InfoHub Logo

وقۋ-اعارتۋ ءمينيسترى اسحات ايماعامبەتوۆ كىتاپ وقۋدىڭ ماڭىزى تۋرالى ويلارىن ءبولىستى.

«بالالىق شاعىمنان قالعان ەستەلىكتەردىڭ ءبىرى - ۇيدەگى كىتاپتارعا تولى ۇلكەن سورەلەر مەن الۋان ءتۇرلى ادەبيەتتەر. ۇيدە كىتاپتاردىڭ بەلگىلى ءبىر سەرياسىنا جازىلۋ نەمەسە كەزەكتى رەت وقىلعان كىتاپتار تۋرالى سونداي ماقتانىشپەن، قىزىعۋشىلىقپەن ايتىلعانى ءالى ەسىمدە. وسىدان بولار مەن ۇيدەگى كىتاپتاردى وقىپ شىعىپ، كەيىنىرەك اۋداندىق كىتاپحانانىڭ تۇراقتى وقىرمانى بولدىم. بالا كەزىمدە «تاماق ءىشىپ وتىرعاندا كىتاپ وقىماۋ كەرەك» دەگەن ەسكەرتۋدى ءجيى ەستيتىنمىن. ءوزىم اكە اتانعاندا بالالارىما الدىمەن ەرتەگى وقىپ بەردىم، كەيىن ۇلكەن ۇلىم ءوزى وقي باستادى. ەرتەگىلەر مەن شاعىن اڭگىمەلەردەن باستاپ، شىتىرمان وقيعالار، عىلىمي فانتاستيكا جانە كوركەم ەمەس فانتاستيكا سىندى جانرلارعا بىرتىندەپ كوشتىك. 5-سىنىپتان باستاپ ۇلىم جىلىنا 30-50 كىتاپ وقيتىن بولدى. سول كەزدە مەن دە ۇلىما «تاماق ءىشىپ وتىرعاندا كىتاپ وقىماۋ كەرەك» دەپ ەسكەرتۋ جاساي باستادىم»، - دەپ جازدى اسحات ايماعامبەتوۆ Facebook پاراقشاسىندا.

ايتۋىنشا، ءمينيستردىڭ بالاباقشاعا بارىپ جۇرگەن كەنجە بالاسى دا ەرتەگىلەردى، اسىرەسە، «ەركەتاي» مەن «جانىبەك» تۋرالى زاماناۋي قازاق كوميكستەرىن تىڭداعاندى ۇناتادى.

«مەن ءوز تاجىريبەمنەن بالالاردى وقۋعا ماجبۇرلەۋگە بولمايتىنىن ايتا الامىن. بالالارعا قىسىم كورسەتپەي، كەرىسىنشە جەكە مىسالمەن وقۋعا دەگەن سۇيىسپەنشىلىكتى وياتۋ قاجەت. بالا اتا-اناسىنىڭ كىتاپ وقىپ وتىرعانىن كورۋى كەرەك. سوندا عانا قىزىعۋشىلىق پايدا بولادى. كىتاپتار بالانىڭ مىنەزىنە جانە قۇندىلىقتارىنىڭ قالىپتاسۋىنا اسەر ەتەتىنىن دە ەسكەرگەن ءجون. وڭ سيۋجەتتىك جەلىسى بار كىتاپتار جاقسى ادەتتەرگە باۋلىپ، دۇرىس تاربيە بەرەدى. سول سەبەپتى بالالاردى قولداۋ، كىتاپ وقۋعا باۋلۋ، ولارعا كىتاپ ساتىپ الىپ بەرۋ، كىتاپ كورمەلەرىنە بىرگە بارۋ وتە ماڭىزدى. بۇعان دەيىن PISA، TIMSS حالىقارالىق زەرتتەۋلەرىنىڭ ناتيجەلەرىن جاريالاعان بولاتىنبىز. ولار اتا-انالاردىڭ بالالارمەن بىرگە وقۋى جانە ولاردىڭ بولاشاقتا مەكتەپتەگى اكادەميالىق ۇلگەرىمى اراسىنداعى ناقتى جانە وڭ بايلانىستى كورسەتتى. زەرتتەۋ ناتيجەسىنە سايكەس، ۇيدە كىتاپتارى بار بالالار جوعارى ناتيجە كورسەتكەن. سوندىقتان 2020 جىلى وقۋشىلاردى كوركەم ادەبيەت وقۋعا باۋلۋ ءۇشىن اۋقىمدى رەسپۋبليكالىق «وقۋعا قۇشتار مەكتەپ» جوباسىن ىسكە قوستىق. بۇل جوبا تۋرالى كەلەسى جازبامدا كەڭىرەك تارقاتىپ ايتامىن. مەرەكە قارساڭىندا وسى جازبانى وقيتىن اتا-انالارعا بالالارعا قىزىقتى كىتاپ وقۋعا كەڭەس بەرۋدى ۇسىنار ەدىم. ولاردىڭ كىتاپ الەمىنە جاساعان ساياحاتى قىزىقتى بولسىن. بارلىق وقۋشىنى كىتاپ وقۋعا كوبىرەك ۋاقىت بولۋگە شاقىرامىن. ويتكەنى، ءبىلىم – ەڭ قۇندى بايلىق»، - دەپ تۇيىندەيدى مينيستر.

---