر دە مەنىڭ ەرەكشە ىقىلاسىمدى وياتتى. جاتتىقتىرۋشىلىقپەن قاتار، جارىستاردى دا نازاردان تىس قالدىرمادىم. “چەمپيونات قازاقستاندى” ۇتىپ الدىم، سول شاقتا شاكىرتتەرىم دە ءتۇرلى جارىستاردا جۇلدەلى بولىپ ءجۇردى.
— ءسىز تاربيەلەگەن شاكىرتتەردىڭ ءبىرازى، بۇگىندە ەل ماقتار ازاماتتار بولعانىن بىلەمىز. شاكىرت تاربيەلەۋدە قانداي قاسيەتتەردى باسشىلىققا الاسىز؟
— ارينە، مەن تاربيەلەگەن شاكىرتتەردىڭ بارلىعى چەمپيون بولىپ كەتپەيتىنى انىق. تىپتەن، الدىما كەلگەن ءجۇز شاكىرتتىڭ بىر-ەكەۋى عانا “سپورت شەبەرى” اتانىپ نەمەسە ودان ۇلكەن جەتىستىككە جەتۋى مۇمكىن. سول سەبەپتەن، ەڭ باستىسى، كەلگەن شاكىرتتىڭ دەنساۋلىعىن تۇزەپ، بەلگىلى ءبىر جاقسى ورتاعا بەيىم ادام بولىپ قالىپتاسۋى. مەيلى، ول سپورت سالاسىنان وزگە سالادا بولسىن، باستىسى- اينىماس تۇلعالىق قاسيەتىنىڭ بولۋى. مەن ماقتانىشپەن ايتا الاتىن تاعى ءبىر دۇنيە، مەن تاربيەلەگەن شاكىرتتەردىڭ سپورتتان وزگە ءتۇرلى سالالاردىڭ كوشباسشىلارى بولا العاندىعى.
— اۋدانىمىزدىڭ اتىن اۋدان، وبلىس، رەسپۋبليكا كولەمىندە اسقاقتاتىپ جۇرگەن قانداي شاكىرتتەرىڭىزدى ەرەكشە ماقتان تۇتار ەدىڭىز؟
— الەمدىك دارەجەدە جۇلدە الىپ، تانىمال بولعان شاكىرتتەرىم ازىرگە جوق. الايدا، رەسپۋبليكا كولەمىندە جۇلدەلەرگە يە بولىپ قۋانتقان سپورتشىلار جوق ەمەس، ءوزىم ەرەكشە ماقتان تۇتىپ اتىن اتار بولسام، نۇرعازييەۆا گۇلباقىت 5 دۇركىن “قازاقستان چەمپيونى” بولدى، جاسوسپىرىمدەر اراسىنداعى ازيا چەمپيوناتىندا 2 رەت جۇلدەگەر اتاندى، ودان وزگە قىرعىزباي ايدانا، ءجۇنىس ايزادا سىندى ارۋلاردى دا ەرەكشە ماقتانىشپەن ايتا الامىن.
— ۇزىن قۇلاقتان ەستۋىمىز بويىنشا، ەڭبەگىڭىزدى ەرەكشە ەلەگەن شاكىرتتەرىڭىز سۋ جاڭا اۆتوكولىكتى سىيعا تارتقان ەكەن. سىي-جەڭگەندىكى، ءسوز تەرگەندىكى دەمەكشى، بۇل دا ەڭبەگىڭىزدىڭ كەزەكتى ءبىر ەرەكشە باعالانۋى دەپ بىلەمىن.
— ءيا، جاقىندا 50 جاسقا تولعان تۋعان كۇنىمە شاكىرتتەرىمنىڭ سىيلىعى اۆتوكولىك پەن مەنىڭ ءومىرىم مەن قىزمەت جولىم تۋرالى جاساعان ۆيدەوروليكتەرى بولدى. دەگەنمەن، ولاردى تاربيەلەۋدەگى ماقساتىم، كولىك الۋ بولماعان ەدى. بۇل سىيلىقتى تارتۋ ەتۋشىلەر مەنىڭ ءتالىم ۇيامنان بىرنەشە جىل بۇرىن قانات قاققان ازاماتتار ەدى. سوندا دا ۋاقىت اراقاشىقتىعىنا قاراماستان، تالىمگەرلەرىن ۇمىتپاي وسىنداي سىي جاساپ جاتقاندارىنا ۇلكەن العىس. ەرەكشە ريزامىن.
