Sonaý Eslam úzdik týǵan bala eken,
Baıtaq elge asqar taýdaı pana eken.
Sol panadan, sol baladan aırylyp,
Jalpaq Jaýar júreginde jara eken.
Kóli ketip, shólge aınalsa - jer jetim,
Eri ketip, sher baılansa - el jetim.
Bildim anyq jastyń úzdik týǵanyn,
Kórmesem de, kórgennen soń el shetin.
Bildim jastyń asyp týǵan baǵasyn,
Jas ta bolsa, baıtaq elge aǵasyn.
Qalyń Jaýar ústindegi qamqanyń
Taǵdyr tartyp jyrtqan eken jaǵasyn.
( Jaýar - Qaraýyl rýynyń bir atasy)
Esin jıa el dep qulash sermepti,
Aǵaıynnyń birin de jat kórmepti.
Er azamat bir naqaqtan qysylsa,
Qorǵaý bopty, birin qoldan bermepti.
Tartypty ylǵı týra jolǵa, maqulǵa,
Asqar taýdaı pana bopty jaqynǵa.
«Halyq aıtsa, qalt aıtpaıdy» degen ǵoı,
Ie bopty baıtaq, tereń aqylǵa.
Ajal - bir jol, attap etpek aıla joq,
Ótken adam qaıta kelmes, qaıla joq.
Solaı, Zeke, elge toqtaý aıtqan jón,
Oımen azyp, jasyǵannan paıda joq.
Solaı, Zeke, oı sabyrmen basylar,
Ózińizdeı aǵasy bar, jasy bar.
Jaqsy týǵan er azamat joq emes,
El asqar ǵoı, talaı qymbat tasy bar.
Sol suńqardy kim umytar, kim qıyp,
Ketipti elim el oıyna ý quıyp.
Biraq aqda jeńgeni jón sol oıdy,
Oı degen bir darıa ǵoı tuńǵıyq.
Oı degen - bir tereń darıa tuńǵıyq,
Oı qajytar bir qaıǵy, bir nur quıyp.
Oı degen - sel, onda qulan qaǵy joq,
Oı degeniń - taýsylmaıtyn kermıyq.
Júrgen jeri saýyq-dýman bazardaı,
Ajal shirkin qaratpaıdy ajarǵa-aı.
Jolaýshymyn, ýaqytym tar bolmasa,
Jigit eken arnap sózder jazardaı.
Jigit eken kemeline kele almaı,
Armanda ótken tolyq jemis bere almaı.
Kemerine kelip, tolsa sonaý jas,
El qalar ma ed er jemisin tere almaı.
Taýda tas kóp, tas ishinde tas bolar,
Elde jas kóp, jas ishinde jas bolar.
Saqa quımas qolaıyna jaqpasa,
Asyl týǵan jas baıtaqqa bas bolar.
Múshe kelse, «at bolarlyq qulyn» der,
Jaqsy týsa, sonda mynaý ulym der.
Sol ulynan erte aırylsa sanaly el,
Úzilgendeı boldy, dúnıe, jolym der.
Solaı, Zeke, qaıyssa da qabyrǵa,
Bolsyn baıtaq endi mıǵa - sabyrǵa.
Ólim jol ǵoı, el - jolaýshy sol jolda,
Endi qaraı bermegeısiń qabyrǵa.
Ǵıbrat alyp aqynnyń bul hatynan,
Qaıǵyńdy azaıt kókirekten atylǵan.
Tap joldarda joldas bolǵan joldasym.
Kishilik aıttym Zylıqanyń da atynan.

---