InfoHub Logo

Kúlimde, Naýryz kúlimde! (senarı)
Qazaq halqynyń uly merekesi Naýryz meıramyna da az kún qaldy. Nazarlaryńyzǵa mektepaldy daıyndyq toptary úshin 22 naýryz meıramyna arnalǵan «Kúlimde, Naýryz kúlimde» atty senarı usynamyz.
(Zal naýryz merekesine saı bezendiriledi, N. Tilendıevtiń «Ata tolǵaýy» kúıi oınatylyp turady).

Júrgizýshi: Qurmetti ata - analar, qonaqtar, balalar, Naýryz meıramy qutty bolsyn! Sizderge densaýlyq, baqyt tileımiz, aq mol bolsyn! Olaı bolsa búgingi naýryz merekesine arnalǵan «Kúlimde, Naýryz kúlimde» atty oıyn - saýyq sharamyzdy bastaıyq!

Júrgizýshi:
Toı dabylyn qaǵyp turǵan
Munda biz bar
Tyńdamaǵandaryńyz, tyńdańyzdar.
Naýryz toıy bastaldy,
Bir orynda turmańyzdar.
Ýa, jarańdar, jarańdar!
Kóńiliń bar alańdar.
Ata menen anań bar
Naýryz toıy bastaldy
Báriń beri qarańdar. (Ata - analar men qonaqtardy naýryz merekesimen quttyqtaý sóz mektepaldy daıarlyq tobymyzdyń tárbıeshisi _________________ beriledi.

Júrgizýshi:
Uly halqym eseptesken
Ata saltyn eshkim teppegen, attap ketpegen
Myń páleden qutqarady bir bata
Adam bolmas bata estip óspegen.
Uly kúnde, halaıyq,
Qalaı qarap qalaıyq
Sáıgúlikteı aǵaıyq
Jasyn bolyp janaıyq!
Ortamyzǵa atamyzdy shaqyryp
Aq batasyn alaıyq! ( Ortaǵa bata berý úshin Darhan ákeni shaqyramyz).
Ulys baqty bolsyn.
Ár kúnimiz jaqsy bolsyn
Dostyǵymyz berik bolsyn.
Ulys oń bolsyn
Aq mol bolsyn.
Qaıda barsań, jol bolsyn.
Ulys baqty bolsyn
Tórt túlik aqty bolsyn!
Ulys bereke bersin.
Pále - jala jerge ensin.
Qaıǵy - ýaıym joq bolsyn.
Ulystyń uly kúni qutty bolsyn!

1 - oqýshy:
Naýryzym – saltym, joǵalyp qaıta tabylǵan
Shyraǵym bolyp aldymnan búgin jaǵylǵan.
Babamnyń úni aq bata berip jetkizgen
Ár qadamyńnan janyma meıirim tabylǵan.

2 - oqýshy:
Qys ótip, qar erip,
Qulpyra kóktem jetip
Sharýanyń kenelgen
Meıramy ejelden
Qutty bolsyn, bul Naýryz!

Júrgizýshi:
Armysyz, álemniń altyn shyraǵy
Kún Ana! Qosh keldińiz!
Tórge shyǵyńyz.
Kún Ana: – O, qasıetti Jer - Ana! Adamzat úshin saǵan basymdy ıemin. Men seniń tabıǵat baılyǵyńa enetin taý - tasyńnan, jan - janýaryńnan bastap adamdaryńa deıin qýanysh - nuryn seýip, ár júrekke shat - kúlki syılap, siz úshin ózimniń gúl kóktemimdi, Arý kóktemimdi shaqyrǵaly turmyn.

Júrgizýshi: Búgin ulystyń uly kúni! Ata - babalarymyzdyń sózimen aıtsaq aq túıeniń qarny jarylǵan kún – Naýryz. Saltanatty Naýryzdy ortaǵa shaqyraıyq.
Shashý shashý – Jadyra ana.
Naýryz kelse, qut kelgeni, halaıyq!
Esik ashyp, shashý shashyp
El bolyp qarsy alaıyq!
Kún – Ana:
Zaryǵa kútken. Jańa jylym da keldi - aý!
Jańa jylym jarylqa, eski jylym, esirke,
Urpaǵymdy aman et!
Jamandyq ári ket, ári ket! (alystaıdy)
Arý kóktemim, kele ǵoı!
Naýryz – kóktem:
Sálem anam – altyn kún!
Nur shýaǵy halqymnyń
Ashyq bolsyn aspanyń,
Aman bolsyn jas - náriń!
O, halaıyq! Jarańdar!
Qane, beri qarańdar!
Meshin jyly barshańdy
Keneltsin zor baqytqa
Bilmeńder bir sharshaýdy
Bóleńizder shattyqqa.
Án: «Naýryz bizdiń jańa jyl».
Kórinis: «Besikke salý».

