InfoHub Logo

Oqýshylar "Kim bolam?" degen taqyrypqa shyǵarma jumysyn jazyp jatty.
***
Ustazdyq mamandyqtyń bedelin qoǵamda qalaı kóteremiz degen uzaq talqylaýdan keıin muǵalimge kabınet, kreslo jáne hatshy beriletin bolǵan edi. Endi oqýshylar muǵalimniń qabyldaýyna jazylady. Osyǵan oraı, muǵalimniń de minezi ózgerip ketti. Dókir, tońmoıyn minez paıda boldy. Muǵalimniń esiginen búldirshin qyz basyn qyltıtady.
- Ustazym, úı tapsyrmasyn tekserip jiberesiz be?
- Jap esikti!
Muǵalim hatshysyna urysady.
- Balalardy nege jiberesiń?!
Sámbi taldaı maıysqan hatshy qyz kináli pishinmen tómen qaraıdy.
Shákirt qyz endi anasyna jaǵdaı aıtady:
- Mama, muǵalimge siz aıtyp kóresiz be? Ol kisini jaqsy bilýshi me edińiz?
- Qaıdan bileıin?.. Ótkende bir toıda osy kisilermen de birge bolǵanymyz bar edi. Baryp kóreıin. Baryn kıip, baqanyn asynǵan kelinshek esikten basyn qyltıtady.
- Mártebeli ustaz! Men Aınagúldiń mamasymyn ǵoı.
- Aınagúldiń mamasy bolsań qaıteıin?! Jap esikti!
Kelinshek amalsyzdan kúlimsireıdi. Hatshy qyzǵa qaraıdy.
- Bul kisiniń qoly qashan bosaıdy?
Hatshy qyz bilmeımin degendeı ıyǵyn qıqańdatady.
- Men keshe kirip shyqtym, - deıdi osy kezde turǵan kelinshekterdiń biri.
Jurt eleń ete qalady.
- Iá, qalaı boldy?
- Qoı, ana kisi degen dápterdiń qaı jaǵynan ashylatynyn da bilmeıdi.
- Qoıyńyzshy siz de, osy bireýdi jamandasaq, tym...
- Joq, ras aıtam. Qyzym "muǵalimim, dápter myna jaǵynan bastalyp ashylady" dep edi, qyzyma jaqtyrmaı bir qarady. Sonda da táýir baǵa qoıǵysy kelmeıdi.
Birdeńe dámetedi.
- Berdińiz be endi?
- Beresiń, amal joq, balań úshin...
Osy kezde kabınetinen syzdanyp muǵalim shyǵady. Kelinshekter japyrlaı amandasady:
- Sálemetsiz be, muǵalim!
- Amansyz ba, ustaz!
Muǵalim birine de ıek qaqpastan syzdanǵan kúıi óte beredi.
Muǵalimniń aldynan kempir shyǵady.
- Amansyń ba, ulym? Ózińdi bir elge tutqa bolyp júrgen azamattardyń biri dep esepteımin. Osy eldiń el bolyp otyrǵany, halyqtyń halyq bolyp otyrǵany - ózderiń sekildi jigitterdiń arqasy. Bilim degenniń ózi...
- Aý, myna bala qaıda ketti? Sózimdi júre tyńdady ǵoı. Kóligine otyrdy da, ketip qaldy. Biraz kópshik tastaı qoıaıyn dep edim.
- Tyńdamaıdy, apa! - Kelinshekter kempirdi qorshalaı aldy. - Ol kisige birdeńe aıtaıyn dep pe edińiz?
- Meniki de sol, balanyń jaǵdaıy ǵoı. Nemerem ǵoı. Eregiskende osy balany muǵalim etip shyǵarmasam ba?!
- Bárimiz de solaı dep otyrmyz! - Kelinshekter shý ete qaldy. - Úıde kúni-túni qulaǵyna quıyp otyrmyz. "Tek qana muǵalim bolasyń!" dep otyrmyz.
- Meniń qyzym ǵoı ótkende, jyndy sıaqty, - dep bir kelinshek sóz bastady, - "sýretshi bolǵym keledi, mama" deıdi ǵoı adamnyń jynyna tıip. "Sýretshiligińe kóktigilsin! - dep aıqaı salǵanmyn. - Sýretshi bolyp neǵylaıyn dep ediń, ákeńniń sýretin salyp otyraıyn dep pe ediń?! Onyń qaı syqpytyn salmaqsyń. Salsań, otyr ǵoı, mine, murny qońqaıyp". Ákesi de aıtty: "Qyzym, mamańdy tyńda. Muǵalim bolasyń dedi me, endeshe muǵalim bolasyń". Kelinshekter bir sát únsiz qaldy. Jarqyraǵan ofısterden ustaz bolyp kirip-shyǵyp júrgen ul-qyzdarynyń bolashaǵyn oılap ketti.
***
Balalar "Kim bolam?" degen taqyrypqa shyǵarma jumystaryn jazyp bitirdi...
***
Ustazdyq kásiptiń uly qasıeti - aldaryndaǵy óz shákirtterine adaldyq tanytar qarapaıym bolmysynda ǵana.

---