InfoHub Logo

Kún arqan boıy kóterilgen tusta úsheýi qol ustasqan kúıi úlken shatyrly, eńseli úı aldyndaǵy alańǵa jınaldy. Kúndegi ádetteri osy. Beıne bir ýádelesip qoıǵan dersiń. Sodan soń tus-tustan ózderi shamalas ózge qurbylary kelip qosylady. Esh nárseden alańsyz. Kóp uzamaı ózderiniń súıikti oıyndaryn bastaı jóneledi.

— Káne, balalar, tynysh otyryńyzdar !— Qaz-qatar otyra qalǵan balalar jańa ǵana ózderimen bir júrgen Sálımanyń áp-sátte muǵalim bolyp aldarynda turǵanyna tańdanbaıdy. Aıtty ma, bitti. Oryndaıdy. Kúni boıy shýlap otyrǵan balalar sap tyıylady.

— Búgin kim joq sabaqta? — Qolyndaǵy oqýlyǵy da, jýrnaly da — syrtqy muqabasy jyrtylǵan «Álippege» úńildi.

— Bári de túgel. — Balalar taǵy da shý ete qaldy.

— Já, shýlamańdar, túge. Nemene sonshalyqty. Bireýiń aıtsańdar da jetedi.— Bul Sálımanyń birinshide oqıtyn Asqar aǵasy aıtyp otyratyn Bátıma apaıǵa eliktep, qatal bolǵany. Ol apaıyn kórgen emes, biraq sonshalyqty kórgisi keledi. Qansha ret mektepke ertip bar dep ótinse de, Asqar munyń sózine qulaq aspady. «Áli kishkentaısyń, erteń-aq óziń oqýǵa barǵanda kóresiń»,— deıdi ári-beriden soń.

— Kánekeı, keshegi ótken taqpaǵymyzdy taǵy qaıtalaıyq.

Osydan soń bári «Árqashan kún sónbesin» ánin aıtady. Ázirge biletinderi de osy án ǵana. Tipti sabaq bastalǵaly aıtyp keledi.

Án bitisimen, árqaısysy ortaǵa shyǵyp, biletin taqpaqtaryn aıtady. Naǵyz qyzyq osy jerden bastaldy. Burynǵydaı emes, oqýshylar ýlap-shýlap, Sálıma muǵalımanyń aıtqanyna kóńil de bólmeıdi. Óz oqýshylarynyń tártipsiz qylyǵyna renjigen syńaıda qatal bola qalady da:

— Jaraıdy, búginge osy oqyǵanymyz jeter. Taraımyz, — deıdi. Osy sózdi kútkendeı bári de oryndarynan shý etip óre túregeledi.

— Erteń sabaqqa qalmaı kelińder.

Eń aldyda bara jatqan Sálıma «muǵalimniń» myna sózin biri estise, biri estimeı de qalady. Alaıda erteńine olardyń túgelimen «sabaqta» otyrǵanyn kóresiń.

---