InfoHub Logo

Seıtek Elısta mańyndaǵy qalmaq aýyldarynda da bolyp, kúıshiniń ózi aıtpaqshy, birneshe bı kúılerin úırenip qaıtady. Astrahan gýbernıasynan qaıtar jolda ekeýi bir aýylǵa tap bolady. Tóbeleri kóringennen aldarynan shyǵyp, bulardy attan túsirip, aıaqtaryn jerge tıgizbeı oqshaý tigilgen aıdyndy aq otaýǵa alyp keledi. Jurt abyr-sabyr, gý-gý, qoshemet. Saqaman kúlip Seıtekke: «Áı, osylar dáý de bolsa bizdi bireýmen shatastyrdy» dep edi, ol jaıbaraqat: «Saspa, áliptiń artyn baǵaıyq, bizdiń nemiz ketip barady?» dep jaýap beredi. Álden ýaqytta eń úlken aq otaýdyń ıesi Qumar keledi. At ústinen túspeı jatyp, aýyldastarynan: «Ne boldy, quda men kúıeý bala keldi me?» dep surap jatyr. «Qaıdam, eki kisi keldi, jik-japar bop qarsy aldyq. Biraq qaısysy kúıeý ekenin bile almaı otyrmyz», — desti jurt. Bulardyń aıtýyna qaraǵanda, aýylǵa ákep túsirgenderi kezdeısoq bir jolaýshylar bop shyqty. Shamaly ýaqyt ótken soń shyn qonaqtardyń ózderi de keldi. Olardy qol qýsyryp kútip ap, Seıtek pen Saqamannan joǵary otyrǵyzady. Qumar endi Seıtek pen onyń serigine kóńil aýdarýdy qoıyp, birese qudasymen, birese kúıeý balasymen ájin-gújiń áńgimelesip ketken edi. Munysyn kóńiline dyq alǵan Seıtek ózin tanytýdyń bir oraıyn izdep otyrdy. Kún keshkirip oıyn-saýyq bastaldy. Seıtek dombyrasyn alyp, birneshe kúı tartyp ótti. Jurt nazary endi buǵan aýdy. úı ıesi mensinbegen syńaımen: «Seıtek degen osy sen emessiń be? Dombyra tartýyń az-muz soǵan uqsaıdy eken», — dep erniniń ushymen suraı saldy. Seıtek «menmin» dep basyn ızedi de qoıdy. Qumar áýeli syr bildirmese de, «ózi bir tentek deýshi edi, qara basymdy qadir- lemediń dep soıqan salyp júrer» dep artynan seskenip qaldy.

Sol arada qalyńdyqtyń dombyrashy ekeni de anyqtaldy. Qyz dombyrasyn alyp kúı tarta jóneldi. Seıtek onyń dombyra shertisin unatyp qaldy da, «qaraǵym, dombyrań bulbuldaı saıraıdy eken» dep sol Aısha atty qyzǵa arnap tabanda bir kúı tartady. El arasyna ol kúı «Bulbul Aısha» degen atpen tarap ketedi.

---