InfoHub Logo

Memleket basshysy Qasym-Jomart Toqaev Almaty oblysyna jumys saparymen kelgende, óńirdegi biregeı sporttyq jobalardyń biri – halyqaralyq deńgeıdegi «Atletıko de Madrıd Qazaqstan» fýtbol akademıasynyń jumysymen tanysty.

Bul týraly Infohub.kz aqparat agenttigi habarlaıdy.

Akademıanyń jaǵdaıy

Prezıdentke akademıanyń 180 balaǵa arnalǵan jataqhanasy kórsetildi. Qazirgi tańda munda Qazaqstannyń ár óńirinen kelgen 116 bala turyp, jattyǵýlarmen aınalysýda.

Akademıaǵa oıynshylardy irikteýdi ıspan mamandary júrgizgen. Bul irikteýge Qazaqstannyń túkpir-túkpirinen 4 myńnan astam bala qatysqan.

Jas fýtbolshylar úshin munda oqý prosesi, jattyǵýlar jáne ózdigimen daıyndyq úshin barlyq jaǵdaı jasalǵan.

Bolashaq josparlar

Qasym-Jomart Toqaevqa akademıany damytý jáne sport ınfraqurylymyn keńeıtý josparlary tanystyryldy. Josparda jasandy tósenishti eki ashyq fýtbol alańyn, 500 oryndyq jabyq manejdi jáne ákimshilik-turmystyq keshenniń jańa ǵımaratyn salý kózdelgen.

Akademıa ornalasqan jer tańdaý kezinde klımattyq faktorlar eskerilgen. Talǵar aýdanynyń taza aýasy men qolaıly klımaty bala aǵzasynyń tez qalpyna kelýine yqpal etedi.

Jattyǵý prosesi

Sodan keıin Memleket basshysy FIFA standarttaryna saı keletin fýtbol alańyn aralady. Bul ýaqytta jas fýtbolshylar ıspan ádistemesi boıynsha dopty meńgerý tehnıkasyn jáne komandalyq ózara is-qımyldy pysyqtaýda boldy.

Sharaǵa Ispanıanyń Qazaqstandaǵy elshisi Lýıs Fransısko Martınes Montes, «Atletıko Madrıd» fýtbol klýbynyń basqarýshylar keńesiniń múshesi Davıd Vılá jáne «Atletıko Madrıd» fýtbol klýby akademıasynyń isteri jáne halyqaralyq damý jónindegi dırektorynyń orynbasary Marıa Teresa Kırıvı qatysty.