InfoHub Logo

Adam denesiniń ıisi birden sezilip, muryndy jaratyndaı sıpatqa ıe emes. Al deneden belgili bir ıis shyǵatyn bolsa, ol ter bezderiniń belsendiliginiń artýynan, gıgıena talaptaryn saqtamaýdan nemese túrli ınfeksıalar saldarynan bolýy múmkin.

Ǵalymdardyń pikirinshe, adam ekinshi jartysyn tańdaǵan kezde beısanaly túrde denesiniń ıisine mán berip, sol arqyly tańdaıdy eken. Demek biz genimiz uqsas jandardy dál osy ıis sezý qabileti arqyly tabamyz. Sebebi adam aǵzasy qarsy jynysty tartyp, qyzyǵýshylyǵyn týdyratyn zattardy, ıaǵnı feromondardy bóle alady. Alaıda denemizden shyǵatyn ıis túrli aýrýlar jóninde belgi berýi múmkin. Medısına salasy qyzmetkerleriniń paıymdaýyna sáıkes, keı aýrýlar ózine tán ıiske ıe.

Iis túısigi arqyly dıagnoz qoıý

Dárigerler adam denesinen shyǵatyn jaǵymsyz ıis arqyly túrli aýrýlardyń alǵashqy dıagnozyn qoıýdy áldeqashan bastap ketken. Mysaly, adam denesinen balyq ıisi shyqsa, zat almasý prosesindegi kináratty bildiredi. Ol aǵzadaǵy túrli aýytqýlar saldarynan oryn alýy múmkin.

Terimizde paıda bolǵan bakterıalar ondaǵy «saý» bakterıalardy joıyp jiberedi. Al jańa bakterıalar qorektenetin zattarynyń ıisi ózgeshe sıpat alady.

Asetonnyń ıisi shyǵa ma?

Eger terden asetonnyń ıisi sezilse, mynadaı aýytqýlardy ańǵartýy yqtımal:

- Sýsamyrmen baılanysty túrli endokrındik aýytqýlar;

- As qorytý júıesindegi qıyndyqtar;

- Baýyr jáne búırek qyzmetteriniń buzylýy;

- Mıkrob, bakterıa jáne túrli vırýstardyń juǵýy;

Atalǵandardyń barlyǵy aǵzadaǵy teńgerimniń buzylýyna alyp keledi. Al óz kezeginde ol ishki aǵzalardyń qyzmetine áser etedi. Ádette deneden aseton ıisiniń shyǵýyna jıi sebep bolatyn – sýsamyr derti. Ony adam aǵzasynda ınsýlın jetispeýshiligi týyndaýymen baılanystyrady. Glúkozanyń ydyraýy nashar júrip, aǵzadaǵy mólsheriniń artýy qan quramynyń ózgerýine, zat almasýynyń nasharlaýyna yqpal etedi. Saldarynan aǵzadaǵy ketondyq deneler sany arta bastaıdy. Aǵzamyz artyq zattardy ter arqyly da shyǵaratyndyqtan, nelikten mundaı jaǵdaıda aseton ıisi shyǵatyny aıtpasa da túsinikti. Mundaı ahýal densaýlyǵyńyzdaǵy qıyndyqtardan belgi beredi. Tipti dıabettik komaǵa da meńzeýi múmkin.

Sonymen qatar aseton ıisi baýyr qyzmetimen de baılanysty. Mundaı jaǵdaıda aseton ıisinen bólek, isiný, zár shyǵarýǵa baılanysty qıyndyqtar, bel aýrýy baıqalyp, aýyzdan aseton ıisi shyǵady.

Eger tábetińiz bola tura kóp salmaq joǵaltsańyz, ashýshańdyq pen uıqysyzdyqty baıqasańyz, jáne olar aseton ıisimen qatar júrse, uıqy beziniń qyzmeti buzylǵan bolýy yqtımal.

Mysyq ıisi

Keıde adam denesinen mysyq nájisiniń ıisi shyǵýy múmkin. Ol da aǵzada oryn alǵan tómendegi aýytqýlardy ańǵartady:

- Baýyr, búırek aýrýlary

- Endokrındik júıedegi buzylýlar

- Semizdik

- As qorytý júıesi qyzmetiniń buzylýy

Deneden mysyq nájisiniń ıisi shyǵýynyń keń taralǵan sebepteriniń biri baýyrmen baılanysty. Eger onyń qyzmetinde kinárat paıda bolsa, búkil aǵzaǵa áser etedi. Mundaı jaǵdaıda deneden shyqqan jaǵymsyz ıisti joıý múmkin emes. Tipti, dezodoranttar da jaǵymsyz ıispen kúrese almaıdy.

Aqýyz ydyraǵanda paıda bolatyn zattar maı bezderi arqyly shyǵarylatyndyqtan, aǵzada osyndaı qıyndyq paıda bolady. Dárigerler ony ýrısıdozben baılanystyrady. Óz kezeginde ol búırektiń sozylmaly qabynýy, pıelonefrıt jáne ýremıaǵa alyp kelýi múmkin.

Sirke sý ıisi

Keıde adam denesinen bólinetin terden sirke sý ıisi shyǵady. Odan bólek ter bólinýi de arta túsedi. Mundaı ózgeristiń týyndaýy tómende atalǵan dertter sebepti bolýy yqtımal:

- Endokrındik buzylýlar

- D jáne B dárýmenderiniń jetispeýshiligi

- Ókpeniń jupaly-qabynba aýrýlary

- Omyraýdyń sozylmaly aýrýy

Eger endokrındik júıede buzylýlar oryn alsa, aǵzada ıod jetispeýshiligi týyndaýy múmkin. Ol birden denede jaǵymsyz ıistiń paıda bolýyna alyp keledi. Sonymen qatar sirke sý ıisi arqyly týberkýlez dertin ańǵara alasyz. Sebebi bul jaǵdaıda jótel, sharshańqylyq, álsizdik, dene qyzýynyń kóterilýi syndy belgiler paıda bolady. Al áıelderdiń denesinen sirke sý ıisi sezilse, beı-jaı qaraýǵa bolmaıdy. Ol omyraýǵa baılanysty qıyndyqtarǵa meńzeýi yqtımal.

Ózge de nusqalar

Deneńizdiń ıisi ózgerip, ıisi adam tózgisiz sıpat alsa, birden dárigerge qaralǵanyńyz jón. Sebebi ıisterdiń árqaısysy aǵzamyzdaǵy túrli aqaýlar men dertterge meńzeýi múmkin. Al olardyń keıbiriniń emdelýi qıynǵa soǵyp, kúrdelenýi yqtımal. Sondyqtan mundaı jaǵdaıda ýaqyt ótkizip almaǵanyńyz abzal.

Deneniń ıisi	Iispen baılanysty bolýy múmkin aýrýlar
Balyq ıisi	Zat almasýyna baılanysty qıyndyqtar
Tátti ıis nemese shirigen zat ıisi	Dıfterıa
Qoı júniniń ıisi (dymqyl)	Búırek ústi bezderi qyzmetiniń buzylýy
Kúkirtti sýtek ıisi	Asqazan jarasy, dıspepsıı
Buzylǵan et ıisi	Onkologıalyq qıyndyqtar
Kárilik ıisi	Gormondyq qıyndyqtar
Shirigen alma ıisi	Gıpoglıkemıalyq koma aldyndaǵy ahýal (birden aýrýhanaǵa jatqyzylýy tıis)

---