InfoHub Logo

Qazaq mádenıeti álemge tanylýda. Bul joly Chılı turǵyny Marıa Mýnos dombyrada sheber oınap, qazaq ánderin shyrqap, kópshilikti tań qaldyrdy. Ol Qazaqstanda týmasa da, dombyrany meńgerip, qazaq ánderin oryndaýǵa degen qushtarlyǵyn ınternet arqyly júzege asyrdy.

Bul týraly Infohub.kz aqparat agenttigi habarlaıdy.

İzgilik izderi

Marıa Mýnos dombyrany alǵash ret Dımash Qudaıbergenniń oryndaýynda kórip, qyzyǵýshylyq tanytqan. Ol Dımashtyń dombyrada oınaǵanyn kórip, qazaq mádenıetimen tereńirek tanysýǵa bel býdy. «Dımash arqyly dombyraǵa áýes boldym. Ol óte talantty, osy álemmen tanystyrǵany úshin rahmet!» deıdi ol.

Eki jyldyq izdenis

Marıa eki jyl boıy dombyrany óz betinshe úırenip keledi. YouTube arqyly beınesabaqtar kórip, qulaqqa salyp úırenedi. Ol dombyrada oınaýdyń qıyndyǵyn moıyndaıdy, ásirese, buryn-sońdy bul aspapty ustamaǵan adam úshin. Kúndelikti jattyǵýlar birneshe saǵatqa sozylyp, saýsaqtarynda izin qaldyrady. «Men YouTube-tegi beınelerdi kórip, qulaqqa salyp úırenemin. Dombyrada oınaý – bul aspappen tanys emes adamdar úshin qıyn. Dombyra Soft baǵdarlamasyn da qoldanamyn», – deıdi Marıa.

Júrekti terbeıtin ánder

Marıanyń repertýarynan Aqan Seriniń ataqty «Balqadısha» áni de oryn alǵan. Bul ándi oryndaý oǵan úlken synaq boldy. «Bul ándi birneshe aı boıy kóz jasymdy báseńdete almaı aıttym. Bul ánniń tarıhyndaǵy tereń qaıǵyny sezindim. Oryndaý ońaı bolmady, biraq bul án sonshalyqty ádemi bolǵandyqtan, men ony mindetti túrde aıtýym kerek edi», – dep bólisti ol.

Sonymen qatar, Marıanyń oryndaýynda Dımash Qudaıbergenniń «Samaltaý» jáne «Qaratorǵaı» ánderi, «MýzArt» tobynyń «Úshqońyr» kompozısıasy, «Kóńil tolqyny» kúıi jáne basqa da týyndylar bar.

Jelidegi áser

Marıanyń beınejazbalary astynda júzdegen pikirler qaldyrylǵan. Olardyń qatarynda qazaqstandyqtardan bólek, basqa da elderdiń ókilderi bar. «Naǵyz qazaqsha oınaısyń, janyńdy salyp oınaısyń!», «Qandaı keremet oryndaý! Rahmet, Marıa hanym», «Bravo! Bravısımo!», «Talabyńa nur jaýsyn, Dımash fan-klýbynyń úzdik ókilisiń!» – dep jazady kórermender.

Marıanyń ózi aıtqandaı, ol ánderdi tanymaldylyq úshin emes, mýzykany, sózderin jáne ár ánniń tarıhyn súıgendikten jazady. «Meniń jumysymdy adamdar jaqsy kóredi, olar árqashan jaqsy pikirler qaldyryp, meni jalǵastyrýǵa shaqyrady. Men ózimdi shynymen baqytty sezinemin», – deıdi ol.

Qazaqstanmen baılanys

Qazaq mádenıetin zertteý barysynda Marıanyń Qazaqstanda kóptegen dostary paıda boldy. Olar Atyraýdaǵy dombyra akademıasynyń shákirtteri men ustazdary, sondaı-aq Marıaǵa arnap dombyra jasaǵan sheber Erasyl Ádilbekov. «Ýaqyt aıyrmashylyǵyna baılanysty jıi sóılese almaımyz, biraq árdaıym baılanystamyz. Qazaqstanǵa jáne qazaqtar úshin qasıettiniń bárine degen tereń qurmet pen súıispenshilik bizdiń qarym-qatynasymyzdyń negizi», – deıdi ol.

Ol tipti qazaqstandyq oqýshylarmen beınebaılanys arqyly sóılesip, birge jattyǵady.

Qazaqstanǵa saıahat – armany

Marıa áli Qazaqstanda bolmaǵan, biraq saıahat josparyn jasap qoıǵan. Onyń tiziminde Astana men Almaty ǵana emes, basqa da qalalar bar. «Ókinishke oraı, men Qazaqstanda bolǵan emespin. Biraq men kóptegen tarıhı oryndardy, murajaılardy, sondaı-aq ulttyq saıabaqtar men Almaty, Astana, Qyzylorda jáne Qatonqaraǵaı sıaqty qalalardy aralaǵym keledi», – dep bólisti ol.

Ázirge ol qazaq mádenıetin zertteýdi jalǵastyrýda, naǵyz mýzyka men dástúrge degen qurmettiń shekarasy joq ekenin dáleldep keledi.