InfoHub Logo

تاراز مەملەكەتتىك پەداگوگيكالىق ينستيتۋتىندا «بالاساعۇن كىتاپحاناسى» سەرياسى بويىنشا بىرنەشە جاڭا كىتاپ جارىق كوردى.

اتالعان وقۋ ورنىنىڭ اقپاراتتىق-يميدجدىك قىزمەتىنىڭ تاراتقان مالىمەتىنە قاراعاندا، «تۇركىستان جيناعىنىڭ» 4 تومىندا 1916 جىلعى ۇلت-ازاتتىق كوتەرىلىسكە ارنالعان 22 عىلىمي ماقالا مەن وچەركتەر توپتاستىرىلعان. عىلىمي جيناق اتالعان وقۋ ورنى جانىنداعى ءجۇسىپ بالاساعۇن اتىنداعى تۇركىستان ولكەسىنىڭ تاريحىن زەرتتەۋ ورتالىعىندا دايىندالعان.

«تۇركىستان جيناعى» - تۇركىستان ولكەسىنىڭ (ورتالىق ازيانىڭ) كونە داۋىردەن بۇگىنگى كۇنگە دەيىنگى تاريحىنا، الەۋمەتتىك-ەكونوميكالىق جاعدايىنا، حالىقتارىنىڭ مادەني ءومىرى مەن تۇرمىس سالتىنا جانە تاعى باسقا دا كوپتەگەن ماسەلەلەرگە ارنالعان ماقالالار جاريالانعان عىلىمي جيناق بولىپ تابىلادى.

سونىمەن قاتار، «تۇركىستان ولكەسىندەگى 1916 جىلعى ۇلت-ازاتتىق كوتەرىلىس تاريحى (سىرداريا جانە جەتىسۋ وبلىستارىنىڭ ماتەريالدارى بويىنشا)» مونوگرافياسى دا وقىرمانعا جول تارتتى.

اتالعان مونوگرافيادا 1916 جىلعى پاتشانىڭ «ماۋسىم» جارلىعىنا قارسى تۇركىستان ولكەسىندە وتكەن جەرگىلىكتى حالىقتار: قازاق، وزبەك، قىرعىز، دۇنگەن، ۇيعىرلاردىڭ كوتەرىلىستەرى باياندالعان.

«عىلىمي ەڭبەكتىڭ نەگىزى تۇركىستان ولكەسىندەگى، اتاپ ايتقاندا سىرداريا مەن جەتىسۋ وبلىستارىنداعى جەرگىلىكتى تۇرعىنداردىڭ 1916 جىلعى ۇلت-ازاتتىق كوتەرىلىسكە شىعۋىنىڭ الەۋمەتتىك-ەكونوميكالىق، ساياسي-رۋحاني سەبەپتەرى مەن العىشارتتارىن، كوتەرىلىستىڭ باستالۋى مەن بارىسىن، پاتشالىق اكىمشىلىك تاراپىنان كوتەرىلىستى قاتىگەزدىكپەن باسىپ-جانشۋىن، جەڭىلىسكە ۇشىراعان حالىقتىڭ بوسقىنشىلىققا ۇشىراپ كورشىلەس جاتقان جۇڭگو جەرىنە اۋا كوشۋى، قوس يمپەريانىڭ قىسپاعىنا تۇسكەن بوسقىنداردى تاريحي وتانىنا قايتارۋداعى قازاق زيالىلارىنىڭ ەڭبەكتەرى مۇراعاتتىق قۇجاتتار مەن تاريحي دەرەكتەردەگى مالىمەتتەرگە سۇيەنە وتىرىپ جازىلعان»، - دەيدى كىتاپ اۆتورى، ق ر ۇعا كوررەسپوندەنت مۇشەسى، تاريح عىلىمدارىنىڭ دوكتورى، پروفەسسور داريا قوجامجاروۆا.

كىتاپ ستۋدەنتتەر، جوعارى وقۋ ورىندارىنىڭ وقىتۋشىلارى مەن تاريحقا قىزىعاتىن وقىرمان قاۋىمعا ارنالعان.

---