3 - oqýshy:
Kóktem toıy – ánnimiz,
Kórkem óner sánimiz
Óleń - ánmen toı sánin
Órnekteımiz bárimiz.
Jarqyraǵan jas nurly,
Jasa, naýryz, dástúrli.
Naýryz – kóktem:
Jaınatamyn bar gúldi.
Saıratamyn bulbuldy –
Tógiltip án - jyrymdy
Meıram etem bul kúndi.

Bı: «Gúlder».
4 - oqýshy:
Naýryzda kúlimdep
Kún nury tógildi
Ózgeshe búgin lep
Jelpiter kóńildi.

5 - oqýshy:
Naýryzdy halqymyz
Jyl basy sanaıdy.
Kónermes saltymyz
Kóktemdeı araıly.
Kórinis: «Tusaý keser»

6 - oqýshy:
Ánim de saǵan, bilim de,
Qut qonaq óziń úıim de
Qýanysh syılap elime
Kúlimde, Naýryz, kúlimde
Naýryz jyly meshin jyly,
Qutty bolsyn halaıyq
Ulystyń uly kúni
Shyrqap ánge salaıyq.

Án: «Baqytty balalyq shaq».
7 - oqýshy:
Naýryz – gúl kóktem
Sándi edi araıly
Kúlimdep kún kóktem
Nur shashyp qaraıdy.
Býsanyp jerim baı
Tósinde qalqyp án
Naýryz kóńildi án
Shattyǵy shalqyǵan.
Júrgizýshi:
Halqynyń ádep - saltyna
Oılana qarap túıin túı.
Shattyǵyn syılap jalpyǵa
Jalǵasa bersin án - kúı, bı!

Bı: «Jorǵa».
8 - oqýshy:
Ónip ekken dánimiz.
Búrshik jardy baǵymyz.
Sáskede – jaz
Túnde – qys
Sekildi eken naýryz.
Tóldep jatyr malymyz
Qazan toly sary ýyz.

9 - oqýshy:
Naýryz toıyn ádemi
Ájem eske túsirdi
Bizderge arnap ádeıi
Naýryz kóje pisirdi.
Ashyldy da kebeje
Dám ázirleý bastaldy.
Ájem naýryz kójege
Jeti túrli as saldy. (Ortaǵa áje shyǵyp Naýryz kóje ákeledi).
Áje:
Ashyq bolsyn qas qabaq,
Taspen atqandy aspen at
Beıtanys ta, tanys ta
Búgin tórde bas qonaq
Arpa, bıdaı, tary bar
Qatyq, malta taǵy bar
İshiletin, jeıtiniń
Bul kójede bári bar

10 - oqýshy:
Kún men tún teńeldi
Jer shýaqqa keneldi
Sony toılar el endi
Naýryz toıy saltymyz,
«Kógersin» dep halqymyz
Kóshege tal egedi.
Áje:
Aý, atalar, analar!
Aınalaıyn balalar!
Jep - ishsin dep tamsanyp
Jeti túrli dám salyp
Naýryz kóje pisirdim
Quıdym altyn tabaqqa
Qulshynyńdar tamaqqa
Bul kójeden tatyńdar
Bar qyzyqqa batyńdar.

11 - oqýshy:
Ulys kúni qazan tolsa
Ol jyly aq mol bolar
Uly kisiden bata alsa
Sonda oljaly jol bolar
Án: «Biz – ómirdiń gúlimiz».

Júrgizýshi:
Án qosylsyn sánińe!
Yrysty bop jańa jyl!
Baq darysyn bárińe!
Oı qosylyp oıyńa
Bas qosylyp boıyńa
Aman - esen jeteıik
Keler Naýryz toıyna.
Kelesi Naýryz toıynda kezdeskenshe qosh saý bolyńyzdar!