WorldSkills Kazakhstan 2022: 110 ستۋدەنت ۇلتتىق چەمپيوناتتىڭ جەڭىمپازى اتاندى
«WorldSkills Kazakhstan 2022» VII رەسپۋبليكالىق كاسىبي شەبەرلىك چەمپيوناتىنىڭ قورىتىندىسى شىقتى.
110 كوللەدج ستۋدەنتى مەن جاس مامان 30 قۇزىرەت بويىنشا جەڭىمپاز اتاندى. ولار 34 التىن، 38 كۇمىس جانە 38 قولا مەدال جەڭىپ الدى. چەمپيوناتتىڭ تاعى 144 قاتىسۋشىسى ۇزدىك مەدالدارمەن ماراپاتتالدى.
باسپا ءسوز قىزمەتىنىڭ حابارلاۋىنشا، جەڭىمپازدار ەلىمىزدەگى ءىرى كاسىپورىنداردان جۇمىسقا شاقىرتۋ الادى جانە كەلەسى جىلى WorldSkills Europe چەمپيوناتىنا قاتىسۋ ءۇشىن ۇلتتىق قۇراماعا كىرۋ مۇمكىندىگىنە يە بولادى.
«بۇگىن ءبىز 30 نوميناسيا بويىنشا جەڭىسكە جەتكەن ۇزدىك ستۋدەنتتەردى، كوللەدج تۇلەكتەرىن ماراپاتتادىق. سىزدەر ايماقتىق ىرىكتەۋ كەزەڭىنەن ءساتتى ءوتىپ، رەسپۋبليكالىق بايقاۋدا جەڭىسكە جەتتىڭىزدەر جانە ءوز شەبەرلىكتەرىڭىزدى كورسەتتىڭىز. جاستار اراسىندا WorldSkills قوزعالىسى تانىمال بولىپ كەلە جاتقانى قۋانتادى. سىزدەرگە حالىقارالىق جارىستاردا جاڭا جەڭىستەر تىلەيمىن»،-دەدى «WorldSkills Kazakhstan 2022» جارىسىنىڭ جابىلۋ سالتاناتىندا وقۋ-اعارتۋ ۆيسە-مينيسترى عاني بەيسەمبايەۆ.
ەستەرىڭىزگە سالا كەتەيىك، VII رەسپۋبليكالىق چەمپيوناتقا ەلىمىزدىڭ بارلىق وڭىرىنەن 500–دەن استام WorldSkills وڭىرلىك كەزەڭدەرىنىڭ جەڭىمپازدارى قاتىستى. ولار 30 نەگىزگى قۇزىرەتتىلىك بويىنشا جارىستى.
ونىڭ ىشىندە ەلەكترمونتاجداۋ جۇمىستارى، اسپازدىق جانە مەيرامحانا ءىسى، بيزنەسكە ارنالعان IT-شەشىمدەر، web-تەحنولوگيالار، ءموبيلدى روبوتوتەحنيكا، مەحاترونيكا، پروتوتيپتەۋ جانە باسقا دا قۇزىرەتتىلىكتەر بار.
سونداي-اق، سالتاناتتى شارادا WorldSkills الەم چەمپيوناتتارىندا ەلىمىزدىڭ نامىسىن ابىرويمەن قورعاپ جۇرگەن دينا افاناسيەۆا «Best of National» مەدالىمەن ماراپاتتالدى. ول وسى جىلدىڭ قازان ايىندا كورەيادا وتكەن «WorldSkills Competition-2022» سايىسىندا «ۆەب-تەحنولوگيا» قۇزىرەتتىلىگى بويىنشا قولا جۇلدەگە يە بولدى. سونداي-اق WorldSkills Europe (WSOPE) جارىسىندا جۇلدە العان العاشقى قازاقستاندىق. دينا وتكەن جىلى ەۋروپا چەمپيوناتىندا قولا مەدال جەڭىپ الدى.
ەستەرىڭىزگە سالا كەتەيىك، «WorldSkills Kazakhstan 2022» رەسپۋبليكالىق چەمپيوناتى 7-9 جەلتوقسان ارالىعىندا «EXPO» حالىقارالىق كورمە ورتالىعى مەن استانا قالاسىنىڭ كوللەدجدەرى الاڭىندا ءوتتى.
جارىسقا قاتىسقان كوللەدج جانە جوو ستۋدەنتتەرىنىڭ، سونداي-اق كاسىپورىنداردىڭ جاس ماماندارىنىڭ جۇمىسىن 500-دەن استام ساراپشى باعالادى.
WorldSkills حالىقارالىق قوزعالىسى جۇمىسشى ماماندىقتاردىڭ بەدەلىن ارتتىرۋعا جانە تانىمال ەتۋگە باعىتتالعان جوبا. سونىمەن قاتار سايىس بىلىكتى كادرلاردى دايارلاۋدا جاڭا ترەندتەر تۋعىزاتىنىن دا اتاپ وتكەن ءجون. جارىسقا الەمنىڭ 60-تان استام مەملەكەتى قاتىسادى. قازاقستان WorldSkills International (WSI)، WorldSkills Europe (WSE) قاۋىمداستىقتارىنىڭ تەڭ قۇقىلى مۇشەسى بولىپ تابىلادى.
You Might Also Like
-
«قازاقستانداعى بالالار جىلى: بالالاردىڭ قۇقىقتارىن قورعاۋ سالاسىنداعى وزەكتى ماسەلەلەر، ءتۇيىندى سىن-قاتەرلەر مەن مۇمكىندىكتەر». ەلوردادا چەحيا، حورۆاتيا، ۆەنگريا، قىرعىزستان جانە باسقا ...
-
ءار ادامنىڭ كۇندەلىكتى تىرشىلىگىنە ەرەكشە وزگەرىس ەنگىزە قويماعان قوعامنان كەتىپ، جاڭا عاسىر ءوز ومىرىمىزدە جاڭا ءبىر ءداۋىردىڭ باستالعانىن مويىنداتۋدا. كوكجيەگىمىزدە كورىنىپ تۇرعان نۇرلى بولاشاعىمىزعا...