— بارىمىزگە ايان، بيىل تۇعىرلى تاۋەلسىزدىگىمىزگە -30 جىل. ءسىز دە تاۋەلسىزدىكتىڭ ءجون ايتار كۋاگەرلەرىنىڭ ءبىرىسىز. تاۋەلسىزدىك جىلدارى ەلىمىزدىڭ، اۋدانىمىزدىڭ سپورت تىنىسىندا قانداي جاڭالىقتار مەن وزگەرىستەر بولدى؟
— مەنىڭ جاس ەرەكشەلىگىمدى ەسكەرسەك، تاۋەلسىزدىككە دەيىنگى جانە كەيىنگى زامان كەلبەتىن كوردىم دەۋگە بولادى. ال ەڭبەك جولىمدى تۋرا تاۋەلسىزدىك العان جىلدارى باستادىم. وتكەن جىلداردىڭ كورىنىسى ءالى كوز الدىمدا. العاش جۇمىسقا تۇرعان جىلدارى جالاقىنى الۋدىڭ ءوزى اسا قيىنعا سوقتى، ەلدەگى ءبىرقاتار جۇمىس ورىندارى وسىنداي سيپاتتا بولدى. تەك سول كەزدەگى سىرتتاي وقۋداعى سەسسيانى سىلتاۋراتىپ، اقشا سۇراپ ءوتىنىم جازعان كەزدەرىمىز دە بولدى. ال قازىرگى ۋاقىتتا، ءبىزدىڭ سالانىڭ جالاقىسى وزگە سالالاردان تومەن بولعانىمەن، ۋاقىتىلى الۋ قاداعالانادى. سونىمەن قاتار، العاشقىدا سپورت زالدار قۇرىلىسىن ءوزىمىز تۇرعىزساق، بۇگىندە سپورت مەكتەپتەرىنىڭ قۇرىلىستارى مەملەكەت تاراپىنان قولداۋعا يە. تاۋەلسىزدىكتىڭ العاشقى جىلدارى مەن بۇگىنگى كۇندى سالىستىرساق، ۇلكەن وزگەرىستەرگە كوز جەتكىزەمىز. اۋدانىمىز بولىنگەلى جاعداي تىپتەن جاقساردى.
— اۋدانىمىز بولىنگەلى جاعداي جاقساردى دەيسىز، جالپى اۋدانىمىزداعى قازىرگى كۇرەس سالاسىنىڭ احۋالى قانداي؟ باسشىلىق تاراپىنان ءتيىستى نازار اۋدارۋلار جۇزەگە اسۋدا ما؟
— ءبىزدىڭ اۋداندىق سپورت مەكتەبىندە بىرنەشە كۇرەس تۇرلەرى بار. ولار: گرەك-ريم كۇرەسى، قازاق كۇرەسى، ەركىن كۇرەس، دزيۋدو كۇرەسى. بۇل كۇرەس تۇرلەرىنىڭ ىشىندە، ەركىن كۇرەس اۋدانىمىزدا بۇرىننان ىلگەرى دامۋ ۇستىندە، قالعان كۇرەس تۇرلەرى دە ۋاقىت اعىمىمەن، جاقسى ناتيجەلەر كورسەتىلۋدە. ال اۋدان تاراپىنان كوڭىل بولۋگە كەلەر بولساق، ءبىز بيىلعى جىلعا دەيىن اۋدان بيۋدجەتىنە قاراستى بولىپ كەلدىك، سول ۋاقىتتا ءتيىستى قاراجات مەزىلىمەن اۋدارىلىپ، كوڭىل ءبولىنىپ كەلدى. ال وسى جىلدان باستاپ، ءبىز وبلىستىق باسقارماعا قاراستىمىز. ءتيىستى قارجىنى بەرىپ، جاعدايدى جاساۋدى. بۇگىنگى ۇكىمەت جاعداي ىلگەرىدەگى ۋاقىتتارعا قاراعاندا ەداۋىر جاقساردى. كوپ ماسەلە قارجىعا كەلىپ تاقالاتىن مىنا زاماندا ۇكىمەت تيىسىنشە ءوز مىندەتىن ورىنداۋدا.
— سۇحباتىڭىزعا ۇلكەن العىس! قىزمەتىڭىز ءوز جەمىسىن بەرىپ، شاكىرتتەرىڭىز ءۇمىتىڭىزدى اقتاي بەرسىن! ەڭبەگىڭىزدىڭ ناتيجەسىن الەمدىك دەڭگەيدە كورسەتەر شاكىرتتەرىڭىز كوپ بولسىن!
سۇحباتتاسقان اقەركە بيجان
You Might Also Like
-
باس پروديۋسەرى – ءاليا نازاربايەۆا. ءفيلمدى مادەنيەت جانە سپورت مينيسترلىگىنىڭ تاپسىرىسىمەن «قازاقفيلم» كينوستۋدياسى مەن Sataifilm كومپانياسى ءتۇسىردى. رەجيسسەر اقان ساتا...
