InfoHub Logo

Bir kedeı kúni boıy jumys istep, qatty sharshaıdy. Bir arsha aǵashyn áreń kesip jerge qulatqanda, joǵarǵy jaǵynan eki jumyrtqa domalap túsedi de, jarylyp qalady. Birinshisinen búrkittiń balapany shyǵady da, lezde ósip, adam boıymen birdeı bolady. Ekinshi jumyrtqa jarylyp, odan altyn júzik shyǵady.

Búrkit qanatyn qaǵyp-qaǵyp qalady da, kedeıge:

- Eı, adam uly! Sen meni qutqardyń. Men saǵan mynaý altyn júzikti syılaımyn. Bul – sıqyrly júzik. Biraq júzikten ómirińde bir-aq tilek tileısiń. Tilegiń oryndalǵan soń júzigiń sıqyryn joǵaltyp, jáı júzikke aınalady. Sondyqtan tilegińdi aıtpastan buryn jaqsylap oılan. Áıtpese keıin ókinip júresiń, -deıdi. Osyny aıtyp, búrkit ushyp ketedi. Eginshi qýanyshtan júregi jarylardaı bop úıine qaıtady. Jolda zergerdiń dúkenine soǵyp, zergerden óz qolyndaǵy júziktiń qansha turatynyn suraıdy. Zerger: – Eki altyndaı bolatyn shyǵar, – deıdi. Kedeı qarqyldap kúlip jiberip, bul júziktiń sıqyrly ekenin, oǵan eshbir baǵa jetpeıtinin aıtady. Zerger qara júrekti, aram adam edi. Ol kedeıdi qoıarda-qoımaı qonaqqa shaqyrady. Úıinde uıyqtap jatqan jerinde eginshiniń júzigin urlap alyp, soǵan uqsas jáı júzikti salyp qoıady. Kelesi kúni kedeı baıǵús jónine ketedi, zerger esik-terezesin myqtap bekitip alyp:

- Júz myń altynym bolsa, – deýi muń eken, ústine altyndar jaýa bastaıdy. Zerger jantalasyp, arly-berli qasha bastaıdy, biraq esikti asha almaıdy. Dúnıeqońyz zerger altynǵa kómilip óledi, altyndaryn kórshileri bólisip alady. Al qaıyrymdy eginshi bolsa, áıeline júzikti kórsetip:

- Allah bizge raqym etti, endi qalaǵan tilegimiz oryndalady, – deıdi. Áıeli:

- Biz jer tileıik. Egistikke jer jetpeı júr ǵoı, – deıdi. – Joq! Bir jyl tyrmysyp eńbek etsek, jerdi ózimiz-aq satyp alamyz, – deıdi kúıeýi.

Sol jyly ónimderi mol bolyp, jer satyp alady. Eginshiniń áıeli:

-Endi júzikten at pen sıyr tileıik, – deıdi. – Sony da júzikten suraımyz ba?

Taǵy bir jyl erinbeı eńbektensek, oǵan da qol jetkizemiz, – deıdi kedeı. Kelesi jyly at pen sıyr satyp alady. Áıeli taǵy da:

- Buryn sen Allah Taǵalaǵa jalbarynyp, tilek etýshi ediń. Allah tilegindi berdi. Qazir patsha bolamyn, záýlim saraıda turamyn deseń de, bári qolyńda. Sharshap-shaldyǵyp júrgenshe, rahatqa batyp, tynysh otyrmaısyń ba?-deıdi. Sonda eginshi turyp:

- Biz áli jaspyz, ómirimiz alda. Allahqa shúkir, bizde qazir bári bar. Júzikten bir tilek surasaq, sıqyryn joǵaltady. Aldymyzda qıyn jaǵdaılar tap bolmaıtynyna kim kýá? Bizdi qandaı synaqtar kútip turǵanyn qaıdan bilemiz? – deıdi. Erli-zaıyptylardyń arasyndaǵy kelispeýshilik osymen bitedi. Kedeıdiń qoımalary jyl saıyn astyqqa tolyp, baqytty da baqýatty otbasynyń birine aınalady. Jyldar zýyldap ótip jatady, adal eńbekpen ómir súrgen eginshi de ómirden ótedi. Jerleıtin kezde nemereleriniń biri qolyndaǵy júzikti sheship almaqshy bolady, ekinshisi oǵan qarsy bolyp:

- Atamyz ómir boıy bul júzikti qatty qadirledi, ózi úshin asa qymbat eskertkish bolsa kerek. ózimen birge ketkeni durys bolar, – deıdi. Osylaı úıge baqyt pen baılyq ákelgen jaı júzik eginshimen birge kómiledi.

---