InfoHub Logo

ەلدىڭ تۇعىرلى، عۇمىرلى بولۋىنىڭ باستى جەتەكشى كۇشى – ۇلتتىق بىرلىك. ەل ىشىندە تىنىشتىق، ىنتىماق بيلەۋى ءۇشىن بارىنەن بۇرىن ەلدىڭ ۇلتتىق بۇتىندىگى قامتاماسىز ەتىلۋى جانە ەلدى قۇرايتىن ادامدار، ۇلتتار، ءتۇرلى توپتار اراسىندا تۇسىنىستىك پەن ارا-قاتىناستىڭ، ءتىپتى تىلەكتەستىكتىڭ بولۋى قاجەت. ەلدى قالىپتاستىراتىن فاكتورلاردىڭ ماڭىزدى ەلەمەنتتەرى سەنىم، وتان، تاريح، بايراق، بىرلىك، تاتۋلىق ىشىندە ءومىر ءسۇرۋ قالاۋى. مىنە وسىلار ىنتىماق، باق-بەرەكەنىڭ ورتاق كىلتى. تاريحقا كوز جۇگىرتەتىن بولساق كوپ مەملەكەتتەر سىرتقى كۇشتەردىڭ ەمەس، ىشكى الاۋىزدىقتىڭ، ىشتەگى ساتقىندار، دۇشپاندار تاراپىنان ىدىراتىلعان. قازىرگى زاماندا دا مۇنىڭ مىسالدارى كوپ. بۇل ءقاۋىپ اركەز ءتونىپ تۇر. ۇلتتىق جوسپارى، ۇلتتىق ماقساتتارى بولماعان ەلدەر (ساياسي، ەكونوميكالىق، مادەني) سىلكىنىستەر كەزىندە ۇلكەن جاراقاتتارعا تاپ بولادى. ۇلكەن ماقساتتارى، اسقاق ارماندارى بولماعان مەملەكەت دامىمايدى، قاتارداعى قاراپايىم ەلدەردىڭ ءبىرى بولىپ جۇرە بەرەدى. تەمىرقازىق جۇلدىزىنا جەتە المايمىز، ءبىراق وعان قاراپ باعىتىمىزدى بەلگىلەيمىز. ۇلتتىق جانە رۋحاني قۇندىلىقتارىمىز، ۇلتتىق بىرلىك جانە ۇلتتىق ماقساتتارىمىز ەلدىڭ تۇتاستىعىن نىعايتۋشى رۋحاني كۇش. ۇلتتىق ماقساتتار (ۇزاق-ورتا-قىسقا مەرزىمدى) رەتىندە جوسپارلانۋى كەرەك. بۇل ورايدا ەلباسىمىزدىڭ اتقارىپ جاتقانى ەڭبەگى زور. «يندۋستريالىق-يننوۆاسيالىق دامۋ باعدارلاماسى»، «ۇلت جوسپارى – 100 ناقتى قادام»، «قازاقستان – 2050»، سەكىلدى جوسپارلارى وسى جولدا جەمىسىن بەرۋدە. سونداي-اق ۇلتتىق بىرلىك پەن ۇلتتىق ماقساتتاردى ۋاعىزداۋدا جانە ىسكە اسىرۋدا تەك ساياساتكەرلەر ەمەس، زيالى قاۋىم، عالىمدار، قوعام قايراتكەرلەرى، جالپى حالىق ءبىر اۋىزدان ات سالىسۋى قاجەت.

ەلدىڭ ىنتىماعىن قامتاماسىز ەتۋدىڭ جولى – بولىنبەۋ. اراڭداتۋشىلىققا، ىرىتكىگە جول بەرمەۋ. قازاقستان – ءارتۇرلى ۇلت، ءدىن، مادەنيەت وكىلدەرى مەكەن ەتەتىن التىن وتانىمىز. ۇلتىمىز، ءدىنىمىز، مادەنيەتىمىز وزگەشە بولۋى مۇمكىن. جاقسى كورەتىن، جاقتىرمايتىن ادامدارىمىز دا وزگەشە بولۋى مۇمكىن. ءبىراق ءبىر ورتادا، ءبىر وتاندا ءومىر ءسۇرۋ ءۇشىن بۇلاردىڭ ەشقايسىسى كەدەرگى ەمەس. 17 ميلليون حالىقتىڭ بارلىعىن جاقسى كورۋگە ءماجبۇر ەمەسپىز، ادامداردىڭ بارلىعىنا جاقسىلىق جاساۋعا ءماجبۇر ەمەسپىز، ءبىراق ەشكىمگە جاماندىق ەتپەۋگە، ەشكىمگە زيانىمىزدى تيگىزبەۋگە مىندەتتىمىز. اركىم ءوز تۇرعىسىنان ءادىل، ادال بولۋعا، ەشكىمنىڭ اقىسىن جەمەۋگە، ادەپ قاعيدالارىن ساقتاۋعا مەيلىنشە تىرىسسا ەلىمىز وركەندەي بەرمەك. الەۋمەتتىك جەلىلەردە ءارتۇرلى جازبالار، مونتاجدالعان ۆيدەولار، ءتۇبىرى جوق جالالار تولىپ جاتىر. ءبىر-بىرىن جامانداپ، بوعاۋىز ءسوز، بورالاپ جاتقاندار دا از ەمەس. ماسەلەن ءبىر مىسالدى كورسەتىپ، ءبىر ۇلتتاعى بۇكىل ادامدار نەمەسە بۇكىل مۇسىلماندار وسىنداي جامان ەكەن دەگەن پايىمداۋلار بار. نەگىزىندە دۇشپانداردىڭ قالاعانى وسى. حالىقتى بىر-بىرىنە شاعىستىرىپ، ايداپ سالۋ. دۇشپانداردىڭ مۇنداي ويىندارىنا قۇرال بولۋدان ساقتانۋ كەرەك. بەس ساۋساق بىردەي ەمەس. كەز كەلگەن قاۋىمنىڭ جاقسىلارى بولاتىنىنداي، جامانى دا بولۋى مۇمكىن. ءبىر جاماندى كوردىم دەپ بارىنە توپىراق شاشۋدان اۋلاق بولۋ كەرەك. زامانىمىز دۇشپان ارتتىرۋىدىڭ ەمەس، دوس ارتتىرۋدىڭ، ىنتىماقتاستىقتىڭ زامانى. مايدا-شۇيدە كەلەڭسىزدىكتەردى تاستاپ، اۋىزبىرلىككە ۇمتىلۋدىڭ زامانى. سوندىقتان الەۋمەتتىك جەلىلەردە، جالپى كەز كەلگەن جەردە بولىنۋشىلىككە، ىرىتكىگە جول بەرمەۋگە ءبىر اۋىزدان ات سالىسۋ كەرەك. بىرلىگى مىقتى ەلدى جاۋ دا، داۋ دا الا المايدى.   

---