InfoHub Logo

Sońǵy aptalarda Ózbekstanda menıngokok ınfeksıasynyń órship bara jatqany týraly aqparattar jıilep ketti. Resmı derekterge súıensek, 2026 jyldyń birinshi toqsanynda kórshi elde 174 adam osy dertke shaldyqqan, onyń 168-i – 14 jasqa deıingi balalar.

Bul jaǵdaıǵa baılanysty Ózbekstanda naýqastarmen baılanysta bolǵan bes myńǵa jýyq adamǵa ekpe salyndy. Osyǵan oraı, Qazaqstanda da ınfeksıanyń taralý qaýpi bar ma jáne bizde osyndaı jaǵdaılar tirkeldi me degen suraq týyndaıdy.

Bul týraly Infohub.kz aqparat agenttigi habarlaıdy.

Qazaqstandaǵy menıngokok ınfeksıasynyń statısıkasy

Qoǵamdyq densaýlyq saqtaý ulttyq ortalyǵynyń málimetinshe, Qazaqstanda menıngokok ınfeksıasyna qatysty epıdemıologıalyq jaǵdaı turaqty baqylaýda.

2026 jyldyń basynan beri elimizde 15 jaǵdaı tirkelgen, onyń 12-si – 14 jasqa deıingi balalar arasynda.

«Ótken jyldyń osy kezeńinde 29 jaǵdaı tirkelgen bolatyn. Iaǵnı, aýrý deńgeıiniń tómendegeni baıqalady», - delingen Ortalyqtyń jaýabynda.

Ulttyq ortalyqtyń dereginshe, aýrý anyqtalǵan jaǵdaıda aldyn alý sharalary kúsheıtiledi: naýqastarmen baılanysta bolǵandar tekserilip, olardyń jaǵdaıy baqylanady jáne qajet bolǵanda em taǵaıyndalady. Adamdarǵa úıdi jıi jeldetý jáne naýqastarmen jaqyn qarym-qatynastan aýlaq bolý usynylady.

Infeksıa qazaqstandyqtar úshin qanshalyqty qaýipti?

Ulttyq ortalyq qazirgi tańda Ózbekstanda bolǵan qazaqstandyqtar arasynda ınfeksıa juqtyrǵan rastalǵan jaǵdaılar joq ekenin habarlady.

«Alaıda, ınfeksıalyq aýrýlardyń shekara bilmeıtinin esten shyǵarmaǵan jón. Sondyqtan aldyn alý jáne medısınalyq kómekke ýaqytyly júginý máseleleri barshaǵa ózekti bolyp qala beredi»,- deıdi mamandar.

Qazaqstandyqtarǵa shetelge sapar aldynda baratyn eldegi epıdemıologıalyq jaǵdaıdy aldyn ala tekserip alý usynylady. Bul úshin halyqtyń densaýlyq qaýipsizdigi kartasy Saqbol qoljetimdi, onda álemdegi sanıtarlyq-epıdemıologıalyq ahýal, elge kirý jáne vaksınalaý boıynsha qoldanystaǵy talaptar týraly ózekti aqparattar jarıalanady.

Menıngokok ınfeksıasy: belgileri men aldyn alý

Menıngokok ınfeksıasy – bul bas mı qabyqtaryn zaqymdaıtyn jedel aýrý. Qozdyrǵyshy – menıngokok bakterıasy, ol jótelgende, sóılegende nemese túshkirgende aýa arqyly beriledi.

«Adamdarmen jaqyn baılanysta, mysaly, súıiskende nemese ortaq ydys-aıaq qoldanǵanda juqtyrýǵa bolady. Bakterıa muryn-jutqynshaq arqyly qanǵa ótip, keıin bas jáne julyn mıyna jetýi múmkin», - dep naqtylady sarapshylar.

Infeksıanyń kózi – aýrý adam nemese eshqandaı belgisi joq tasymaldaýshy bolýy múmkin. Ol jataqhanalar, áskerı kazarmalar, balabaqshalar sıaqty tyǵyz baılanys kezinde ońaı taralady. Ásirese, ımýnıteti álsiz adamdar úshin qaýipti.

«Kóptegen adamdar aýyrmasa da, ınfeksıany tasymaldap, aınalasyndaǵylarǵa juqtyrady. Menıngokok ınfeksıasy jeńil murynmen qatar, birneshe saǵat ishinde ólimge ákep soqtyratyn óte qaýipti (menıngıt, sepsıs) túrlerine de ulasýy múmkin. Kesh júgingen jaǵdaıda ólim-jitim qaýpi joǵary», - deıdi mamandar.

Aýrý kádimgi sýyq tıý sıaqty – temperatýra, álsizdik jáne bas aýrýymen bastalyp, keıin tez arada aýyr formaǵa aýysýy múmkin. Sarapshylar kelesi sımptomdar baıqalǵan jaǵdaıda dereý dárigerge qaralýdy usynady:

Menıngokok bakterıalarynan eń tıimdi qorǵanys – vaksınalaý.