InfoHub Logo

الەمدە ەكى مىڭنان استام ۇلت وكىلدەرى تۇرادى. اربىرەۋى بىر-بىرىنە مۇلدەم ۇقسامايدى. ولاردى ءبىر – بىرىنەن، قايتالانباس، ايرىقشا قىلاتىن ونىڭ ءتىلى، ءدىنى، ءدىلى، سالت – ءداستۇرى، ادەت – عۇرپى. ال وسىلاردىڭ بارلىعى ۇلتتىق سانانى قۇرايدى. وسى ءار حالىقتى وزىنە عانا ءتان سانا – سەزىمىنىڭ قالىپتاسۋىنا نەلەر اسەر ەتەدى؟

ەڭ الدىمەن، ۇلتتىق سانا ءسوزىنىڭ ءمان – ماعىناسىنا توقتالا كەتسەك. بۇل ءسوزدى ەستىگەندە مەنىڭ ويىما ۇلتىمىزدىڭ بولمىسىنا ساي رۋحاني قۇندىلىقتارىمىز كەلەدى. تاربيە، مەنتاليتەت، پاتريوتيزم، سالت – جورالعىلار، ىرىم – تيىمدار. وسىلاردىڭ بارلىعىن قالىپتاستىراتىن ەڭ ءبىرىنشى قۇرال – انا ءتىلى دەپ بىلەمىن. سەبەبى، سول ارقىلى حالقىمىزعا ءتان قاسيەتتەر بويىمىزعا داريدى. ەلباسىمىز ن.ءا.نازاربايەۆ ايتقانداي: “مەملەكەتتىڭ ەڭ باستى دۇنيەسى تەك قانا بايلىق ەمەس، سونىمەن قاتار انا ءتىلىمىزدىڭ بولاشاعى”. وعان تەك ادامدارمەن قارىم – قاتىناس قۇرالى دەپ ەمەس، ولشەۋسىز قازىنا جانە ۇلتتىڭ جان دۇنيەسى دەپ قاراۋىمىز كەرەك.

ال ۇلتتىق سانانىڭ نەگىزگى تىرەگى – تاريحىمىز. ويتكەنى، ادام ءوزىنىڭ ومىرگە كەلگەندەگى ماقساتىن ءبىلۋ ءۇشىن تاريحىنا كوز جۇگىرتىپ، اتا – بابالارىن ءبىلۋ مىندەت. وتكەن عاسىردىڭ سوڭىندا رەپرەسسيا كەزىندە قۇربان بولعان اتالارىمىزدىڭ “الاش قايراتكەرلەرىنىڭ ەسىمدەرىن جاڭعىرتۋ ماقساتىندا ولاردىڭ مەرەيتويلارىن مەملەكەت كولەمىندە اتاپ ءوتۋ قولعا الىندى. بۇل ۇلتىمىزدىڭ تاريحىن ۇمىتپاي، ساقتاپ قالۋعا زور ىقپالىن تيگىزۋدە. وسى ورايدا  ەلباسىمىزدىڭ “مادەني مۇرا” اتتى باعدارلاماسىن ايتپاسقا بولماس. ول تاريحىمىزدى جانداندىرۋدا ۇلكەن سەرپىلىس بەردى. سەبەبى، بۇل باعدارلامانىڭ ماقساتى ۇلت تاريحى ءۇشىن ماڭىزدى دەرەكتەر مەن جادىگەرلەردى قالپىنا كەلتىرىپ، باسقا دا شەت ەلدەرگە قازاق حالقىنىڭ اتا – بابمىزدان مۇرا بولىپ قالعان  ەسكەرتكىشتەرىمىزدى ناسيحاتتاۋ ەدى.

قورىتىندىلاي كەلسەم، ۇلتىمىزدىڭ سانا – سەزىمىنىڭ ءمانىن ءتۇسىنۋ ءار جەكە تۇلعا ءۇشىن وتە ماڭىزدى. ال ونى ءتۇسىنۋ ءۇشىن وتباسىنداعى ۇلتتىق تاربيە ۇلكەن ءرول اتقارادى. ءسابي بولعاننان باستاپ، بەسىك جىرى ارقىلى دا قازاق حالقىنىڭ قۇندىلىقتارى بويىنا ءسىڭىپ ، ساناسى قالىپتاسا باستايدى. سوندىقتان دا، بالانىڭ تاربيەسىنە نەمقۇرايلىلىق تانىتپاي، جەتكىلىكتى تۇردە كوڭىل ءبولۋىمىز شارت. ويتكەنى، ۇلتتىق سانا – سەزىمنىڭ قالىپتاسۋى تاربيەدەن باستاۋ الدى.

---