يەك ارتقان تەڭىزگە مۇيىستەيىن،
كەلشى، قارعام، شاشىڭنان يىسكەيىن؟
يىسكەيىن تەك قانا، تيىسپەيىن،
كەلشى، قارعام، شاشىڭنان يىسكەيىن؟
قولاڭ قارا شاشىڭ-اي كۇن قاقتاعان!
قوس بۇرىم-اي جوتاندا بۇلعاقتاعان!
قارعام، سەندە جەرىمنىڭ ءيىسى بار-اۋ،
جەر ءيىسى جۇپاردان قىمبات ماعان!
ءيىسى بار-اۋ ءداننىڭ دە، شالعىننىڭ دا،
قىردىڭ دا، قىرماننىڭ دا، جاڭبىردىڭ دا،
تۇر، ءسىرا، مىنا شاشتا ءيىسى اڭقىپ
اپتاپتىڭ، اڭىزاقتىڭ، تاندىردىڭ دا.
شاشىڭنان يىسكەتشى، قارعام، ماعان؟
ەسىمە تۇسەر مە ەكەن ارمان-دالام.
يىسكەتشى؟
جاۋقازىن-جان ەكەنسىڭ؛
جاساندى اسەمدىككە الدانباعان.
تۇرعام جوق ساۋعا سۇراۋ قىلىعىڭنان،
جان ەدىم ماحابباتتىڭ قۇرىعى ۇرعان.
يىسكەيىن جۇرتىمنىڭ توپىراعىن،
يىسكەت، قارعام، ماعان بۇرىمىڭنان؟

---