InfoHub Logo

سماگۋلوۆا ا.س. ءال-فارابي اتىنداعى قازاق ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتى، ديپلوماتيالىق اۋدارما كافەدراسىنىڭ  دوسەنت
جانۋزاكوۆا گ.ا. ءال-فارابي اتىنداعى قازاق ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتى، ديپلوماتيالىق اۋدارما كافەدراسىنىڭ اعا وقىتۋشىسى

الەمدە عىلىم مەن جوعارى تەحنولوگيا بويىنشا كۇنشىعىس ەلى وزگەلەردەن الدەقايدا الدا تۇرعانى بەلگىلى. جاپون حالقى ءبىلىمى مەن زاماناۋي تەحنولوگيالارىن مۇقىم جۇرتپەن ءبولىسىپ كەلەدى. كەيىپكەرىمىز تومونوبۋ ساكۋراي – يوكوگاما توين ۋنيۆەرسيتەتىنىڭ پروفەسسورى، PhD دوكتورى. 1966 جىلى 4 اقپاندا جاپونيانىڭ كاناگاۆا ولكەسىندە دۇنيەگە كەلگەن. ءال-فارابي اتىنداعى قازۇۋ-دىڭ دەنە شىنىقتىرۋ جانە سپورت كافەدراسىنا شاقىرىلعان پروفەسسور.

عالىم مانساپتىق جولىن يوكوگاما ۇلتتىق ۋنيۆەرسيتەتىنەن باستاپ، ءبىلىم بەرۋ فاكۋلتەتى، ءبىلىم بەرۋ سالاسىنداعى باكالاۆر دارەجەسىن الادى. ال بولاشاق عالىمعا 1990 جىلى جاتتىعۋ جانە سپورت عىلىمدارى زەرتحاناسى، يوكوگاما ۇلتتىق ۋنيۆەرسيتەتىنىڭ ءبىلىم بەرۋ فاكۋلتەتى، «جاتتىعۋ قارقىندىلىعىنا ءزار لاكتاتىنىڭ اسەرى» تاقىرىبىنداعى ديسسەرتاسيا ءۇشىن فيزيولوگيا بويىنشا ماگيستر دارەجەسى بەرىلەدى. 2012 جىلى توكيو اۋىل شارۋاشىلىعى ۋنيۆەرسيتەتىنىڭ ەكولوگيالىق سيمبيوتيكالىق عىلىم دەپارتامەنتىنىڭ جوعارى مەكتەبى، «قاڭقا بۇلشىقەتىندەگى ەكسەنترلىك بۇلشىقەت جيىرىلۋىنان كەيىنگى بۇلشىقەت رەگەنەراسياسىنداعى ازوت وكسيدىنىڭ ءرولى» اتتى ديسسەرتاسياسى ءۇشىن جاتتىعۋلار فيزيولوگياسى بويىنشا PhD دارەجەسىن الادى.

2022 جىلدىڭ 13 اقپاندا دەنە شىنىقتىرۋ جانە سپورت كافەدراسىنىڭ پروفەسسورلىق-وقىتۋشىلىق قۇرامى جاس عالىمدار جانە ستۋدەنتتەر اراسىندا ليتۆادان كەلگەن شەتەلدىك عالىم كازيس ميلاشيۋسپەن بىرگە، پروفەسسور تومونوبۋ ساكۋرايمەن ونلاين كەزدەسۋ وتكىزگەن-دى. كافەدرانىڭ وقۋ ۇدەرىسىنە ماگيسترانتتار مەن دوكتورانتتارعا ءدارىس وقىپ، سەمينارلار جۇرگىزدى. سونداي-اق ارىپتەستىك بايلانىستاردى دامىتۋ جانە شەت مەملەكەتتەردىڭ وزىق تەحنولوگيالارى مەن يننوۆاسيالىق ادىستەرىن مەڭگەرۋ ءۇشىن اتالمىش پروفەسسورلار تارتىلۋدا. كەزدەسۋ بارىسىندا دەنە شىنىقتىرۋ جانە سپورت كافەدراسىنىڭ مەڭگەرۋشىسى، پ.ع.ك. ءا.ىسقاقوۆا شەتەلدىك عالىمدارمەن عىلىمي سەمينارلار، حالىقارالىق كونفەرەنسيالار ۇيىمداستىرۋ جانە وتكىزۋ، بىرلەسكەن ماقالالار مەن وقۋ قۇرالدارىن شىعارۋ، عىلىمي تاعىلىمدامادان ءوتۋ جانە ىنتىماقتاستىق تۋرالى كەلىسىمدەرگە قول قويۋ بويىنشا حالىقارالىق ىنتىماقتاستىقتى ودان ءارى جالعاستىرۋدى ۇسىنعان بولاتىن. اتالمىش كەزدەسۋدىڭ جەمىسى رەتىندە 23 قاراشا مەن 1 جەلتوقسان ارالىعىندا ءال-فارابي اتىنداعى قازۇۋ-دا دەنە شىنىقتىرۋ جانە سپورت كافەدراسى تومونوبۋ ساكۋرايدىڭ «دەنە شىنىقتىرۋ جانە سپورت عىلىمىن قاڭقا بۇلشىقەتتەرى تۇرعىسىنان وقىتۋ» باعدارلاماسى (72 ساعاتتىق كولەم) بويىنشا بىلىكتىلىكتى ارتتىرۋ كۋرستارىن وتكىزدى.

سەمينار بارىسىندا ەلىمىزدەگى دەنە شىنىقتىرۋ ۇستازدارى مەن سپورت سالاسى ماماندارىنىڭ بىلىكتىلىگىن ارتتىرۋ باعىتىندا ماڭىزدى ىستەر تالقىلاندى. ماقساتى – ەلىمىزدەگى دەنە شىنىقتىرۋ دەڭگەيىن كوتەرۋ، قازۇۋ-دىڭ شەتەلدىك پروفەسسورلارمەن ىنتىماقتاستىق اياسىن كەڭەيتۋ جانە حالىقارالىق ارەنادا وتانىمىزدىڭ نامىسىن قورعايتىن جاڭا بۋىن تاربيەلەۋ. كۋرستارعا مەكتەپ مۇعالىمدەرى، جوعارى وقۋ ورىندارىنىڭ وقىتۋشىلارى جانە سپورت مەكتەپتەرىنىڭ جاتتىقتىرۋشىلارى قاتىستى. كۋرستار ءدارىس جانە تاجىريبەلىك شەبەرلىك ساباقتارى تۇرىندە سپورت الاڭىندا بىرنەشە سەكسيالار بويىنشا وتكىزىلدى. مىسالى، سپورت عىلىمىنىڭ نەگىزدەرى، جۇگىرۋ، سەكىرۋ جانە لاقتىرۋ نەگىزدەرى، سپورت عىلىمىنىڭ تاجىريبەسى، جاتتىعۋلار تۋرالى عىلىم، مالىمەتتەردى تالداۋ، بولاشاقتاعى سپورت عىلىمى. دەنە شىنىقتىرۋ جانە سپورت كافەدراسىنىڭ مەڭگەرۋشىسى ءالميرا ىسقاقوۆا اتالمىش ءىس-شارا تۋرالى ءوز پىكىرىن ورتاعا سالدى.

---