InfoHub Logo

Úıine aldyryp altyn turman ustatyp jatqan Muqyshqa:

— Darhan, seni ózim dep aıtyp otyrmyn. Maǵan osynshama qalyń jylqynyń bitýimen Qyzyr paıǵambardyń izin basqamyn, — dep maqtanady eken baı. Altyn men kúmisti aptaýǵa, balqytýǵa maldyń jambas, jaýyryn súıekteriniń shuńqyry qajet bolady. Bir kúni keshke jaqyn bir qansha aqsaqaldarmen áńgime quryp dóń basynda otyrǵan baı aýyl tóńireginen solardy izdep júrgen Muqyshty kórip:

— Eı, eı, Darhan, ne izdep júrsiń? — dep aıǵaı salypty.

Muqysh toqtaı qalyp bar daýysymen:

— Baıeke! Qyzyrdyń izin qaı jerden basqan edińiz, — depti.

Muny estigen baı yzaǵa býlyǵyp:

— Úı, aýzyńa qan tolǵyr, neni kókip tur, — dep tóbeden túsip ketedi. Muqysh úıge kelse, baıekeń qara kúpige oranyp jatyr eken. Muqysh az kidirip baryp:

— Baıeke, nemene sýyq tıip tumaýratyp qaldyńyz ba? — deıdi.

Baı basyn julyp alyp:

— Eı, Darhan, seni ózim sanap jan balasyna aıtpaǵan syrymdy aıtsam, shyryshtaı eldiń ishinde súren salǵanyń ne? — degende, Muqysh qarqyldap kúlip:

— Átteń, baıeke-aý, osyǵan da renjısiz be, men de sizdi ózim sanap, aýylyńyzǵa kúnde kelip ketetin Qyzyr paıǵambardyń yrysty izine bir baqaıymdy tıgizip alsam, eń bolmaǵanda júz jylqy bitpeı me? Sony da qyzǵanyp, kórsete salmaǵanyńyzǵa men de ókpelimin, — degen eken.

---