InfoHub Logo

ەركە قىز بەن مىسىق بۇگىن دە عاجايىپ ورمانعا جول تارتتى. جولدا دۇكەنشى اعايدىڭ «تەك پايدالى زاتتار» ساتاتىن دۇكەنىنەن بالقايماق پەن جەمىس شىرىنىن الدى. بۇل ورماننىڭ جاي ورمان ەمەس، عاجايىپ ورمان ەكەنىن بىلەتىن بولارسىڭ، بالاقاي. ەركە قىز اشىق الاڭقايدا ءوسىپ تۇرعان ادەمى گۇلدەردى كورىپ، بىر-ەكەۋىن جۇلىپ الماقشى بولىپ ەدى، گۇلدەر سىڭعىرلاپ كۇلىپ قويا بەردى:

ەركە قىز-اۋ، ەركە قىز،
ءبىز دە سىزدەي ەركەمىز.

ەركە قىز سويلەيتىن گۇلدى العاش رەت كورۋدە. اڭتارىلىپ قالدى. مىسىق بۇل ورمانداعى بارلىق وسىمدىكتەر مەن جانۋارلاردىڭ سويلەي الاتىنىن ەسكەرتكەن ەدى. ۇمىتىپ قالىپتى. گۇلدەر بىر-بىرىنە سىبىرلاعانداي، سىڭعىرلاي كۇلىپ:

— ەركە قىز، كويلەگىڭ مەن تاقياڭداعى ويۋلار قانداي ادەمى، ا؟-دەدى سۇيسىنگەندەرىن جاسىرا الماي. ەركە قىز جىميىپ،

— ءيا، راحمەت. بۇل ءبىزدىڭ قازاقتىڭ ۇلتتىق ويۋى-بوتا مويىن. انام مەنىڭ بارلىق كيىمدەرىمدى وسىلاي ساندەپ بەرگەن،-دەدى ماقتانىشپەن. گۇلدەر جۇپار يىستەرىن ەركە قىزعا شاشىپ بەردى. ەركە قىز العىس ايتىپ، گۇلدەرمەن قوشتاسىپ، مىسىق ەكەۋى ارى قاراي ءجۇرىپ كەتتى.  
ەكەۋىنىڭ الدىنان ادەمى ۇيشىك شىقتى. جاڭادان سالىنعان سياقتى. ءبىراق جانىندا قاباقتارى ءتۇسىپ تۇنجىراعان ايۋ، قويان، ءتيىن جانە كىشكەنتاي تىشقان وتىر. مىسىق ولاردان نە بولعانىن سۇرادى. سويتسە، ول تورتەۋى دوس ەكەن. بىرىگىپ ءۇي سالماقشى بولىپتى. ءبىراق ءۇي سالۋدى باستاعان كەزدە، تىشقان «مەن كىشكەنەمىن، بورەنە باسىپ كەتەدى» دەپ، ارنارسەنى سىلتاۋراتىپ، ويناپ كەتىپتى. سونىمەن ايۋ، قويان، ءتيىن ءارقايسىسى وزدەرىنە بولمە سالىپ، تىشقانعا بولمە سالۋدى ۇمىتىپ كەتكەن ەكەن. ەندى تىشقان قايدا تۇرادى دەپ باستارى قاتىپ وتىر. ەركە قىزدىڭ دا كىشكەنتاي تىشقانعا جانى اشىپ كەتتى. ءبىزدىڭ مىسىق تاپقىر عوي!

— وعان نەگە باس قاتىراسىڭدار؟ تىشقان كىشكەنتاي. كەز كەلگەن جەرگە سيادى. سەندەر ءارقايسىڭ ءوز بولمەلەرىڭنەن  كىشكەنە تەسىك جاساڭدار. تىشقان سول تەسىكتەن ءوتىپ، قالاعان بولمەسىندە تۇرا بەرەدى،-دەپ كەرەمەت ۇسىنىس ايتتى

تابىلعان اقىل! ءبارى قۋانىپ كەتتى. ەندى ءبىر ۇيدە ءتورت دوس بىرگە تۇرا الاتىن بولدى. مىسىق تابان استىندا تىشقانعا ارناپ ولەڭ دە شىعارىپ جىبەردى.
جالقاۋ بولما، تىشقانجان،
دوستارىڭمەن ەڭبەكتەن.
جالعىز جۇرگەن جاراسپاس،
ءىس بىتەدى تەك كوپپەن.

تاتۋ بولسا جان دوستار،
ءبارىن وڭاي بولادى.
بىرگە كۇلىپ، بىرگە ويناپ،
ۇلكەن ءۇي دە سالادى.

ولەڭدى ەستىپ ءبارى كۇلىپ جىبەردى. ال تىشقان بولسا ۇيالىپ قالدى. ەركە قىز تىشقانعا بۇدان بىلاي ەڭبەك ەتۋدەن قاشپاۋدى ەسكەرتتى. دوستار ۇنەمى بارلىق قيىندىقتا بىرگە بولۋ كەرەك ەكەنىن ايتتى. تىشقان دوستارىنان كەشىرىم سۇرادى.

عاجايىپ ورماندى ارالاپ، كوپتەگەن قىزىققا كەنەلگەن ەركە قىز بەن مىسىق كۇن باتپاي ۇيلەرىنە ورالدى. ءسال كەشىككەندەرى ءۇشىن اناسى ازداپ ەسكەرتۋ ايتقانى بولماسا، ەركە قىز بەن مىسىقتىڭ بۇگىنگى كۇندەرى وتە ءساتتى ءوتتى. كۇنى بويى ورمان ارالاپ، ابدەن شارشاعان ەركە قىز ەرتە ۇيقىعا جاتتى. تۇسىندە عاجايىپ ورماندى كوردى. ءبىزدىڭ اقىلدى مىسىعىمىز دا شارشاعان كورىنەدى. پەشتىڭ تۇبىندە پىرىلداپ ۇيىقتاپ جاتىر.
بالاقاي، سەنىڭ ەڭبەكقور ەكەنىڭە سەنىمدىمىن. دوستارىڭمەن دە تاتۋ شىعارسىڭ، ءيا؟ جارايسىڭ!

---