InfoHub Logo

يورك پەن سەنت-ەندريۋسس ۋنيۆەرسيتەتتەرىنىڭ پسيحولوگتارى ءىرى توتىقۇس-ۆازالار (Coracopsis vasa) قۇرال-جابدىقتاردى پايدالاناتىندىعى جايلى كۋالىكتەردى تاپقان. ەركىندىكتە ءومىر سۇرەتىن ون توتىقۇستى باقىلاۋ ساتىندە ولاردىڭ قۇرال-جابدىقتار ارقىلى تەڭىز قابىرشاقتارىنان كالسيي الىپ جاتقانىن، جانە دە بىر-بىرىنە قۇرالداردى بەرىپ جاتقانىن بايقاعان. عالىمداردىڭ ماقالاسى Biology Letters جۋرنالىندا جاريالاندى.

عالىمدار توتىقۇستاردى ناۋرىزدان قازان ايىنا دەيىن، سەگىز اي بويى باقىلاپ، بەينەتاسپاعا تۇسىرگەن. باقىلانىپ وتىرعان ون قۇستىڭ بەسەۋى قۇرال-سايمانداردى كالسيي ۇنتاعىن نەمەسە جۇتۋعا ىڭعايلى ۇزىندىلەردى الۋ ءۇشىن پايدالانعان. قۇستار ۇساق تاستاردىڭ نەمەسە قۇرما دانەگىنىڭ كومەگىمەن قابىرشاقتاردى سىنا تارىزدەس ۋاتادى، نەمەسە ۇنتاق الۋ ءۇشىن قىرنايدى.

بۇل ارەكەت اسىرەسە ناۋرىز جانە ءساۋىر ايلارىندا قاتتى بايقالعان. مۇنى عالىمدار قۇستاردىڭ الداعى ۋاقىتتا كوبەيۋىمەن بايلانىستىرادى. كالسيي جۇمىرتقا باسۋ ءۇشىن اسا قاجەت ەلەمەنتتەردىڭ ءبىرى. دەگەنمەن، قۇرال-سايمانداردى ەركەك قۇستار بەلسەنە پايدالانعان: جۇپتاسۋ الدىندا ەركەك قۇستار ۇرعاشىلارىن ۇنتاقپەن تاماقتاندىرىپ، ولاردىڭ ىقىلاسىنا بولەنۋگە تىرىسقان.

مۇنداي قۇبىلىس قۇستاردىڭ بۇل تۇرىندە العاش بايقالىپ وتىر. جالپى جانۋارلاردىڭ قۇرال-جابدىقتاردى پايدالانۋى وتە سيرەك كەزدەسەتىن جاعداي (ادام تارىزدەس مايمىلداردى ساناماعاندا). عالىمدار جابايى ورماندا ءومىر سۇرەتىن توتىقۇستاردىڭ بۇل ءتۇرىن ءالى باقىلاپ كورگەن جوق. قۇستار بۇعان الەۋمەتتىك نەمەسە جەكە ۇيرەتۋدەن داعدىلاندى ما، الدە ءتۋابىتتى قاسيەتى مە، بۇل ازىرگە بەلگىسىز بولىپ وتىر.

 

---