تۇلكى مەن قويان
ءبىر كۇنى بولدىرىپ كەلە جاتقان تۇلكى جورتىپ جۇرگەن قوياندى كورىپ، وتىرىك اۋىرعان بولىپ ونىڭ جولىنا سۇلاي كەتىپتى دە، قوياندى شاقىرىپتى.
— قويانجان-اۋ، قويانجان، نەگە سونشا جورىتاسىڭ؟ مەنەن نەگە قورقاسىڭ؟ بالا جاستان بىرگە وسكەن، توعايدىڭ ءدامىن ءبىر جەسكەن، كورشى ەمەس پە ەدىك. مەن اۋىرىپ جاتىرمىن، جاقىنىراق كەلسەڭشى، قوشتاسايىق، — دەپتى.
سوندا قويان:
— ەكى قۇلاعىم سوزىڭدە تۇر، ەكى كوزىم وزىڭدە تۇر. ءسىز ەتتى جاقسى كورەدى دەيدى جۇرت، سول راس پا؟ — دەپتى.
— راس بولعاندا قانداي، ءتىپتى ەت جەمەسەم باسىم اۋىرادى!
— مىنە، وسىنىڭىز جامان عوي.
— ءيا، سوعان ءوزىم دە قىنجىلىپ جاتىرمىن. كەشە ءبىر تاۋىق جەپ ەدىم، سوعان جانىم اشىپ جىلاپ تا جىبەردىم. ويتكەنى ول دا ءتىرى جۇرگىسى كەلەدى عوي. و، شىركىن، تىرشىلىك! — دەپتى.
قويان:
— ءسىز ونى ولتىرمەي تۇرىپ ويلاپ كوردىڭىز بە؟ — دەپتى.
سوندا تۇلكى:
— مەن ءدال سول جەرىن ويلاۋدى ۇمىتىپپىن. جانىما باتىپ، اۋىرىپ جاتقانىم دا سونىڭ وكىنىشى، — دەيدى.
— ۇمىتشاق دەگەن جامان عوي، مەن دە سودان قورقامىن، سوندىقتان دا جورىتامىن، — دەپ، تۇرا جونەلىپتى قويان.
You Might Also Like
-
ومىرىڭىزدەگى جەڭىس پەن جەڭىلىستەرىڭىزدىڭ باستى فاكتورلارىنىڭ ءبىرى — ءتارتىپ. ءسىزدىڭ ماقساتىڭىز بەن ارمانىز نەمەسە بايلىق پەن ابىرويىڭىز، باقىتىڭىز ءتارتىپتىڭ ساقتالىپ-ساقتالماۋىنا قاتىستى.
-
ەرتەدە ادام، يت، مىسىق جانە قارشىعا تورتەۋى انت ءىشىپ، سەرتتەسىپ، ادال دوس بولىپتى. ولار ءبىر جەردە جاتىپ، ءبىر قازاننان تاماق جەپ، اۋىرتپالىقتى بىرگە كوتەرمەك بولىپتى. سونىمەن ءبىر كۇنى ولار اڭ اۋلاۋع...
