InfoHub Logo

Qazaqstanda balamasy joq BilimLand ulttyq sıfrlyq bilim berý platformasyna búginge deıin 7 000-ǵa jýyq mektep qosylǵan. Qazaqstan boıynsha bilim berý mekemelerindegi pedagog mamandar saıttaǵy barlyq sabaqty qoldanyp, sıfrly tehnologıalardyń tıimdiligin sezinýde.

Sonymen qatar bilimland.kz saıty qashan da ustazdardyń ýaqytyn tıimdi paıdalanyp, tájirıbe almasýy úshin portaldy udaıy jetildirýde. Pedagog mamandardy qoldaý maqsatynda saıtta pedagogter qoǵamdastyǵy BilimLand ashyq alańy – "Muǵalimge" paraqshasy jasaldy.

Atalǵan paraqsha birneshe bólimnen turady. Olar:

1.    Sabaqtar jáne synyp saǵattary
2.    Vıdeo
3.    Vebınarlar
4.    Sabaq josparlary
5.    Forým

Qazirgi tańda "Muǵalimge" paraqshasynda “Jańashyl muǵalim” baıqaýynyń aıasyndaǵy sabaq josparlary men sabaqtaǵy vıdeoúzindiler jınaqtalǵan qor bar. Osy bólimdi qoldanyp júrgen belsendi ustazdar daıyn sabaq josparlaryn kóshirip alýdan bólek, óz jumystarymen bólisýdi suraǵan bolatyn. Kelip túsken kóp suranys pen usynysty negizge ala otyryp, 2019 jyldyń qazan aıynda, "Muǵalimge" paraqshasy “Sabaq josparlary” jáne “Forým” atty sý jańa bólimderge tolyqtyryldy. 

"Sabaq josparlary" bólimi – muǵalimderge tájirıbe almasýǵa, sabaq josparlaryn daıarlaýda ýaqyt únemdeýge, jasaǵan jumystaryn jetildirýge múmkindik bermek. Sabaq josparyn qosý úshin “Sabaq josparlary” bóliminiń ishinde “Jospar qosý” túımesin basyp, oqý jáne sabaq maqsatyn, tildik maqsattaryn, kútiletin nátıjesin jáne baǵalaý krıterıılerin t.b. komponentterdi toltyrý qajet. Engizgen sabaq jospary lezde portalda paıda bolady. Qazirgi tańda portalda 1000-ǵa jýyq sabaq jospary bar. Olardy kez-kelgen ýaqytta tegin júktep alýǵa bolady. Qoldanýshylarǵa unaǵan jumystarǵa lúpil basyp nemese pikir qaldyrý múmkindigi qarastyrylǵan. 

Sonymen qatar, aldaǵy ýaqytta “úzdik sabaq jospary” baıqaýy josparlanýda. Eń sapaly daıyndalǵan sabaq josparlarynyń avtorlary qarjylaı syılyqtar men arnaıy sertıfıkatqa ıe bolmaq.

"Muǵalimge" paraqshasyndaǵy jańa bólimderdiń biri – Forým. Atalǵan bólimde kez-kelgen portal qoldanýshysy ár túrli pedagogıkalyq, tárbıelik, áleýmettik t.b. taqyryptarda  óz pikirimen bólisýine bolady. Qazir portalda “Jańartylǵan bilim berý mazmuny”, “Muǵalim mártebesi”, “Aǵylshyn tilin birinshi synyptan bastap oqytý”, “Mektep ujymyndaǵy áriptestik qarym-qatynas”, “Muǵalimniń zeınetke shyǵý jasy” t.b. sıaqty bilim salasyndaǵy ózekti taqyryptar bar. Jańa taqyryp ashý múmkindigi de eskerilgen. Áleýmettik jeli arqyly kirip te, talqylaýǵa qatysýǵa bolady. Jaqyn arada “forým” bóliminde de baıqaý jarıalanyp, eń belsendi qoldanýshyǵa baǵaly syılyq beriledi!

Vebınarlar bóliminde BilimLand qoldanýshylary onlaın vebınarlarǵa tegin qatysa alady. Ol úshin josparlanǵan vebınarlar ishinen qajetin tańdap, tirkelý jetkelikti. Vebınar bolatyn kún men onyń ýaqyty aldyn-ala habarlanady. Onlaın vebınardy ótkizip alǵan jaǵdaıda, jazbasy portalda saqtalyp otyrady. 

Bolashaqta ustazdar qaýymynyń ózdiginen Respýblıkalyq kólemde onlaın vebınar ótkizý múmkindigi josparlanýda. Onyń da sharttary qarapaıym: saıtqa tirkelip, "Vebınarlar" bóliminde sabaq taqyryby, maqsaty, jospary, ótkizý ýaqyty men spıker týraly málimetterdi toltyryp, vebınar ótkizýge ótinim qaldyrý kerek. Arnaıy tekseristen keıin BilimLand ujymy spıkermen baılanysyp vebınar ótkizý sharttary jaıynda kelisedi. Vebınarlar elimizdiń ár aımaǵynda ornalasqan resýrstyq ortalyqtarda ótkizilmek. Aıta keteıik, onlaın sabaq ótkizgen maman respýblıkalyq dárejedegi sertıfıkatpen marapattalady.

---