InfoHub Logo

بip سارت قالاعا ءبىر ەسەك، ءبىر ەشكى ساتۋعا الىپ كەلەدى. ەشكىنىڭ موينىندا قوڭىراۋى بار ەكەن. مۇنى ءۇش ۇرى كورىپ، بىرەۋى ايتتى:

— مەن وسى سارتتىڭ وزىنە بىلدىرمەي ەشكىسىن ۇرلاپ الامىن.

ەكىنشىسى ايتتى:

— مەن قولىنداعى ەسەگىن ۇرلاپ الامىن.

ءۇشىنشىسى ايتتى:

— ونىڭ ءبارى دە قيىن ەمەس، مىنا مەن سارتتىڭ ءوزىنىڭ ۇستىندەگى كيىمىن دە ۇرلاپ الامىن.

سول سوزبەن باستاپقى ۇرى سارتتىڭ ارتقى جاعىنان كەلىپ، ەشكىنىڭ موينىنداعى قوڭىراۋدى الىپ، ەسەكتىڭ قۇيرىعىنا تاقتى دا، ەشكىنى جەتەكتەپ دالاعا الىپ كەتتى. ءبىرازدان سوڭ سارت ارتىنا قاراسا ەشكى جوق. ءسويتىپ اڭ-تاڭ بولىپ تۇرعاندا، ەكىنشى ۇرى كەلىپ: نەعىلىپ تۇرسىڭ؟ — دەپ سۇرادى. سارت:

— ەشكىمدى الدىردىم، — دەدى. ۇرى ايتتى:

— مەن كوردىم، ەشكى جەتەكتەگەن بىرەۋ جاڭا عانا وسى ورمانعا كىرىپ كەتتى، قۋساڭ جەتەسىڭ. سارت:

— ەندەشە، قۇداي ءۇشىن ەسەگىمدى ۇستاي تۇر، — دەپ، ەسەگىن ۇرىعا ۇستاتىپ، ءوزى اعاشقا جۇگىرىپ كىرگەندە، بۇل ۇرى ەسەكتى الىپ جونەلدى.

ءبىرازدان سوڭ قايتىپ كەلسە، ەسەگى تاعى جوق. مۇنان سوڭ سارت بايعۇس جىلاپ، جولعا ءتۇسىپ جۇرە بەردى. سارت ءسويتىپ كەلە جاتسا، جول ۇستىندە، سۋدىڭ جاعاسىندا جىلاپ وتىرعان ءبىر ادامعا ۇشىراپ، «نەگە جىلاپ وتىرسىڭ؟» دەپ سۇرادى.

ول كىسى ايتتى:

— ءبىر بايدىڭ قىزمەتكەرى ەدىم، باي ءبىر قاپشىق التىن بەرىپ «قالاعا الىپ بار» دەپ جىبەرىپ ەدى. وسى سۋدىڭ جاعاسىنا جەتكەن سوڭ دەم الايىنشى دەپ سۇيەنىپ جاتىپ ۇيىقتاپ كەتىپ، ۇيقىسىراپ ابايسىز قاپشىقتى سۋعا يتەرىپ جىبەرىپپىن. ەندى نەعىلارىمدى بىلمەي وتىرمىن.

سارت:

— ەندەشە سۋعا نەگە ءتۇسىپ، التىنىڭدى المايسىڭ؟ — دەدى.

كىسى ايتتى:

— جۇزە بىلمەگەننەن سۋدان قورقۋشى ەدىم، قاپشىقتى الىپ بەرگەن كىسىگە 20 التىن بەرەر ەدىم.

سارت ويلادى:

— ەسەگىم مەن ەشكىمدى الدىرعان ءۇشىن ماعان بۇل قۇدايدىڭ جىبەرگەن ولجاسى شىعار، قاپشىعىن اپەرىپ، 20 التىن الايىن، — دەپ، جالماجان شەشىنىپ، كيىمىنىڭ ءبارىن تاستاپ سۋعا ءتۇستى. سۋ ىشىندە ولاي-بۇلاي ءجۇزىپ، تايىز جەرىندە ءجۇرىپ ىزدەسە دە قاپشىق تابىلمادى.

ءبىرازدان سوڭ، شارشاپ قايتىپ كەلسە، كيىمىن ماناعى ءۇشىنشى ۇرى الىپ جونەلگەن ەكەن.

---