InfoHub Logo

Qazaqstanda taýarlyq gazdiń kóterme baǵasy 1 shildeden bastap 33% ósetini týraly habarlama eldegi gaz baǵasynyń ósýine qatysty alańdaýshylyqty týdyrdy. Biraq, munaı-gaz salasynyń sarapshysy Oljas Baıdildınov bul jaǵdaıdyń mán-jaıyn túsindirip, aldaǵy ýaqytta baǵanyń odan ári ósetinin aıtty.

Bul týraly Infohub.kz aqparat agenttigi habarlaıdy.

Sarapshynyń aıtýynsha, Qazaqstandaǵy gaz baǵasy kóp jyldar boıy shyǵyndy bolǵan. Elimizde óndiriletin gazdiń shamamen 85%-y Qarashyǵanaq, Teńiz jáne Qashaǵan sıaqty iri ken oryndaryna tıesili. Bul ken oryndarynan alynǵan tazartylǵan gazdi «QazaqGaz» kompanıasy shamamen 50-55 dollarǵa satsa, ulttyq operator ony ózderiniń enshiles kompanıasy «QazaqGaz Aımaq»-qa 20-22 dollarǵa beredi eken. Bul halyqqa arzan baǵamen gaz jetkizý úshin jasalǵan.

Salanyń jyldyq shyǵyny

Oljas Baıdildınovtiń esepteýinshe, «áleýmettik» baǵany ustap turý úshin satylymnan kóretin jyldyq shyǵyn 400-500 mıllıon dollarǵa jetedi. Buǵan deıin bul shyǵyndardy gaz eksporty men tranzıti arqyly óteýge bolatyn edi. Alaıda, ishki tutynýdyń ósýine baılanysty eksport qysqaryp, Qazaqstan Reseıden jylyna shamamen 5 mıllıard tekshe metr gaz ımporttaı bastady.

Baǵany kóterý qajettiligi

Sarapshy 2023 jyly-aq ulttyq kompanıalardyń úsh jyl ishinde kóterme baǵany eki esege arttyrý josparyn bekitkenin atap ótti. Biraq, Baıdildınovtiń pikirinshe, bul da salanyń shyǵynyn jabýǵa jetkiliksiz. Onyń aıtýynsha, baǵany birden úsh esege kóterý qajet bolǵan.

«Arzan energıa tasymaldaýshylar dáýiri Qazaqstanda aıaqtaldy», - dedi sarapshy.

Degenmen, kóterme baǵanyń ósýi bólshek saýda baǵasynyń birden 33% artatynyn bildirmeıdi. Halyq baǵanyń ósimin qysqy jylytý maýsymynda, ıaǵnı qarasha-jeltoqsan aılarynda sezinetin bolady.