InfoHub Logo

ق ر ءبىلىم جانە عىلىم ۆيسە-مينيسترى شولپان كارينوۆا 4-توقساندا وقۋشىلار قالاي ءبىلىم الاتىندىعىن ءتۇسىندىردى.

«1 ساۋىردە 4-توقسان باستالادى. 4-توقساندا وقۋشى سانى 300-گە دەيىنگى مەكتەپتەردە ءبىر سىنىپتا وقۋشى سانى 25 بالا جيناقتالىپ، شتاتتىق رەجيمدە وقۋ جالعاسادى. سونىمەن قاتار 4-توقسانعا ەنگىزىلىپ وتىرعان جاڭا فورمات – جاسىل جانە سارى ايماقتا ارالاس وقىتۋ بارلىق سىنىپتار ءۇشىن ۇسىنىلادى. وسى رەتتە ءبىرقاتار ماسەلەگە نازار اۋدار قاجەتتىگىن ەسكە سالامىن. بىرىنشىدەن، كارانتين تالاپتارى قاتاڭ ساقتالۋى ءتيىس. بۇل رەتتە ءبىلىم باسقارمالارى، ءار مەكتەپتىڭ اكىمشىلىگى ءتيىستى سانيتارلىق تالاپتاردى ساقتاۋ جۇمىسىن تولىق جۇرگىزۋى قاجەت. ەكىنشىدەن، الەۋمەتتىك اراقاشىقتىق، وقۋشىلار مەن پەداگوگتاردىڭ جەكە گيگيەناسى ساقتالۋى كەرەك. مۇنان بولەك، وقۋشىلار اۋىرعان جاعدايدا نە ناۋقاستارمەن بايلانىستا بولعاندا جانە اتا-انانىڭ وتىنىشىنە وراي قاشىقتان وقىتۋ مۇمكىندىگى ساقتالادى»، - دەدى ول مينيسترلىكتىڭ اپپارات جينالىسىندا.

ونىڭ اتاپ وتۋىنشە، 4-توقساندا نەگىزگى پاندەر شتاتتىق رەجيمدە، ال مۋزىكا، ەڭبەك، ينفورماتيكا، قۇقىق نەگىزدەرى، گرافيكا جانە جوبالاۋ، كاسىپكەرلىك نەگىزدەرى سىندى پاندەر قاشىقتان وقىتىلادى.

ءار سىنىپتا 15 بالادان اسپاۋى ءتيىس. ال ساباقتاردىڭ ۇزاقتىعى 40 مينۋتقا سوزىلادى. «قازىرگى ۋاقىتتا كەي وڭىرلەر قىزىل ايماقتا تۇرعانى بەلگىلى. بۇل - تاۋەكەلى جوعارى وڭىرلەر. وندا ساباق 3-توقسانداعىداي فورماتتا جالعاسادى. دەمەك، 1-5 جانە 9 بەن 11 سىنىپتاردا ارالاس وقىتۋ فورماتى قولدانىلادى. باسقا سىنىپتار قاشىقتان وقي بەرەدى»، - دەدى شولپان كارينوۆا.

---