InfoHub Logo

(Kórinis) 

(Ormanda Túlki men Qonjyq kezdesip, áńgimelese bastaıdy.)
Túlki:
— Sálem,​ sen álgi Qońyr Aıýdyń qonjyǵy emessiń be?​
Netken kóriksizsiń óziń?!​ Júniń — sabalaq,​ aıaǵyń — maımaq,​ tyrnaǵyń — soıaýdaı.​
Qonjyq:
— Sálem,​ sulý Túlki!​ Rasymen meniń túrim usqynsyz ba?
Túlki:
— Árıne! Sulýlyq degen myna — men!​ Maǵan qarashy?​ Tonym qandaı ádemi? Kózim qandaı ádemi?
Qonjyq:
— Ia,​ sulý ekensiń!
Túlki:
— Qoı,​ Qonjyq! Men kettim. Tym bolmasa jýynyp júr.
Qonjyq:
— Saý bol!
(Túlki ketedi. Qonjyq muńaıyp otyryp qalady. Sahnaǵa Aıý shyǵady.)
Aıý:
— Qonjyǵym,​ nege muńaıyp otyrsyń?
Qonjyq:
— Anashym,​ meniń túrim usqynsyz ba?
Aıý:
— Ony kim aıtyp júr?
Qonjyq:
— Túlki aıtty: «Aıaǵyń - qısyq,​ júniń - sabalaq, kir-qojalaqsyń» - dedi.
Aıý:
— Kerisinshe, sen — súıkimdi,​ epti,​ aǵashqa da órmeleı alatyn,​ sýǵa da júze alatyn,​ jyldam júgire alatyn ańsyń.​
Qonjyq:
— Men senbeımin!
Aıý:
— Onda jantanýshy Japalaqtarǵa bar. Solar sendire alar.
(Aıý shyǵyp ketedi. Qonjyq sahnanyń kelesi jaǵyna baryp dybystaıdy.)
Qonjyq:
— Kýkký,​ phph!
(Sahnaǵa úsh Japalaq shyǵady.)
1-shi Japalaq:
— Sálem qońyr Qonjyq!​ Jáısha júrsiń be?
Qonjyq: 
— Qaıyrly kún,  Japalaq apaılar!  Sizderge bir sharýamen kelip otyrmyn.  Aıtyńyzdarshy... Men usqynsyz,  maımaq, kir-qojalaq, sabalaq ańmyn ba? 
1-shi Japalaq: 
— Eger sen óziń jaıly solaı oılasań,  aldymen jýynyp kel!  Al «men súıkimdimin» - dep oılasań,  keıin jýyn. Qazir sóılesip alaıyq?! 
Qonjyq: 
Aldymen sóılesip alsaq.. 
2-shi Japalaq: 
— Jaratýshy áý basta, adamdar men túrli ań-qustardy jaratqanda,  asqan sheberlikpen,  eseppen jaratqan. Eger bireý: «Men ózgelerden artyqpyn» dep oılasa,  qatty qatelesedi.  Al basqa bireý:  «Men ózgelerden kem jaratylǵanmyn»-dese,  ol da qatelesedi.  
Qonjyq: 
— Sonda men súıkimdimin be? 
2-shi Japalaq: 
— Árıne!  Óte súıkimdisiń!  Al tyrnaqtaryń qandaı ádemi?!  Sen olarmen jemis terip jeısiń.  Qorǵanasyń. Aǵashqa órmeleısiń. 
Qonjyq: 
— Aıaqtarym she? Maımaq emes pe? 
3-shi Japalaq: 
— Sen iri ańsyń. Saǵan budan ózge aıaq jaramaıdy.  Aıaǵyń júgirýge de,  júzýge de,  taýǵa órmeleýge de yńǵaıly jaralǵan.  
Qonjyq: 
— Raqmet sizge!  Sabalaq júnderim jaıly ne aıtasyz? 
3-shi Japalaq: 
— Ózi túsip qalady.  Sosyn ózgesi shyǵady. 
Qonjyq: 
— Qandaı aqyldy edińizder?! Sizderge alǵysym sheksiz!  Men qate oılappyn.. 
1-shi Japalaq: 
— Qonjyq,  eger bireý seniń syrtqy beıneńdi jamandasa,  oǵan bola qaıǵyrma!  Ony sen jaratqan joqsyń. 
2-shi Japalaq: 
— Al minezińdi jamandasa,  onda oılan!  Minez — seniń týyndyń!  
3-shi Japalaq: 
— Endi qaıta berseń bolady... Ózińe berilgen beıneńe razy bol!  Shúkirsizdik qylma! 
Qonjyq: 
— Kóp raqmet sizderge! Men barlyǵyn túsindim! Saý bolyńyzdar! 
Japalaqtar: 
— Saý bol!  Bar bol! 
1-Avtor: 
— Sodan beri Qonjyq óz-ózine senimdi,  baqytty ańǵa aınalypty.  Birde tákappar Túlki qońyr Qonjyqpen qaıta kezdesip qalady. Ol ádetinshe Qonjyqty renjite bastaıdy. 
Túlki:
— Qojalaq Qonjyq! Sabalaq qonjyq! Qaıdan kelesiń?
Qonjyq:
— Birinshiden, men óte súıkimdi Qonjyqpyn! Ekinshiden, meni eshkim renjite almaıdy.  «Meıirimge toly jan — aınalasyna nuryn shashady,  mahabbatqa muqtaj jan — aınalasyna ýyn shashady!»  Saý bol! (Qonjyq ketip qalady.) 
Túlki: 
— Myna qojalaq Qonjyq ne dep ketti?  Maǵan «ý shashasyń» - deı me? Buǵan mundaı senimdilik qaıdan kelgen?  (Osy kezde Japalaq ótip bara jatady. «Aaa» dep Túlki kúlip jiberedi.) 
— Ah,  Japalaqtar! Sender ekensińder ǵoı bárin búldirgen?! 
4-Japalaq: 
— Biz ne istedik Túke? 
Túlki: 
— Qonjyqty qutyrtyp jiberipsińder? 
5-Japalaq: 
— Qutyrtpadyq!  Óz-ózin baǵalaýdy úırettik! 
Túlki: 
— Maǵan da úıretseńdershi? 
Japalaq: 
— Saǵan «Ózgeni baǵalaý» sabaǵyna qatysý kerek?! Qalasań,  kel! 
Túlki: 
— Ne qylamyn ózgeni baǵalap?!  Ózimdi ǵana jaqsy kóremin! 
Japalaq: 
— Olaı bolsa jalǵyz qaldym deı ber!  Saý bol! (Ketip qalady.) 
Túlki: 
— Nege jalǵyz qalady ekenmin..?  Eı,  Japalaq?  Toqtashy? (Artynan ketedi.) 
2-Avtor: 
— Qurmetti balaqaılar! Senderdiń de aralaryńda ózgelerdi jaratpaıtyn balalar bolsa, oılansyn?!  Eger túrleriń aıdaı sulý bolsa da,  minezderiń nashar bolsa,  aınalaǵa súıkimsiz kórinesińder. Al minezderiń kórkem,  ózgege meıirimdi bolsańdar, senderdi eldiń barlyǵy jaqsy kóretin bolady.  Másele túrde emes,  minezde...!

Gúlmeken Qasenbaı 

---