سۇيىندىك جاقان قۋدىڭ قۋلىعى
جاقان قۋ ەلدەن شىققان كەدەي بولادى. بىلايشا ايتقاندا بار ادامدار ول كەزدە ونى وتە جەك كورەدى. ول ءوزىنىڭ جوقتىعىنا، ناشارلىعىنا قاراماستان وتە پىسىق، ەلدەن شىققان قۋ بولادى. جاقان قازىرگى پاۆلودار وبلىسى، بايان اۋدانى، بۇرىنعىشا اقبەت تاۋ بولىسى، ءتورتىنشى اۋىلدا تۋىپ-وسەدى. رۋى — سۇيىندىك، ونىڭ ىشىندە ايدابول، ارعى اتاسى — جولان. ون توعىزىنشى عاسىردىڭ سوڭعى جارتىسىندا ءومىر سۇرگەن ادام. بۇل جاقان وتە قۋلىقشىل، تاقپاقشىل، ساۋىققوي جايدارى ادام بولدى. جاقاننىڭ اكەسى ءوزى دە ناشار، كەدەي بولعانىمەن ەسكى پاتشا ساياساتى زامانىندا ۇلكەن جەرلەردە، ۇلكەن جيىندارعا قاتىناسىپ جۇرەدى.
ءبىر كەزدە جاقان ومبى قالاسىنا بارادى. بۇل كەزدە ومبىدا بولعان جينالىسقا قاتىناسقان ادامداردىڭ كۇتۋشىسى بولادى. جاقان اتقوسشى بولىپ ەرىپ بارعانمەن، قولى بوس ۋاقىتىندا ومبىنىڭ قالاسىن ارالايدى. بازاردان ءبىر قالايى وجاۋ ساتىپ الادى. بۇل كەزدە وسى قالايى وجاۋدىڭ حالىققا تاراپ شىقپاعان كەزى. سونىمەن جاقان ەلگە قايتىپ كەلىپ، كۇزدىگۇنى ەل تاۋعا قونعان سوڭ، جاقان ءوزىنىڭ قاسىنا ۇلكەن بالاسىن ەرتىپ الىپ، قارجاس ۇكىبايدىڭ ۇيىنە كەلەدى. قونىپ وتىرعاننان كەيىن جاقان ۇكىبايعا ايتادى:
— مەن سىزگە سىيعا ومبىدان اق كۇمىس وجاۋدى ادەيى تارتۋعا الىپ كەلىپ وتىرمىن. وسى وجاۋدى ەشكىمگە اپارماي، سىزگە الىپ كەلىپ وتىرمىن. سوندىقتان اماندىق بولسا، بايبىشەڭىزگە تىقتىرىپ قويىڭىز، — دەپ وجاۋدىڭ ماقتاۋىن جەتكىزەدى. وسىمەن ۇكىباي وجاۋدى سالدىرىپ قويادى. ەشكىمگە بەرگىزبەيدى، كەلگەن كىسىگە دە كورسەتتىرمەيدى.
ال جاقان قايتار ۋاقىتتا ۇكىباي:
— نە ايتاتىنىڭ بار؟ — دەيدى.
— مەن نە قالايمىن سىزدەن؟ ءبىزدىڭ شارۋانى بىلەسىز. حال-جاي بەلگىلى. بالالارعا سوعىم كەرەك. باسقا نە ايتايىن، — دەيدى.
سوندا ۇكىباي تۇرىپ:
— قوي بەرسەم، تايىنشا بەرسەم، ازسىنارسىڭ، استىمداعى اتىمدى ال، — دەگەن ەكەن دەيدى.
سونىمەن جاقان وتە ريزا بولىپ، ۇكىبايدىڭ اتىن الىپ، ەلىنە قايتادى. كەلەسى جىلى جازعىتۇرىم ەل تاۋدان كوشىپ جاتقان كەزدە توعاي بويىنان شىققان، ەل ارالاعان اپايدىڭ باقالشىلارى الگى جاقان تارتۋعا الىپ كەلگەن كۇمىس قالايى وجاۋدى باقالشى قىدىرتىپ، ءجۇن-جۇرقاعا ساتىپ جۇرگەنىن ۇكىباي كورەدى. «اقشالاي بولسا، وجاۋدىڭ قۇنى 5 تيىن، بولماسا ءبىر ۋىس قويدىڭ ءجۇنى» دەيدى. سوندا ۇكىباي ايتقان ەكەن:
— الدە قۇداي-اي، مىناۋ جاقان مەنى الداپ، وتىرىك ايتىپ، استىمداعى اتىمدى الداپ سوقتى-اۋ! كۇمىس وجاۋ دەگەنى قالايى وجاۋ بوپ شىقتى-اۋ، — دەگەن ەكەن.
ءسويتىپ، جاقان قۋ ۇكىبايدى قۋلىعىن اسىرىپ الداعان ەكەن.
You Might Also Like
-
ەرتەدە اتى جالپاق الەمگە ايگىلى تارحان دەگەن پاتشا قارتايىپ، توسەك تارتىپ جاتىپ، قاسىنا بارلىق ءۋازىرلەرىن جينايدى.
-
ەل كەزىپ، بىرگە تۇستەنىپ، بىرگە قونىپ جۇرە بەرۋ كۇسەپتىڭ بەلگىلى ادەتى. تاعى بىردە ءبىر ۇيگە كەلىپ قونا قالدى. ءۇي يەسى جولاۋشىلاپ كەتىپتى. مەيماننىڭ ءتيىستى قوناقاسىن بەردى دە، ءۇي يەسى جاس ايەل قوناع...
