TWESCO جاڭا عىلىمي باسىلىمدارىن تانىستىرادى
تۇركى اكادەمياسى حالىقارالىق ۇيىمى (TWESCO) 9-شى قاراشا كۇنى استانا قالاسىندا باستالاتىن «Eurasian Book Fair - 2016» ەۋرازيالىق حالىقارالىق كىتاپ كورمەسى اياسىندا قوس بىردەي ايتۋلى شارا وتكىزۋدى جوسپارلاپ وتىر.
اكادەميا سايتىنىڭ حابارلاۋىنشا، 9 قاراشادا «تۇركىتانۋداعى اۋدارما ءىسىنىڭ وزەكتى ماسەلەلەرى» تاقىرىبىندا اشىق سەمينار وتكىزەدى. سەميناردا تۇركى الەمىنىڭ عىلىمي-ادەبي ىنتىماقتاستىعى باعىتىنداعى ماڭىزدى تاقىرىپتىڭ ءبىرى رەتىندە اۋدارما سالاسىنداعى وزەكتى ماسەلەلەر قاراستىرىلادى.
بۇدان بولەك، 11 قاراشادا يۋنەسكو شەڭبەرىندە تويلانىپ جاتقان ق.ا.ياساۋي مەن ج.بالاساعۇننىڭ مەرەيتويلارىنا ارناپ «تۇركى الەمىنىڭ تۇعىرلى تۇلعالارى: قوجا احمەت ياساۋي جانە ءجۇسىپ بالاساعۇن» اتتى دوڭگەلەك ۇستەل ۇيىمداستىرادى. ءتۇبى ءبىر تۇركىگە ورتاق قوس ويشىلدىڭ قۇرمەتىنە ارنالعان باسقوسۋدا ولاردىڭ الەم مادەنيەتى مەن عىلىمىنا قوسقان ۇلەستەرى مەن باعا جەتپەس مۇرالارى زەردەلەنىپ، تالقىلاناتىن بولادى.
اتالعان شارالارعا كورنەكتى مەملەكەت جانە قوعام قايراتكەرلەرى، قازاقستان مەن شەت ەلدەردەن كەلگەن بەلگىلى تۇركىتانۋشى، ادەبيەتشى عالىمدار، سونداي-اق زيالى قاۋىم وكىلدەرى قاتىسادى دەپ كۇتىلەدى.
ايتا كەتۋ كەرەك، حالىقارالىق كىتاپ كورمەسى شەڭبەرىندە جوسپارلانعان بۇل شارالاردا اكادەميانىڭ جاڭا عىلىمي باسىلىمدارىنىڭ تانىستىرىلىمى وتەدى. سونىمەن قاتار، TWESCO تاراپىنان باسىلعان بارلىق باسىلىمدار مەن كىتاپحانا قورىنداعى قۇندى ەڭبەكتەردىڭ ارنايى كورمەسى ۇيىمداستىرىلادى. كورمەگە قاتىسۋشىلار ءۇشىن اكادەميا شىعارعان كىتاپتاردىڭ ساتىلىمى دا قاراستىرىلعان. قىزىعۋشىلىق تانىتقان وقىرماندار سول جەردەن قالاعان باسىلىمدى ساتىپ الۋىنا بولادى.
You Might Also Like
-
بەس كۇندىك وقۋ جۇيەسى مۇعالىمدەردىڭ جالاقىسىن قىسقارتۋعا سەبەپ بولمايدى. ءبىلىم مينيسترلىگى قايتا پەداگوگتاردىڭ جالاقىسىن كوتەرۋ جوسپارلانىپ وتىرعانىن مالىمدەدى، دەپ حابارلايدى ۆaq.kz.
-
«بۇل زاماننىڭ جاقسىسى: ءبىرىن-بىرى كورە الماس، جۇرتىنا پايدا بەرە الماس»
