InfoHub Logo

Oftalmologtar bilim salasynda qolǵa alynyp jatqan reformalar balalardyń kórý qabiletine keri áserin tıgizýde degen pikirde, dep habarlaıdy QazAqparat.

«Mektep bitirgen soń árbir balada kórý qabiletine baılanysty problema týyndaıdy. Olardyń arasynda keń taralǵany - kórý qabiletiniń nasharlyǵy. Onyń birinshi sebebi genetıkalyq ornalasýyna baılanysty. Ekinshisi kórý qabiletine tym kóp salmaq túsirýde bolyp otyr. Onyń barlyǵy mektepterdegi bilim berý reformalarymen baılanysty ekendigi túsinikti. Elimizde daryndy balalarǵa arnalǵan mektepter sany kún sanap ósip keledi. Onda bilim tereńdetilgen tásilmen beriledi. Osyǵan qaraı mundaı mektepterdegi baǵdarlama da kúrdeli. Onyń ústine balalar túrli gadjetter men kompúterlik tehnologıalardy kóp qoldanady. Osynyń barlyǵy aınalyp kelgende balalardyń kórý qabiletiniń nasharlaýyna alyp keledi. Sondaı-aq osy sebepke baılanysty gıpodınamıa damıdy»,-dedi «Qazaq kóz aýrýlary ǵylymı-zertteý ınstıtýty» AQ Astana qalalyq fılıalynyń jetekshisi Áıgerim Túletova.

Onyń sózinshe, bul máselege baılanysty keń aýqymdy ǵylymı zertteýlerdi ınstıtýt ókilderi birneshe jyl buryn júrgizgen. Mamandar qandaı tásilmen bilim beretin jáne qaıda ornalasqan mektepterde balalar oftalmopatologıa problemalarymen kezdesetini naqtylanǵan.

«Bilim salasy boıynsha júrgizilgen reformalarǵa sáıkes, balalar mektepke 3 jastan bastap daıyndalady. Olar 3-4 jastan bastap-aq sanap, oqı bastaıdy. Buryn mundaı jaǵdaı bolmaǵan. Bul úderis úzdiksiz jalǵassa jaǵdaı barǵan saıyn kúrdelene beredi. Balalar tipti múldem kórmeı qalýy da múmkin. Sol sebepti balalar jylynda kemine eki ret oftalmologtan aqyl-keńes alyp turýlary kerek»,-dep qosty Túletova.

---