تاسشۇيگىن
تاسشۇيگىن (پاترينيا سرەدنيايا، ۆالەريانا كامەننايا، Patrinia intermedia Horn.) — بيىكتىگى جارتى مەترگە دەيىن جەتەتىن، كوپ جىلدىق، ءشوپ تەكتەس وسىمدىك. تامىر ساباعى تارماقتالعان جانە جۋاندىعى 3 سانتيمەترگە جەتەتىن تامىرى، تىك وسەتىن قىسقا تۇكتەرمەپ جابىلعان ساباقتارى بار. تامىر جاپىراقتارىنىڭ ساعاقتارى ۇزىن، ولار ساباقتارىنىڭ تۇبىندە شوعىرلانىپ تۇرادى. ساباق جاپىراقتارىنىڭ ۇزىندىعى 10 سانتيمەترگە دەيىن جەتەدى جانە قاۋىرسىن ءتارىزدى تىلىمدەلگەن. گۇلدەرى مايدا، سارى ءتۇستى، وسىمدىكتىڭ جوعارعى جاعىندا تەپ-تەگىس بولىپ شوعىرلانىپ تۇرادى. گۇل قورشاۋى قوڭىراۋ ءتارىزدى. مامىر-شىلدە ايلارىندا گۇلدەيدى. جارتاستاردىڭ باستارىندا، تاستاقتى بەتكەيلەردە، تاۋ ەتەكتەرىندە وسەدى.
ءدارى جاساۋ ءۇشىن وسىمدىكتىڭ تامىر ساباعىن جانە تامىرىن جازدىڭ ورتاسىنان باستاپ كۇزدىڭ اياعىنا دەيىن جيناپ الادى. ونىڭ قۇرامىندا 13 پروسەنت تريتەرپەن ساپونيندەرى جانە الكالويدتەر، يلىك زاتتار، قانتتار، ەفير مايلارى، ورگانيكالىق قىشقىلدار بولادى.
تاسشۇيگىننىڭ تامىرىنان جاسالعان دارىلەردىڭ نەرۆ جۇيەسىن تىنىشتاندىراتىن قاسيەتتەرى بار. ول ساپا-قاسيەتتەرى جونىنەن دارىلىك شۇيگىنشوپتەن ارتىق. ۇلى وتان سوعىسى جىلدارىندا تاسشۇيگىندى دارىلىك شۇيگىنشوپتىڭ ورنىنا پايدالانۋعا رۇقسات ەتىلدى. وسىعان بايلانىستى وسىمدىكتى ۇيقى قاشقاندا، نەرۆ جۇيەسى قاجىعاندا، جۇرەك قاتتى سوققاندا ەم ءۇشىن پايدالانادى.
ءدارىنى دايىنداۋ جانە قولدانۋ ءتاسىلى
10 گرامم ۇنتاقتالعان وسىمدىك تامىرىن 1 ستاكان قايناپ تۇرعان سۋعا سالىپ تۇندىرادى دا، 1 اس قاسىقتان كۇنىنە 2-3 رەت ىشەدى.
You Might Also Like
-
بيىل قاستەرلى تاۋەلسىزدىگىمىزگە 30 جىل تولادى. بۇل –قايتا جاڭعىرعان قازاق مەملەكەتتىگىنىڭ، اتا-بابالارىمىز اڭساعان ازاتتىقتىڭ تۇعىرى نىعايا تۇسكەنىن ايگىلەيتىن ماڭىزدى بەلەس. تاريح تۇرعىسىنان ...
